1. Jeremias provadiak raxttram add sanglolim Sorvesporachim utram.
2. Ejipta vixim: Neko Faraoh, Ejiptacho raza, hachê foujê add: hifouz Eufrat Nodichê dhodder,Karkemish ganvant manddloli asli,ani Jehoiakim, Josiacho put, Judacho raza, hachê razvôttkechea chovthea vorsa, Nebukadnezzaran, Babiloniechea razan, hê foujek haroili.
3. Ddhal ani kovoch toiar korat! Loddai korunk fuddem sorat!
4. Ghoddeank toiar korat: ghoddesvoramnô, ghoddeancher bosat! Korttim ghalun tumchea zagear ube ravat. Bhale pazun gheiat, hodd'ddeak-ui korttim ghalat.
5. Kitem dekhtam hanv? Akantun thorthorun patt vôlltat ani pollun vetat! Tanchea vir-zhuzariank har poddli, pattim anink pollenastana te nitt pollun vetat. Sogllea vattamnim thorthoro ani koddkoddo! Uloita to Sorvespor!
6. Vegan dhanvpea lagim porian pollun vochunk ghoddona! Bollixttank legun pollun vochunk zaina! Kiteak Ut'torek, Eufrat nodichê dhodder, te aptton poddle, dhortorer xevttole:
7. Nil nodi bhaxen choddun ieta to konn? Tachim udkam upott bhòrlolê nodi bhaxen ghosghoxean vhanvtat.
8. Nil nodi vori Ejipt voir sorlo, tachim udkam upott bhorlolê nodi bhaxen ghosghoxean vhanvtat. To mhonnttalo: Hanv choddon vetolom ani akhi prithvi buddoitolom, nogram ani tantum ravtoleank zhaddun uddoitolom.
9. Ghoddeamnô, cholat, dhanvat! Rothamnô, cholat fuddem! Zhuzarimanô, fuddem cholat! Ethiopiechea ani Libiechea mon'xamnô, ddhal hatan dhôrun ieiat! Lidiechea mon'xamnô, dhonu-bann gheun ieiat!
10. Kiteak Sorvsoktivont Sorvespora Dhoniacho Dis ho, Aplea dusmanancho To sudd gheunk veta to Dis! Tachi torvar dhadoxi zai-sôr soglleank girastoli, toklek choddo-sôr tanchem rogot pietoli, kiteak Dhoni Sorvsoktivont Sorvespor Ut'torechea desant Eufrat nodichê dhodder, ek iodnachem vhoddlem jevonn toiar korta.
11. Ejiptachea mon'xamnô, molom sôdunk Gileiadak choddun vochat! Hixpa bhair tumi vokhdam ghetat, punn tancho tumkam gunn kãi poddona, tumkam borim korunk kosloch upai na!
12. Tumchê lojechi khobor raxttranchea kanar poddlea,Tumchem roddnnem ak'khê prithver gazta, zhuzari zhuzariacher aptton poddla ani dog-ui ekach faran dhortorer xevttoleat.
13. Nebukadnezzar, Babiloniecho raza, Ejiptacher akromonn korunk gelo tedna hem Sorvesporachem utor Jeremias provadiak pavlem:
14. Ejiptant porgôtt korat, Migdolant jahir korat, Nofant ani Tapanesant gazoiat! Oxem mhonnat: Tumchea zagear ghôtt ravat! Toiar zaiat, kiteak torvar tumchê bhonvtim soglleank girasunk laglea!
15. Kiteak mhonn tumcho dêv Apis pollun gelo? Kiteak mhonn tuzo Bollvont Dhoni thir ravlo na?
16. Hôi, Sorvesporan taka zomnir xevttilo, Tannem zaitea zonnank khala uddoileat! Eka-mekacher poddtana te mhonnttat: 'Utthat, hê nas-korpi torvari thaun koddsorumia, amchea khaxa loka-xim, ami zolma aileanv tea desant, portun vochum-ia!'
17. Farohk, Ejiptachea razak, tãnnim hem add-nanv dilam: 'Xubh-sond-hogddavpi-bobattio!'
18. Mhojea jivachean uloitam to Hanv Raza, Mhojem Nanv Sorvsoktivont Sorvespor! zoso Tabôr heram dongram poros unch, ani zoso Karmel doria poros unch, toso konn-eklo bollvont ieuncho asa!
19. Ejiptant ravtoleamnô, pordesant vochunk tuji khattli-pottli toiar kôr! Nof zatolem osadd poddlolem, lôk naslolem ghorttann.
20. Ejipt êk bhov sundor paddkulem aslem, punn Ut'torecho êk ganjil tacher ieun boslo.
21. Tachê bhitôr bhaddeak ail'le soinik porian chorbel'lea gulgulit vasram sarke; punn tãnnim-i patt vollun par kaddli, loddai korinastana, eka pattlean êk, sogllech pollun gele, kiteak tancho sotianas zavpacho dis pavlo, tankam khast lavpacho vêll ailo.
22. Dusmanachi fouz nettan fuddem sorta, ran marpiam bhaxen kuraddi gheun Ejiptacher akromonn korunk ieta, tedna sôrsôr korun dhanvtolea sorpa bhaxen Ejiptkaranchi fouz pollun veta.
23. Rigunk zaina titlem dhatt zalem zalear-ui tãnnim Ejiptachem ran katrun uddoilem. Uloita to Sorvespor! Te tollam-vôn chodd, tanchi sonkia mezunk zaina ...
24. Ejiptachê porjechi abru ubon geli, Ut'torechea eka lokachê adhin tika keli.
25. Sorvsoktivont Sorvespor, Israelacho Dev, oxem sangta: 'Polleiat, No ganvchea Amon devak, Faraohk, Ejiptak, tachea devank, tachea razank, Faraohk ani tacher visvas dovortoleank, Hanv khast laitolom.
26. Tacho prann kaddunk sôdtat tanchê svadhin Hanv tankam kortolom, mhonngê Babiloniechea raza Nebukadnezzarachê ani tachea senapotinchê svadhin. Punn adlêch porim Ejiptant lôk novean ravunk lagtolo. Uloita to Sorvespor!
27. Punn Jakoba, Mhojea sevoka, bhieum naka! Israela, akantum naka! kiteak, polle, Hanv tuka poixilea desantlo, soddoitolom, toxench tujê sonstik koidi korun vhel'li tea desantli Hanv tika mukt kortolom. Jakob porot ietolo ani xantin jietolo; to surokxit astolo, taka anink konn tras diuncho na.
28. Jakoba, Mhojea sevoka, bhieum naka, uloita to Sorvespor! kiteak Hanv tujea sangata asam. Jea sogllea raxttramnim Hanvem tuka dhanvddail'lo, tancho Hanv sarkoch vinas kortolom; punn tuzo mat Hanv vinas korcho na. Hanv tuka moriadin xist xikoitolom, khast lainastana tuka sarkoch sôddchona.
