1. Sorvesporan Jeremiasak sanglem:
2. Utth ani kumbarachea ghora denvun voch, ani Hanvem sangchem asa tem thoim tuka sangtolom.'
3. Mhonnttôch hanv kumbarachea ghora denvun gelom. Thoim to aslo ani aplem chokr gheun kam kortalo.
4. To kortalo tem matiechem aidon bigddun gelem; kumbar chikonn mati gheun kam korta tedna kedna-kedna oxem zata. Mhonnttôch tannem novean suru kelem ani ti chikonnmati gheun apnnak zai toslem dusrem ek aidon kelem.
5. Tedna Sorvespor oso mhojê lagim uloilo:
6. Israelachea Ghorannea, hea kumbaran kelem toxem tuka korunk Mhaka hôk'k na? Uloita to Sorvespor! Hôi, Israelachea Ghorannea, zoxi chikonnmati kumbarachea hatant, toxem tum Mhojea hatant.
7. Kedna-kedna ek raxttr vô ek raj Hanv umttun kaddtolom, môddun uddoitlom ani tacho nas kortolom mhonn Hanv sangtam.
8. Punn jea raxttrak Hanvem dhomkavnni dil'li, tem aplem khotteponn sôddun diit zalear, Hanv Mhojem mon bodôltolom ani tacher dhaddcho aslom tem orixtt Hanv dhaddcho na.
9. Urfattim, kedna-kedna omkem raxttr vô raj Hanv bandun haddtolom ani omkea desant taka rovun tem thir kortolom mhonn Hanv sangtam;
10. punn tem raxttr Mhaka mandna tem korit ani Mhojea talleak kan diunk kobul na zait zalear, tedna Hanv Mhojem mon bodôltolom ani tacher axirvad ghalunk ievjil'lo to tacher ghalcho na.
11. Tôr atam Judachea lokak ani Jerusaleant ravtoleank oxem sang: "Sorvespor oxem sangta: Aikat, tumcher orixtt dhaddunk toiar zatam, tuka khast lavunk êk ievzônn Hanv manddtam. Mhonnttôch tumkam ek-ekleak ani êk-êklek sangtam: tumchi khotteponnachi vatt sôddun diat, tumchi vagnnuk ani tumcheô kornniô bôdlat."
12. Punn tim mhonnttolim: "Koslo faido? Amkam zai toxem ami kortoleanv, amcheô patki vondôvnniô amkam addun vhortat tê vatten sogllim ami cholot ravtoleanv." '
13. Hea pasot Sorvespor oxem sangta: 'Raxttram modem vicharun polleiat: osli vôst kedna tori adim ghòddlea zait? Israelachê porjen ek kanttalleachem kortub kelam!
14. Lebanonachea khoddpi dongrancher kedna tori borof na mhonn asa? Pordexi desantleô nodi ani tanchim thondd vhanvtim udkam kedna tori sukun vetat kai?
15. Tori Mhoji porza Mhaka visrun geli! Koslench mol naslolea kud'dea devank ti dhump lasta! Vatter, magam thaun xikoil'lea rosteancher, tika adllon poddo-xi keli, ani atam ti dusrê vatten cholun veta: hi vatt tika khoim pavoitoli ti konnak khobor na!
16. Oxem tinnem aplo dês kanttalleachi vôst korun sôddla, taka kela sodankal togpacho lokank kenddnniancho mhal! Hem sogllem polleun ietea-vetea soglleank boroch dhokko bostolo, ani tim thottak zaun tokli haloit vetolim.
17. Udentechea varean uboil'lê dhulli vori Hanv tankam tanchea dusmanam mukhar zollim-mollim ximpddaitolom. Tancher orixtt denvta tea disa Hanv tankam Mhojem tondd dakhouncho na, Mhoji patt dakhoitolom.'
18. Tãnnim mhollem: 'Cholat, Jeremiasacher add guddmêll korum-ia! Somurtichi xikovnn amkam diunk iadnik amkam sodam astolech, amkam budh diunk zannar monisui astole, ani toxench Devacho sondêx amkam kollit korunk provadi komi zaunche nant. Cholat, tacher ami boglanttam ghalum-ia; to sangta taka ami chit diunchench nhoi.'
19. [Tedna oxem hanvem prarthon kelem:] Mhaka chit di, Sorvespora, mhoje dusman kitem sangtat tem borê bhaxen aik.
20. Borem kelam tem vaittan farik korchem? Tori mhaka tãnnim êk fôndd khonnla. Tankam favo asloli Tuji khast tanchê thaun pois korunk tanchê pasot hanvem Tuka vinoti kelea mhonn ugddas dhôr.
21. Punn atam tanchea bhurgeam-ballank upaxim morum-di, vô tankam zhuzant morum-di. Tancheô bailô vidva zaum-di, tanchim bhurgim-i nanch zaum-di: tanche ghov piddê-xidden morun vochum, ani tanche tornnatte zhuzant torvarin tôpun vochum.
22. Tanchim ghoram luttunk okosmat luttmareank dhadd, ani tedna tancheô bobô-hueli aikum ieum-di. Kiteak tãnnim mhaka sampddaunk êk fôndd khonnla, mhoje pãi ghuspon poddunk tãnnim fas manddleat.
23. Punn, Sorvespora, mhaka jivexim marunk te guddmêll kortat mhonn Tuka bori khobor asa. Tancho guneanv bhogsum naka, Tujê nodrê mukhar tanchem patok sodanch urum-di. Tujê mukhar tankam xevttun uddoi, Tum ragar astanch tankam xikxa lai.
