1. Tedna Sorvesporan Jeremiasak sanglem: 'Voch ani kumbarachem ek matiechem gurgulet viktem ghe. Lokachea kãi zannteank ani kãi iadnikank tujea vangdda ghe.
2. Koilancho Darvontto kaddun laginch aslolea Ben-Hin'nomachea Falkea-xim voch. Thoim ravun Hanv tuka sangtolom tim utram porgôtt kôr.
3. Tunvem oxem sangchem: "Judachea razamnô, Jerusaleant ravtoleamnô, aikat! Sorvesporachea utrak kan diat! Sorvsoktivont Sorvespor, Israelacho Dev, oxem sangta: Hea zagear Hanv oslem orixtt dhaddcho asam ki tachi khobor aikotolea soglleank dhok'ko bostolo.
4. Kiteak tãnnim Mhaka sôddun dilo ani ho zago sarkoch bhoxttailo. Kud'dea devanchea manak tãnnim hanga dhump lasla: hea devanchi tankam khoboruch nasli, nhoi mhonn tanchea purvozank vô Judachea razank. Niropradhi mon'xanchea rogtan tãnnim ho zago bhôrla;
5. kiteak apleanch bhurgeancho hôm' korun Baalak bhettounchê khatir, Baalachea manak tãnnim unch sthanam ubarleant. Hanvem kodinch oxem korunk tankam adnia diunk na, tachi gozal Hanvem korunkuch na, Mhojea monant porian tem kednanch ieunk na.
6. Dekhun Tofet vô Ben-Hin'nomachem Falkem hem nanv hea zageak lôk anink diuncho na, osle dis ietat, uloita to Sorvespor! punn lôk hea zageak Jivexim Marpachem Falkem mhonnttolo.
7. Judachea ani Jerusaleachea lokak zannvaiecheô ievzonnô astit, punn teô soglleô hea zagear Hanv fiskottaitolom; tanchea dusmanank Hanv tancher zoit vhorunk ani zhuzant tancho jiv kaddunk ditolom. Tanchim pretam mollbachea suknneank ani prithvechea savzank khaunk ditolom.
8. Ani hem xar lokak xirxiro haddta toslo zago ani kenddnniancho mhal zai-xem kortolom. Hea xarachem Hanv oxem nisontton kortolom ki ietea-vetea soglleank tem polleun dhok'ko bostolo ani thottak zaun tim fivnni ghalit vetolim.
9. Tanche dusman xarak veddho ghaltole ani tancho jiv kaddunk soglle upai ghetole; ho veddho bhôgun tanchi poristhiti itli vaitt zatoli ki, khavunk kãi na zaun, tim ekamekak khaunk lagtolim ani apleanch putanchem ani dhuvanchem porian mas khaunk pattim sorchim nant."
10. [Tedna Sorvesporan mhaka sanglem:] 'Tujê borabor gel'le tea mon'xam hujir tem matiechem gurgulet fôdd
11. ani tankam sang: "Sorvsoktivont Sorvespor oxem sangta: Kumbarachem gurgulet fôddtôch tem anink sarkem korunk xokona, têch bhaxen hê porjek ani hem Xar Hanv fôddtolom. "Nikhipinneacho dusro zago na zaun, Tofet nikhêp-zago zatolo.
12. Oso Hanv hea zageak kortolom. Uloita to Sorvespor. Hea Xarak ani tantunt ravtoleank Hanv Tofeta sarkim kortolom.
13. Jerusaleantlim ghoram, Judachea razanche nivas ani khorench mhollear zanchea pattsancher mollba velea noketrank ani porkea devank pivonnam orpilim tim sogllim ghoram Tofeta bhaxen bhoxttol'lim zatolim. " '
14. Uprant Jeremiasak Sorvesporan Tofet Falkeant bhakit korunk pattoil'lo thoim thaun to portun ailo, ani Sorvesporachea Mondirachea angnnant ubo ravun tannem sogllea lokak ho sondêx dilo:
15. Sorvsoktivont Sorvespor, Israelacho Dev, oxem sangta: "Hea Xaracher ani tache bhonvtonnchea sogllea nograncher Hanvem tharail'lem tem noxtt Hanv atam dhaddunk vetam; kiteak tim apleach vadeachim zalim ani hott'ttiponnan Mhojem utor tãnnim aikunk na. " '
