1. Ejiptant jietolea sogllea Judeikaram khatir, mhonngê, Migdol, Tapanes, Nof nogramnim ani Patros vattarant jietalim tanchê khatir hem Sorvesporachem utor Jeremiasak pavlem:
2. Sorvsoktivont Sorvespor, Israelacho Dev, oxem mhonntta: "Jerusaleacher ani Judachea sogllea nograncher Hanvem noxtt dhaddlam tem tumi dekhlam; tanchem aiz nisontton zalam ani thoim konn anink ravona.
3. Oxem kiteak zalem? Kiteak tãnnim khottim kortubam korun, mhonngê porkea devank dhump lasunk vochun ani tanchi seva korun tãnnim Mhozo kinv choddoilo; hea devank tim, nhoi mhonn tumi, nhoi tumchim purvozam vollkhoch naslim.
4. Tori husko dhôrun, thar ghenastana, Hanvem Mhojea sevokam provadiank tumchê-xim oxem sangunk pattoile: Hi kanttalleachi vôst korum nakat, ticho Hanv dvês kortam.
5. Punn tãnnim kan diunkuch na, lokx lailench na; aplim khottim kortubam chaluch dovorlim, ani porkea devank dhump bhettounchem soddunkuch na.
6. Hea pasot, Mhozo zollto krôdh Judachim nogram ani Jerusaleache roste lasun gelo ani tanchem nisontton zalem ani tim padd zaunk pavlim; aiz porian tim oxinch asat.
7. Ani atam, Sorvsoktivont Sorvespor, Israelacho Dev, oxem mhonntta: Oslem noxtt tumcher kiteak mhonn tumi haddunk sôdtat? Judachea Ghoranneantlim dadleank, bailank, bhurgeank ani dudachea ballank tumi nanch kortoleat tumchê sonsticho konnuch urcho na!
8. Kiteak tumchea kortubamnim tumi Mhozo krôdh pettoitat, Ejiptachea desant tumi ravunk aileant, ani hanga dhump bhettoun porkea devank tumi bhôztat! Tumchench nisontton magun prithvê voilea sogllea raxttrank tumi êk xiraploli zat ani lokank kenddnniancho mhal zaunk sôdtat?
9. Judachea desant ani Jerusaleachea rosteancher, tumchea purvozamnim, tumchea razamnim ani tanchea potinimnim, ani xekim tuminch ani tumchea potinimnim kel'lim khotteponnam tumi visorleant kitem?
10. Aiz porian tãnnim khalteponnan aplo guneanv vollkhun gheunk na, nhoi mhonn bhirant dhôrunk na, tumkam toxench tumchea purvozank Hanvem dil'li Somurt vô nem'-kaide tãnnim pallunk nant.
11. Hea pasot Sorvsoktivont Sorvespor, Israelacho Dev, oxem mhonntta: Polleiat, Tumcher noxtt dhaddunk Hanvem tharailam ani Judacho Hanv sarkoch nas kortolom.
12. Ejiptak vochun thoim ravunk nirnnoi ghetlolea Judachea urlolea zomeak kitem kortolom tem Hanv zannom. Ejiptant tancho sotianas zatolo: tim sogllim, lhanam toxim vhoddam, Ejiptant torvarin vô bhuken morun vetolim; torvarin vô bhuken tim khorench mortolim, ani lokak kanttallo ani xirxiro haddta tosli vôst, Hanvem xiraploli zat ani kenddnniancho mhal zatolim.
13. Torvarin, dukollan ani piddê-xidden Hanvem Jerusaleak xikxa dil'li toxich, Ejiptant ravtoleank xikxa ditolom.
14. Ejiptant ravunk ravlolea Judachea urlolea zomeantlo eklo monis porian suttcho na; Judachea desant portun vochunk ani jieunk tim axetat, punn tanchê modlo eklo monis porian jivo urun suttcho na ani thoim portun pavcho na. Kiteak pollun ieun asro magunk ail'lea thoddeam zannank bhairaun, tanchê modlim konnuch portun vechim nant. " '
15. Aplea potinimnim porkea devank dhump vôpla mhonn tanche ghov zanno asle, ani atam teô thoinsoruch ubeô asleô; tancho motto zomo aslo, tea bhair Ejipt desant Patros ganvant ravtalo to sogllo lôk-ui thoim aslo; tea vellar tãnnim soglleamnim Jeremiasak oso portipall kelo:
16. Tum Sorvesporachea nanvan amkam atam uloilai tem utor aikunk ami kobul nanv.
17. Punn jem soput gheun ami korunk tharailam, tench ami korit ravtoleanv: hem amchem mon. Ami ani amchim purvozam, amche raza ani amche fuddari Judachea nogramnim ani Jerusaleachea rosteancher Sorgachê Ranniek dhump vôptaleanv ani tichea manak pivonnam orpitaleanv; zoxem ami adim kortaleanv, toxench ami korit ravtoleanv. Tedna amkam pott-bhôr jevonn melltalem ani ami khuxal jietaleanv ani koslench vaitt-vignn amcher ieunk naslem.
18. Punn Sorgachê Ranniek dhump vôpcho ani tichea manak pivonnam orpunchem bond kortôch ami lachar zaleanv ani torvarin vô bhuken meleanv.
19. Tea bhair, bailamnim mhollem jedna ami Sorgachê Ranniek dhump vôptanv ani tichea manak pivonnam orpitanv, tedna tantum amchea ghovancho hat nastana tichea manak ami tichem rupnnem ghalun bhakriô bhaztanv ani pivonnam orpitanv mhonn dista tuka?
20. Sogllê porjek, dadleank ani bailank, taka hê bhaxen zobab ditolea somestank, Jeremiasan oso portipall kelo:
21. Zo dhump tumi Judachea nogramnim ani Jerusaleachea rosteancher vôplo, mhonngê tuminch, tumchea purvozamnim, tumchea razamnim, tumchea fuddariamnim ani desachea sorv lokan vôplo: hacho Sorvesporak ugddas ieun ieun, hem sogllem Tachea monant choddot gelem; ani Taka itli vitt disli ki
22. tumchim vikott kortubam ani tumchim kanttalleachim kamam Tachean anink sôsunk zaina zalem; hea pasot tumcho dês aiz zaunk pavla konnuch thoim anink ravona toslem ek ghorttann, soglleank xirxiro haddta toslo zago, ani lôk tachem nanv gheun xirap ghalta tosli svat.
23. Dhump vopun tumi Sorvesporacher add patok kelem, Sorvesporachea utrank bhere kan kele, Tachi Somurt, Tache nivadde ani nirnnoi mandun gheunk na; haka lagun tumi atam bhôgtat tem vign tumcher denvlam.
24. Uprant Jeremiasan sogllê porjek, ani odik-korun sogllea bailank, mhollem: 'Ejiptant ravtolea Judeikaramnô, tumi sogllim Sorvesporachea utrak kan diat:
25. Sorvsoktivont Sorvespor, Israelacho Dev, oxem sangta: "Jem tumi ani tumchea bailamnim tonddan bhasailem, tem tumchea hatamnim khorench pall'lem! Tumi sanglolem: ami kel'leô angovnnô ami zotnaien palltoleanv ani Sorgachê Ranniek dhump vôptoleanv ani tichea manak pivonnam orpitoleanv! Borem tôr, tumcheô angovnnô pallat, teô zotnaien samballat.
26. Punn Ejiptant ravtolea Judeikaramnô, sogllim Sorvesporachea utrak kan diat: Mhojeach vortea Nanvan oso soput ghetam mhonntta Sorvespor: ak'khea Ejiptachea desant Judantlo eklo-i monis Mhojem Nanv anink kednanch ucharcho na; Jivea Sorvespora Dhoniachean! oxem konnuch mhonncho na.
27. Polleiat, Hanv tancher Mhozo dollo dovrunk vetam, tankam borem korunk nhoi punn tanchem nisontton korunk, ani Ejiptant ravtolim sogllim Judeikaram torvarin vô bhuken mortolim, ani akherek tim nattak zatolim.
28. Tori torvarintlim sutton Ejiptant thaun Judachea desant thoddim zannam portotolim. Tedna Ejiptant ieun ravlolo Judacho ak'kho urlolo zomo konnachem utor Mhojem vô tanchem sakar zalem tem zanno zatolo.
29. "Ani Hanv tumkam êk khunna ditam uloita to Sorvespor! : heach zagear Hanv tumkam xikxa laitolom; oxem jea utramnim Hanv tumkam dhomkaitalom, tim utram pallon ietolim.
30. Sorvespor oxem mhonntta: Polleiat, Nebukadnezzar, Babiloniecho raza, Judachea raza Zedekiacho dusman aslo ani koxê-i bhaxen tacho jiv kaddunk ravtalo; Zedekiak Hanvem tachê svadhin kel'lo; toxench atam Hofra Faraohk, Ejiptachea razak, tachea dusmananchea hatant ghaltolom ani tacho prann kaddlea bogor ravche nant tanchê adhin kortolom." '
