1. Judacho raza, Josiacho put Jehoiakim’ hachê razvôttkechea chovthea vorsa (mhonngê Babiloniecho raza, Nebukadnezzar, hachê razvôttkechea poilea vorsa) Judachea sogllea loka vixim Jeremiasak utor pavlem.
2. Jeremias provadian Judachea sogllea lokak ani Jerusaleant ravtolea somestank tem porgôtt kelem:
3. ‘Judacho raza, Amonacho put Josia, hachê razvôttkechea teravea vorsa thaun tem aiz porian tevis vorsam Sorvespor mhojê lagim uloit asa, ani hanv tumkam thar ghenastana Tachem utor sangit ailam, punn tem tumi mandun gheunk na.
4. Tea bhair, Sorvesporan sogllea Aplea sevokam provadiank, eka pattlean êk, tumchê-xim dhaddun dile, punn tumi tanchem aikolem na, tankam chit diunkuch na.
5. Ho êkuch tancho sondêx aslo: “sogllim tumi tumchê khottê chalintlim koddsorat ani tumchea khottea kortubank patt korat; oxem korxat zalear, zo dês Sorvesporan tumkam ani tumchea purvozank purvim dil’lo, tantunt tumi sodankal ravtoleat.
6. Heram devanchi seva korunk ani tankam bhôzunk tanchê pattlean vochum nakat; tumchea hatamnim kel’lea murtimnim Mhaka tiddoum nakat; fokot tedna Hanv tumcher xikxa dhaddcho na.
7. Punn tumi Mhojem aikunk na, — uloita to Sorvespor! — punn tumchea hatamnim kel’lea murtimnim tumi Mhaka tiddôk haddlea, ani oxem tuminch tumcher hem noxtt haddlam.”
8. ‘Hea pasot Sorvsoktivont Sorvespor oxem mhonntta: “Tumi Mhojem aikunk na mhonn
9. Hanv — uloita to Sorvespor! — Ut’torechea sorv kullank ani Mhojea sevoka Nebukadnezzarak, Babiloniechea razak, apoun haddtolom ani tankam hea desacher ani thoim ravtoleancher (ani bhonvtonnchea sorv raxttrancher) zhuz korunk dhaddtolom. Hanv tancho sarko nas kortolom ani tankam lokak xirxiro haddta toslo zago ani kenddnniancho mhal korun sorvkallak tanchem nisontton kortolom.
10. Tanchê modle anondache ani khuxaliche soglle ul’las Hanv kaddun uddoitolom, ani toxench hoklê-novreachea lognachim sontosachim gitam aikum ieunchim nant, dantear bosun pitt dollunk dhanno ascho na, ani ponnttiô pettounk tel aschem na.
11. Ho sogllo ganv padd zatolo ani osadd poddtolo ani him raxttram sot’tôr vorsam Babiloniechea razachea gulam’ponnant astolim.
12. Punn sot’tôr vorsam bhòrlea uprant Babiloniechea razak ani tea raxttrak, tãnnim kel’lea vaitt kortubank lagun, Hanv khast laitolom. — Uloita to Sorvespor! — Mhonngê Kaldeikaranchea desak khast laitolom ani tea desachi sarkich dêsvatt korun sôddtolom.
13. Hanv tea raxttram virudh uloilam tim sogllim dhomkavnnechim utram — hea pustokar boroun dovorlolim asat tim — Hanv palltolom.” ’
14. Sogllea raxttram add Jeremiasan dil’le sondex te he: (‘Him sogllim ap–aplê pallien podvedar raxttranchea ani vortea razanchea gu-lam’ponnant poddchim asat ani tanchea kortubank ani tanchea hatanchea vavrak favo ti khast Hanv laitolom.’)
15. Kiteak Sorvesporan, Israelachea Devan, mhaka oxem sanglem: ‘Mhojea krodhan bhòrlolem dakam-soreachem hem patr ghe, ani Hanv tuka pattoin titleam-i raxttrank tem pieunk di;
16. tea patrantlem tim pietolim ani lòktolim ani soiranna bhair poddtolim, kiteak tanchê modem Hanv torvar dhaddcho asam.’
17. Sorvesporachea hatantlem hanvem tem patr ghetlem ani, jea sogllea raxttram-xim Sorvesporan mhaka pattoilo, tankam hanvem pieunk dilem.
18. (Jerusaleak ani Judachea nogrank, tanchea razank ani fuddariank hanvem pieunk dilem; oxem tanchem nisontton zatolem, tim lokak xirxiro haddta tosli vôst ani bemanacho mhal zatolim, ani tanchem nanvuch xirap ghalpachem nanv zatolem. Khorem mhollear, oxench atam ghòddta.)
19. [Hea patrantlem pielim tea heram soglleanchi volleri hanga asa:] Faraoh, Ejiptacho raza, tache subedar ani fuddari; Ejiptacho sogllo lok
20. ani Ejiptant ravpi soglleo porkeo porza; Uz desantle soglle raza; Askelon, Gaza, Ekron ani Ashdodachem kitem ozun urlam tem, hea Filistikaranchea nogranche raza;
21. Edom, Moab ani Am'monacho sogllo lok;
22. Tirache ani Sidon'che soglle raza; Bhuim-modlea Somdirantlea zunveanche raza;
23. Dedan, Tema ani Buz hea nogranche raza; aplem mathem taslole soglle lok;
24. Arabieche soglle raza; oronneant ravtolea kullanche soglle raza;
25. (Jimri,) Elam; ani Media hanche soglle raza;
26. eka pattlean ek Ut'toreche, aixile poixile soglle raza; ekach utran, prithumer aslolea sogllea raxttrank tea patrantlem pieunchem poddlem. (Soglleanchêch pattlean Sheshakacho [Babiloniecho] raza hea patrantlem pietolo.)
27. ‘[Tedna Sorvesporan mhaka sanglem:] “Sorvsoktivont Sorvespor, Israelacho Dev, oso tumkam hukum’ ghalta: Pieiat! Bebde zaiat! Magir onkun bhair uddoiat! Tumchê modem Hanv dhaddcho asam tê torvarichea dhopkean aptton poddat, ani portun anink utthum nakat!”
28. Zôr tujea hatantlem patr gheunk ani pieunk tim raxttram pattim sortit, tum tankam sang: “Sorvsoktivont Sorvespor oxem sangta: Tem patr tumi pieunkuch zai!
29. Polleiat, jem xar Hanvem Mhojem korun dovorlam, teach xarant Hanv Mhozo nisontton korpacho vavr suru kortam. Toxem zalear, tumi hê khasti vinnem urtoleat mhonn dista tumkam? Na, oxem kednanch ghòddchem na! Khastintlim tumi kodinch suttchim nant, kiteak prithumechea sogllea lokam virudh Hanv zhuz dhaddunk vetam. Uloita to Sorvespor.”
30. ‘Tum, [Jeremias,] him sogllim utram tankam porgôtt kôr; tankam oxem sang: "Aplea unch sthana thaun Sorvespor gorozta, Aplea povitr nivasa thaun To ghoddghoddta, Aple porje add To gorozta, dako molltat tanche bhaxen desant ravtolea somestam add To arodd ghalta.
31. Prithvechea ximam porian Tacho avaz gazta. Kiteak Sorvespor raxtrancher arop ghalta, ak'khea mon'xakullak mon'subek apoita: noxtteancho zhuzant To prann kaddta. Uloita to Sorvespor!
32. Sorvsoktivont Sorvespor oxem sangta: Polleiat, eka raxttra thaun dusrea raxttrak noxtt vistaron veta, prithvechea poixilea ximam thaun ek bhirankull tufan voir sorta.
33. “Sorvesporan marun uddoileant tim tea disa sonvsarant xekan’xek ximpoddtolim. Tanchê pasot konn rudon korchim nant; tankam konn ektthaim korchim nant ani purchim-i nant; xenna bhaxen tim zomnir patllail’lim astolim.
34. Fuddariamno, arddat-kirddat, hueli-bobo marat! hinddachea gonvlliamno, dhullint lollat, kiteak venchlolea menddream bhaxen tumkam marun uddovpache dis pavle ani tumi xevtton poddtoleat.
35. Fuddariank porian asro ascho na, hinddachea dhoniank pollun vochunk mellchem na.
36. Aikat! Porjeche fuddari arodd ghaltat to aikat, hinddache dhoni killonch martat ti aikat!
37. Kiteak Sorvesporan Aplea zolltea krodhan tumchea desachem nisontton kelam, ani tumchea xant ganvachi desvatt korun soddlea.
38. Xinv aple dholintlo bhair sorla, desvatt kortolea zhuzan, ani Tachea bhoikor krodhan tancho des atam sarko padd zala.
