1. Punn satvea mhoineant razkulliecho Ishmael, Nethaniacho put, Elishamacho natu, kãi razachea odhikariank ani anink dha dadleank apnna borabôr gheun Mizpa ganvant Gedalia Ahikamachea puta-xim ailo. Ani thoim Mizpant te vangdda jevta astana,
2. Ishmael, Nethaniacho put, tea dha zannam borabôr utthlo ani te soglle torvari gheun Gedaliachea, Ahikamachea putachea, Shafanachea natuachea, angar gele; ani Babiloniechea razan desacho razpal kel'lo taka tãnnim jivexim marlo.
3. Toxench Ishmaelan Gedaliachea vangdda Mizpant aslolea Judeikarank ani thoim pavun sorlolea Kaldeikar soinikank-ui jivexim marle.
4. Gedaliacho khun kela mhonn khobor vistarun vechê adinch, dusrea disa,
5. Shekema thaun, Shiloa thaun ani Samariê thaun oixim dadle pavle; tãnnim aplem khadd tasun kaddlolem, tanche kopdde pinzlole, ani tanchea angar apnnench kel'le ghai dixtti poddtale; tãnnim Sorvesporachea Mondirant orpunk dhanneacheô bhettovnniô ani dhump haddlolim.
6. Mizpa thaun roddun-roddun Ishmael, Nethaniacho put, tankam mellunk gelo. Tankam mell'lo tedna, tannem mhollem: 'Gedalias, Ahikamacho put, hachê-xim ieiat.'
7. Punn ekdam te nogrant borech bhitôr riglole tedna, Ishmael, Nethaniachea putan, aplea mon'xancho adar gheun tancho prann kaddlo, ani tankam êkê khonnint uddoile.
8. Punn tantlea dha zannamnim Ishmaelak mhollem: 'Amcho jiv kaddum naka; ami khub gonv, zôv,tel ani mhonv, xetant lipoun dovorleant.' Mhonnttôch tannem tankam sôddle, ani tanchea bhavam borabôr tancho prann kaddlo na.
9. Ishmaelan marlolea sogllea mon'xanchim pretam uddoil'lim ti khônn vhôdd asli; ti Asa razan Israelachea raza Baashachê bhirantin bandloli. Ti khônn Ishmaelan, Nethaniachea putan, apnnem marlolea mon'xanchea pretamnim bhôrli.
10. Tedna Ishmaelan Mizpa ganvant urlolea sogllea lokak dhôrun koidi kelo, toxench razkunvornnink ani Nebuzaradanan, rakhonndaranchea sordaran, Ahikamachea puta Gedaliachê svadhin kel'lea ani ozun Mizpant ravlolea tea lokak; hea somestank koidi korun Ishmael, Nethaniacho put, Ammonkaranchea ganvant vochunk vattek laglo.
11. Johananan, Kareiachea putan, ani tachea vangdda aslolea sogllea senapotimnim Nethaniachea puta Ishmaelan kel'lea sogllea khunanchi khobor aikoli.
12. Tedna tãnnim sogllea aplea mon'xank ektthaim korun Nethaniachea puta Ishmaelacher loddai korunk gele. Gibeon ganvant aslolea vhoddlea tolleaxim tãnnim tachi patt dhôrli.
13. Johananak, Kareiachea putak, ani tachea vangdda sogllea senapotink polleun, Ishmaela borabôr aslolea lokak vhôdd khuxalkai bhògli.
14. Ishmaelan Mizpa thaun koidi korun haddlolo lôk vòll'lo, portun gelo ani Kareiachea puta Johananachi tãnnim pang dhôrli.
15. Punn Ishmael, Nethaniacho put, aplea mon'xantlea atth zannank gheun Johananachea chopkeantlo suttlo ani Ammonkaranchea ganvant pollun gelo.
16. Ishmaelan, Nethaniachea putan, Ahikamachea puta Gedaliacho khun kelea uprant urlolo tea lokak Mizpa thaun koidi korun haddlolo mhonngê soinikank, bailank, bhurgeank ani izddeank; hankam soglleank Johananan, Koreiachea putan, ani tachea senapotimnim Gibeona thaun portun haddlolim; atam hankam tãnnim zoma kelim.
17. Kaldeikaranchê bhirantin te Ejiptak pollun vochunk lagle. Vatter Bethlehema lagim, Kim-Ham ganvant, tãnnim tharo ghetlo. Kaldeikaranchi tankam borich bhirant lagloli, kiteak Gedaliak, Ahikamachea putak, Babiloniechea razan desacho razpal nemlolo, ani hakach Ishmaelan, Nethaniachea putan, jivexim marlolo.
