1. Judacho raza Zedekia hachê razvôttkechea dhavea vorsa, mhonngê Nebukadnezzarachea otthravea vorsa, Sorvesporachem utor Jeremiasak pavlem:
2. Babiloniechea razachê foujen Jerusaleak veddho ghal'lo ani Jeremias provadi Judachea razachea nivasant Rakhonndaranchea Angnnant koidi aslo. Zedekian, Judachea razan, taka koidi kel'lo;
3. (b)tannem taka sanglem: 'Tum sodam oxem bhakit korit asai: "Sorvespor oxem sangta: Hanv hem Xar Babiloniechea razachea hatant atam ghalunk vetam ani tem Xar to aplea tabeant kortolo;
4. ani Judacho raza Zedekiah Kaldeikaranchea hatantlo suttchoch na; punn to Babiloniechea razachea hatant jerul poddtolo, tachê kodde tondda tonddim uloitolo ani taka rup-rup polletolo.
5. To Zedekiak Babiloniek vhortolo ani Hanv tachi khobor ghei porian uloita to Sorvespor! to thoinsoruch astolo. Kaldeikarancher tumi loddhai korxat zalear, tumkam ies mellchench na!' (3a) Oslim bhakitam kiteak mhonn tum korit asai? " '
6. Jeremiasan mhollem; 'Sorvesporachem utor oxem mhaka ailam:
7. "Polle Hanamel, tujea kaka Shallumacho put, tujê-xim ieun mhonntolo: Anathot ganvant mhojem xet asa, tem tum viktem ghe, kiteak tem soddoun viktem gheuncho hôk'k tuka asa."
8. Tedna Sorvesporachea utra pormannem, mhozo bapol bhav Hanamel Rakhonndaranchea Chovkant mhojê-xim ailo; ani tannem mhaka mhollem: "Anathot ganvant, Benjaminachea prantant, mhojem xet asa tem tum viktem ghe, kiteak tem tujem daiz korun ghevpacho ani soddovpacho tuka hôk'k asa; tum tem viktem ghe." Hi adnia Sorvesporachi mhonn tedna hanv zanno zalom.
9. Mhonnttôch mhojea bapol bhava Anathotachea Hanamela koddsun tem xet hanvem viktem ghetlem, ani tachem mol taka rupean tollun dilem: rupeache sotra Shekel.
10. Hanvem vikrê-kagod boroun kaddlem ani tacher xik'ko marlo, ani sakxiank haddun tem rupem tagdden zhokun dilem.
11. Magir mhojea bapol bhava Hanamela hujir ani toxench vikrê-kagdacher sôi kel'lea sakxidaram hujir ani Rakhonndaranchea Chovkant aslolea sogllea Judeikaram hujir, hanvem soglle kaide ani otti aslolem ani xik'ko marlolem vikrê-kagod ani tachi sadi prôt kaddun Barukak, Neriachea putak, Maseiachea natuak, dilim.
13. Tanchê hujir Barukak hanvem hi adnia dili:
14. "Sorvsoktivont Sorvespor, Israelacho Dev, oxem sangta: Him kagdam ghe xik'ko marlolem vikrê kagod ani tachi sadi prôt ani, zaito kall tim togchê khatir, tim don-ui matiechea eka aidonant ghal.
15. Kiteak Sorvsoktivont Sorvespor, Israelacho Dev, oxem mhonntta: ghoram, xetam ani dakam-molle, hanchi vikri hea desant novean chalu astoli."
16. Tem vikrê-kagod Neriachea puta Barukachê adhin kortôch, hanvem oxem Sorvesporak prarthon kelem:
17. "Probhu Sorvespora, Tujê vhôdd podven ani Tuzo hat vistarun Tunvem ontrall ani prithvi utpon kelim-i. Tujê kodde ghoddonatoslem kãich na.
18. Tum hixôb-naslolea mon'xank Tuzo visvaxi môg dakhoitai, punn bapaianchea guneanvachem farikponn tanchê pattlean ietolea tanchea bhurgeam koddchem bhorpur mapan ghetai. Vortea ani bollixtt Deva, Tujem Nanv Sorvsoktivont Sorvespor!
19. Xrextt-vorte Tujê irade, ani podvechim Tujim kortutvam. Mon'xam kortat titleacher Tum dollo dovortai, dôr-ekleak ap-aplê chalik ani kornniank favo ti mozuri ditai.
20. Tunvem Ejiptant khunna ani ojapam kelim-i ani aiz porian Israelant ani sogllea mon'xam modem korit asai. Oxem korun Tunvem Tuka nanv zôddlãi tem ozun togta.
21. Khunna ani ochoriam korun, podvedar hat ubarun ani bavllo vistarun, ani motti bhirant ghalun, Tunvem Tujê Israel-porjek Ejiptachea desantli bhair kaddlii;
22. tedna soput gheun ho tanchea purvozank bhasail'lo dês tankam diloi; dud ani mhonv vhanvtat toslo dês to.
23. Uprant tea desant tãnnim provês kelo ani aplea tabeant to ghetlo, punn tori Tujem utor aikunk vô Tuji Somurt pallunk tim raji naslim. Tunvem tankam dil'leô adnia tãnnim mat-ui pall'leô nant ani hea pasot hem noxtt Tunvem tancher denvo-xem keleim.
24. Polle! Hem Xar jikun gheunchê khatir Kaldeikaramnim matieche band ubarleat, ani torvarin, dukollan ani piddê-xidden hem Xar akromonn kortolea Kaldeikaranchea tabeant poddunk pavlam. Tunvem sangloleim toxench ghòddlem mhonn Tum polletai.
25. Punn, Probhu Sorvespora, Tunvench mhaka sangloleim: Zori hem Xar Kaldeikaranchea tabeant poddlolem asa, tori sakxiam hujir rupem diun xet viktem ghe." '
26. Tedna hem Sorvesporachem utor mhaka pavlem:
27. Polle, Hanv Sorvespor, sogllea mon'xakullacho Dev. Mhojean korunk zaina toslem kitem tori asa?
28. Dekhun Sorvespor oxem sangta "Hanv hem Xar Kaldeikaranchea ani Babiloniechea raza Nebukadnezzarachea hatant ghalunk vetam, ani to tem aplea tabeant kortolo.
29. Hea Xaracher akromonn korpi Kaldeikar tantum bhitôr sortole ani taka uzo lavun tem lasun uddoitole; toxench, Mhaka tiddounk jea ghoranchea pattsancher Baalak dhump bhettoilo ani porkea devank pivonn-orponnam ôtlim, tancho-i bhosm kortole.
30. Kiteak Israelachea ani Judachea putam-dhuvamnim aplea tornnattponnar san Mhojea dolleam mukhar vaitt tench kelam. Khorem mhollear, Israelachea putam-dhuvamnim aplea kortubamnim Mhaka fokot tiddoila -uloita to Sorvespor!
31. Hôi, hem Xar bandlolem tedna thaun tem aiz meren tem Mhozo krôdh itlo pettoita ami Mhaka itlo sontap haddta, ki tea pasot tem Xar Mhojê nodrê mukhavelem Hanv kaddun uddounk vetam.
32. Kiteak Israelachea putam-dhuvamnim ani Judachea putam-dhuvamnim mhonngê tanchea razamnim, tanchea fuddariamnim, tanchea iadnikamnim ani tanchea provadiamnim, Judachea lokan ani Jerusaleant ravtat tea soglleamnim aplea khotteponnam vorvim Mhaka tiddoilo.
33. Tãnnim Mhaka patt keli, aplem tondd Mhojê vatten kednanch vôll'lem na; itlea nettan dis uzvaddtanch suru korun ani thar ghenastana Hanvem tankam xikxonn dil'lem astam, tãnnim Mhojem utor kanar gheunk na ani xikxonn manun ghetlem na.
34. Portench zalear, jea Mondirak Mhojem Nanv dil'lem asa, tem bhoxttaun tantum tãnnim apleô kanttalleacheô murti ghaleô
35. Ani Ben-Hinnomachea Falkeant Baalak unch sthanam bandlim ani thoim aplea putank ani dhuvank ujeant ghalun Molekak bhettoilim. Oslem korunk Hanvem kednanch formailem na, nhoi mhonn itlea kanttalleachea kortuban Judak patkant lôtt'tit mhonn Mhojea monant porian kodinch ievzonk na.
36. "Tôr, hea Xara vixim tumi oxem mhonnttat: 'Torvarin, dukollan ani piddê-xidden tem Babiloniechea razachea tabeant poddlem!' Tea vixim Sorvespor, Israelacho Dev, mhonntta:
37. Polleiat! Mhojea ragan, sontapan ani vhodda krodhan jea-jea desamnim tankam Hanvem ximpddail'lim, thoinchim Hanv tankam ektthaim kortolom, tankam hea zagear porot haddtolom ani surokxit jie-xim kortolom.
38. Tedna tim zatolim Mhoji porza ani Hanv zatolom tancho Dev.
39. Tanchem ani tanchê pattlean tanchea bhurgeanchem borem zaunchê khatir, tãnnim sodanch Mhoji khori bhokti korchi mhonn ek nirbhêl bhoktichem kalliz tankam ditolom ani chalichi êkuch vatt dhôrunk tankam xikoitolom.
40. Hanv tanchê kodde êk sasnnik korar kortolom, tanchea boreponna khatir thambonastana ghas ghetolom, ani Mhoji khori bhokti tanchea kallzamnim ghaltolom ani oxim tim Mhojê sorxilim koddsorun vechim nant.
41. Tanchê sovem astolo Mhozo sontôs ani tankam borem korpant Mhojem dhadosponn. Ani sogllea kallza-monan tankam visvaxi ravun hea desant tankam roitolom ani thir korun dovortolom.
42. Kiteak Sorvespor oxem mhonntta: Zoxem adim hea lokacher nisontton korpa-sarkem Hanvem noxtt dhaddlolem, toxench Hanv bhasaitam tem boreponn atam tankam ditolom.
43. Osadd poddlolo, mon'xam vôzona-voram ravonant toslo ani atam Kaldeikaranchea tabeant poddlolo dês, oxem tumi hea desa vixim mhonnttat;
44. tori tea desant xetanchi novean vikri zaunk lagtoli. Benjaminachea prantant, Jerusalea bhonvtonnim aslolea jilheamnim, Judachea nogramnim, dongri vattarant ani doria-degechea soklattechea vattarant ani Negebant lôk xetam viktim ghetolo, tanchea molachem rupem farik kortolo, tanchim vikrê kagdam kortolo ani tancher xik'ko martolo ani sakxiank apoun tanchi sôi ghetolo. Kiteak Hanv tanchea nirvaxiank pordesantlim porot haddtolom. Uloita to Sorvespor! " '
