1. Josiacho put Jehoiakim Judacho raza hachê razvottkechea chovthea vorsa hem Sorvesporachem utor Jeremiasak pavlem:
2. Êk kovllo ghe ani poilêch pavtti Josiachea kallar Hanv tujê kodde uloilom tedna thaun tem aiz porian Israela vixim, Juda vixim ani sogllea raxttram vixim Hanvem tuka sangleant tim sogllim utram tacher boroun kadd.
3. Judachea Ghoranneacher add jem sogllem noxtt Hanv dhaddcho asam, tem aikun tim sogllim ap-aplea vankddea marga velim ghoddiê koddsortit ani oso Hanv tanchea khotteponnak ani patkank bhogsonnem diunk pavum.
4. Tedna Jeremiasan Barukak, Neriachea putak, apoun haddlo ani Sorvesporan Jeremiasak sanglolim tim sogllim utram tachea tonddantlim aikun Barukan tea kovllear boroilim.
5. Tedna Jeremiasan Barukak hohukum ghalo: 'Sorvesporachea Mondirant bhitôr sorunk mhaka addvarla, dekhun
6. tunch voch ani mhojea tonddantlim tea kovllear boroun kaddleant tim Sorvesporachim sogllim utram upasachea disa Tachea Mondirant lokachea kanar sadoi, ani toxench ap-aplea nogram thaun ietolea sogllea Judeikarank vachun dakhoi.
7. Ghoddiê tanchea magnneamnim Sorvesporachem Kalliz movalltolem ani tim sogllim apli vankddi vatt sôddun ditolim, kiteak khorench hea lokacher Sorvesporacho zollto krôdh pettlolo asa ani hea krodhan Tannem tankam dhomkavnniô dileat.'
8. Jeremias provadian sanglolem titlem-i Barukan, Neriachea putan, kelem: tannem kovllear boroil'lim Sorvesporachim sogllim utram Tachea Mondirant tankam vachun dakhoilim.
9. Tedna, oxem ghòddlem: Josiacho put Jehoiakim, Judacho raza, hachê razvôttkechea panchvea vorsa, nnovea mhoineant, Jerusaleantlea sogllea lokak ani Judachea nogram thaun Jerusaleak vochunk zatalem tea sogllea lokak Sorvesporak prosonn korchê khatir êk upas korunk apoilo.
10. Tedna Barukan kovllea velim Jeremiasachim sogllim utram vachlim. Hem tannem Devmondirant Gemariachea vosrea thaun kelem. Ho Gemaria dhormxastria Shafanacho put aslo. Tacho vosro Novea Darvonttea lagim aslolea voilea angnnant aslo.Thoim thaun sogllea lokak tem borem aikunk ietalem.
11. Mikaia, Gemariacho put ani Shafanacho natu, hannem tea kovllea voilim Sorvesporachim sogllim utram aikolim; magir
12. to razvaddeant denvun gelo ani dhormxastriachea kuddant bhitôr sorlo. Thoim sogllea mukhelianchi boska bhòrloli: Elishama dhormxastri, Shemaiacho put Delaias, Akboracho put Elnathan, Shafanacho put Gemaria, Hananiacho put Zedekiah ani her soglle mukheli;
13. Baruk lokak kovllo vhoddlean vachun dakhoitalo tedna apnnem aikol'lim sogllim utram Mikaian tankam kolloilim.
14. Tedna mukheliamnim ekach motan Jehudi (Nethaniacho put, Shelemiacho natu, Kushicho ponntu) haka oso sondêx diun Baruka-xim dhaddlo: 'Porjek vachtaloi to kovllo gheun ie.'
15. To kovllo gheun Baruk, Neriacho put, tanchê mukhar ieun ubo ravlo.
16. Tãnnim taka mhollem: 'Bos ani vachun dakhoi.' Mhonnttôch Barukan to vachun dakhoilo. Sogllim utram aikona fuddem akantan te ekamekak polleunk lagle; tãnnim Barukak mhollem: 'Hi khobor ami razak kollounkuch zai.'
17. Tedna tãnnim Barukak vichar-lem: 'Him sogllim utram tum koxim mhonn borounk pavloi? Sang amkam.'
18. Barukan tankam zobab dilo: 'Jeremiasacheach tonddantlim aikun him sogllim utram hanvem xaien hea kovllear boroun kaddlim.'
19. Mukheliamnim Barukak mhollem: 'Tum ani Jeremias lipun ravlear odik borem; ani tumi khoim asat te konnakuch kolloum nakat.'
20. Uprant te mukheli razvaddeachea angnnant razak mellunk gele ani to kovllo tãnnim Elishama dhormxastriachea kuddant dovorlo. Uprant tãnnim ghòddlam tem sogllem razak kolloilem.
21. Tedna razan to kovllo apnna-xim haddunk Jehudiak dhaddlo ani hannem to Elishama dhormxastriachea kuddantlo haddlo ani razak ani raza bhonvtim aslolea mukheliank vachun dakhoilo.
22. Vorsachea nnovea mhoineant raza aplea hinvalleachea nivasant bosun aslo ani tachea fuddeant êk pettoil'li xegri asli.
23. Jehudi tin vô char panam vachtalo titlê-i pavtti raza dhormxastriachi suri gheun tim katortalo ani xegrentlea ujeant uddoitalo. Oso to ak'kho kovllo tê xegrechea ujeant lasun gelo.
24. Punn him sogllim utram aikolea astanam-i raza, nhoi mhonn tacho êk-ui odhikari, bhieunk na, khontin tãnnim aplim vostram pinzunk nant.
25. Zori Elnathanan ani Delaian ani Gemarian kovllo hulpaina zaunk razak agro kel'lo, tori razan tanchem kanar gheunkuch na.
26. Tedna Jeramil nanvacho razvaddeantlo eklo odhikari, ani Azrielacho put Seraia, ani Abdilacho put Shelemia hankam razan oso hukum ghalo: 'Baruk chittnnisak ani Jeremias provadiak dhôrun haddat.' Punn Sorvesporan tankam lipoun dovorlole.
27. Jeremiasachea tonddantlim aikun Barukan tachim utram boroun kaddlolim to kovllo razan laslea uprant, hem Sorvesporachem utor Jeremiasak pavlem:
28. Tum anink êk kovllo ghe ani Jehoiakiman, Judachea razan, lasun uddoilo tea kovllear boroun aslim titlim-i utram novean boroun kadd.
29. Ani Jehoiakimak, Judachea razak, tum oxem sang: "Sorvespor oxem mhonntta: to kovllo tunvem lasloi ani to lastana tunvem oxem mholleim: Babiloniecho raza ietoloch ani hea desacho vidvas kortolo ani tantum mon'xam ani mon'zati aschinch nant toslo dês kortolo- oxem tunvem kiteak boroilãi?
30. Dekhun, Sorvespor Judachea raza Jehoiakima vixim oxem sangta: Davidachea xinvasonar bosunk tacho konnuch urcho na, ani tachem pret bhair uddoitole disachea hunetak ani ratchea mureak.
31. Taka, tachê sonstik ani tachea odhikariank tanchea vaitt kortubank lagun Hanv khast laitolom; tancher, Jerusaleant ravtoleancher ani Judachea lokacher sarem-purem noxtt dhaddtolom; hem Hanvem tancher dhaddunk tharail'lem, punn Mhojê dhomkavnnek tãnnim chit diunkuch na." '
32. Magir Jeremiasan dusro êk kovllo ghetlo ani Neriachea puta Baruk chittnnisa kodde dilo; Jeremiasachea tonddantlim tannem aikol'lim sogllim utram Jehoiakim Judachea razan laslolea kovllear aslim, tim sogllim utram hea novea kovllear tannem boroun kaddlim; ani tanchê sarkim anink-ui zaitim utram choddoilim.
