1. Moaba vixim Sorvespor, Israelacho Dev, oxem sangta: Nebochem kottakotta! Tachem ghorttann kelam, Kiriathaimak lojek ghalem, tem dusmananchea tabeant poddlem, kottant soglli lozuch: tacho sotianas zala!
2. Moabachi vhoddvik ubon geli! Heshbon nogrant tãnnim guddmêll korun tachem nisontton korunk tharailem: Cholat, raxttram modlem taka nanch korum-ia! Ani tumi, Pixeanchea nogrant ravtoleamnô, tumi-i gopchup poddtoleat, torvar tumchi patt sôddchi na.
3. Aikat! Horonaima thaun lôk oxi bob marta: Ghorttann! Sarko vidvas!
4. Moabacho nas zalo! Tachea ballkancheô bobô-hueli aikum ietat.
5. Roddot-roddot Luhitacho choddav tim kaddtat, Horonaimachê denvter vidvasachi killonch aikum ieta.
6. Pollun vochat! Tumcho jiv rakhunk pollun vochat! Rangaddva bhaxen oronneant dhanvun vochat!
7. Tujea kottancher ani tujê girestkaiecher tunvem visvas dovorloloi, punn tuka-i dhôrun bandun vhortole. Tumcho dêv Kemosh aplea puzariam ani kunvram borabôr pordesant vetolo.
8. Dôr-eka nogracher lutt-marpi denvun ietole, konnuch suttcho na; Falkeacho nas zatolo, ani moidan luttik sampoddtolem: oxem Sorvesporan sanglam.
9. Moabak paktte diat, taka uddun vochum-di, kiteak tachim nogram padd poddtolim ani thoim konnuch anink ravcho na.
10. (Jim konn Sorvesporan dil'lem kam befikirin kortat, tancher xirap poddum! Jim rogot varoina zaun kapli torvar rakhun dovortat, tancher xirap poddum!)
11. Aplea tornnatponnar thaun Moab sust jielo, sorea bhaxen aplêch muricher bosun aslo, kednanch taka gallun dovrunk na, kodinch to pordesant pavunk na, dekhun tacho svad tosoch urlo, tacho domdom kednanch bodlon vochunk na.
12. Hea pasot taka gallunk Hanvem gallpiank dhaddpache dis ietat. Uloita to Sorvespor! Te tache soglle kollxe rite korun sôddtole, ani tache soreache dabe foddun tanche kuddke korun uddoitole.
13. Zoxem Israelachea Ghorannean Bethel devacher aplo visvas dovorlolo ani hannem taka lojek ghal'lem, toxem atam Moabak tancho dêv Kemosh lojek ghaltolo.
14. Ami vir, loddaient dhiradik zhuzari ami!' oxem mhonnunk tumkam koxem puttovta?
15. Moabacho nas-korpi tachea nograncher choddun gelo; tanchea vinchlolea tornnattea soinikank gorvam bhaxen sojint marunk vhortat. Uloita to Raza, tachem nanv Sorvsoktivont Sorvespor!
16. Moabachem nisontton lagim pavlam, tacho sotianas vegim vegim dhanvun ieta.
17. Tachea xezarak ravtoleamnô, taka vollkhotoleamnô, tachê pasot dukh korat. Oxem mhonnat: 'Koxi mhonn moddon poddli ti bollixtt betkatti! ti tezvont razkatti koxi mhonn moddon geli!'
18. Dibonachê porjê, tujea voibhovi xinvasona thaun sokla denv, sukê korddê zomnir bos, kiteak Moabacho nas-korpi tujer loddai korunk fuddem sorla, tujim kottam tannem môddun uddoileant.
19. Aroerachê porjê, rosteachê degek ubi rav, ani rakhônn kôr. Pollapôll kortoleank ani kus martoleank vichar: 'Kitem zalam rê?
20. Moabak môddun uddoilo ani lojek ghalo. Roddat ani killonch marat! Moabachem padd zalem: oxem Arnon nodichê dhodder aslolea ganvamnim bob marun sangat!'
21. Denvli mon'subi Sopatt Moidanar;toxench Holon, Jaza, Mefat,
22. Dibon, Nebo, Beth-Diblathaim,
23. Kiriathaim, Beth-Gamul, Beth-Meon, hea nograncher;
24. têch porim Kerioth, Bozra, hea nograncher, ani Moabachea aixilea-poixilea nograncher mon'subi denvli.
25. Moabachem xing katrun uddoilem, tacho bavllo môddun uddoilo.Uloita to Sorvespor!
26. Taka bebdo korat! Urmottaien to Sorvesporacher kolpola! Moab onktolo, tantum to apunnuch lolltolo ani aplê pallien lokank kenddnniancho mhal zaunk pavtolo.
27. Israelachi gozal kaddtaloi titlê-i pavtti tuji tokli haloun vetaloi mum rê tum? Oxem korpak tunvem taka choram modem kedna tori dhôrloloi kitem?
28. Moabant ravtoleamnô, nogram sôddun diat, khoddpamnim ravunk vochat. Ami korun ravtolea patallachea koddxeacher parve aple gontther kortat, toxench tumi-i korat.
29. Moabachea gorvachi ami gozal aikolea: To ekdom ekdom gorvixtt! Kedi mhonn tachi urmottai! Koslem gorv! Kosli tachi mijas! Kitlem gorvan bhòrlolem tachem kalliz!
30. Tachi urmottai kitli ti Hanv zannom: uloita to Sorvespor! Polki tachi boddai, polkim tachim kamam!
31. Dekhun Hanv Moaba pasot rudon kortam, ak'khea Moaba pasot vhoddlean roddtam, ani Kir Heresachea loka khatir Hanv vilaptam.
32. Jazera pasot Hanv roddtalom tachê-vôn odik tujê pasot Hanv roddtam, Sibmachea dakam-mollea: tujeô khandiô Jiv-naslolea Sagora pelean pavloleô, Jazera porian teô pavtaleô. Piklolea xetancher toxench piklolea dakam-molleancher lutt-marpi denvun ailo.
33. Moabachea xetam-molleantle anond ani sontôs uddun gele. Kollombiantlo vhanvtalo to sogllo dakancho rôs Hanvem bond korun dovorla, khuxalkaien dakô mollunk konn ascho na, khuxalkaiecho sogllo boball somplo.
34. Heshbonacheô ani Eleialecheô bobô-hueli Jahaz porian aikum ietat. Zoar thaun Heronaim ani Eglath-Shelishia porian kivonchi pavtat, kiteak Nimrimachim udkam sukun zomin osadd zali.
35. Ani jim konn Moabant dongrancher iodn bhettoitat ani aplea devank dhump lasun vôptat, tea soglleancho Hanv nas kortolom. Uloita to Sorvespor!
36. Heach pasot Mhojem kalliz Moaba khatir eka vennua bhaxen roddta, Kir-Heresachea loka khatir vennua bhaxen dukamnim roddta, kiteak tannem punzail'li girestkai virun geli.
37. Hôi, soglleanchim mathim tasleant, soglleanchim khaddam tasun kaddleant, soglleanchea hatancher ghave keleat, soglleamnim aplea penkttak sakafottem bandlam.
38. Moabantlea sogllea ghoranchea pattsancher ani tachea rosteam nakeancher fokot roddnnem aikum ieta, kiteak Hanvem Moabak konnakuch naka aslolea matiechea aidona bhaxen fôddun tachi pudd kelea. Uloita to Sorvespor!
39. Kitlo mhonn tacho churo zala! Roddat! Lojen bhoron Moab pollun veta! Sogllea tachea xezariank Moab zala lokank kenddnniancho mhal, xirxiro haddta toslo zago!
40. Sorvespor oxem mhonntta: Polleiat, konn-eklo ghonni bhaxen zhompoiô marta, to Moabacher aple paktte vistarta.
41. Tachim nogram dusmanan aplê svadhin ghetlim, tachim kottam aplea tabeant kelim. Tea disa Moabachea zhuzarianchim kallzam porsutt-vennik pavlolê ostorêchea kallza bhaxen zatolim.
42. Moabacho nas zatolo, to anink raxttr koso urcho na, kiteak to Sorvesporacher kolpolo.
43. Moabant ravtoleamnô, tumkam atam ravtat fokot kampero, fôndd ani fas. Uloita to Sorvespor!
44. Kampereak lagun pollun vetat tim fonddant xevtton poddtolim, ani fonddantlim bhair sortit tim fasak sampoddtolim. Hôi, tankam khast lavchem voros ietolem tedna, hem sogllem Hanv Moabachea mathear ghaltolom. Uloita to Sorvespor!
45. Thokon ani puro zaun pollun vetalim tim Heshbonant asro gheun thamblim. Punn Heshbona thaun uzo bhair sorlo, Sihon razacho nivas bhogbhogta, ani tea ujean Moabacheô ximô porian girasleô ani gôddbôdd korpi lokache dongor lasun gele.
46. Kottakotta tujem, Moab! Khemoshachea lokacho sotianas zalo! Kiteak tujea putank pordesant vhele ani tujea dhuvank koidi korun gulamponnak pavoileô!
47. Punn nimannea disamnim Moabachea koidiank Hanv portun haddtolom. Uloita to Sorvespor! Hem sogott Moabak dil'lem mon'subechem formonn!
