1. Tum bhov nitivont, Sorvespora! Tujê lagim vad korunk hanv konn? Tori niti vixim Tujê lagim êk vad korchoch poddtta mhaka: Kiteak mhonn khottea mon'xanchem sogllem borem zata? Ghatki mon'xank koxem mhonn ies mellta?
2. Tunch tankam roitai, ani tim pallam ghetat; tim vaddtat-mattat ani follam diit asat. Tujem Nanv sodanch tanchea onttancher asa, punn tanchea kallzant tem nanch!
3. Tum mhaka vollkhotai, Sorvespora; hanv kortam titlem-i Tujea dolleam mukhar asa. Mhojea kallzacho Tum tthav ghetai, kitli hanv Tuji bhokti kortam tem Tum zannoi. Menddrank marunk bhair kaddtat, toxench Tum tankam oddun hor, tankam marun uddoitoloi to dis pavo-sôr tankam kuxin kaddun dovor.
4. Kitlo kall mhonn amcho dês suko-korddo urtolo? ani kedna porian sogllêch kodden xetantlem tonn sukun vetolem? Amchea lokachea khotteponnak lagun mon'zati ani suknnim morun vetat. Tim mhonnttat: 'Amchim khottim kortubam khoim mhonn Devak dixtti poddtat?'
5. [Sorvesporan mhollem:] 'Jeremias, pãiamnim choltat tanchê pattlean vochun tum thoktai, tôr ghoddeam pattlean koso mhonn dhanvtoloi? Uktea moidanar tum aptton poddtai tôr, Jordanachea zongllamnim kitem mhonn kortoloi tum?
6. Sogllim, tujim bhavbhoinn porian, tujeach kuttumbachim mon'xam, tuzo ghat ghetat; tujê pattlean tim ukteponnim tujer add uloitat. Godd-godd porian utram gheun tujê-xim ietit zalear, tankam patieum naka!'
7. [Sorvespor mhonntta:] Mhojea Israelachea Ghoranneak Hanvem patt kelea, Mhojem venchlolem raxttr Hanvem sôddun dilam Mhojea mogachê porjek tichea dusmananchê adhin Hanvem kelea.
8. Mhoji venchloli porza Mhojer portoli, ranantlea xinva bhaxen Mhojer gorozun aili; dekhun ti Mhaka kanttalleachi zali.
9. Mhojem venchlolem raxttr ek vividh ronganchem suknnem zalam dista: soglleanch vattamnim kavlle tika tonchun khaunk ietat. Cholat, sogllea savzank zoma korat, pott-bhôr jevun dhadoxi zaunk tankam apoiat.
10. Zaitea porkea razamnim Mhojea dakam-molleacho nas kelo; Mhojim xetam-mollam tãnnim pãiam ponda mostileant, Mhozo opurbaiecho ganv oronnem korun sôddla.
11. Hôi, tãnnnim ho Mhozo dês osadd kela; osadd zaun to Mhojea pãiam-xim roddta. Sogllea desachem ghorttann zalam, ani hachi konnuch porva korina.
12. Oronneantlea sogllea khorddeam dongram voilean lutt marpianchem penddem dhanvim ailam. Hanvench, Sorvesporan, ak'khea desachi desvatt korunk zhuz pettoxem kelam; xekan'xek desant khoinchêch rochnnek xanti na.
13. Tãnnim roilo gonv, punn lunvle kantte. Tãnnim koxtt kele, punn sogllem nirfoll zalem. Mhojea zolltea krodhak lagun tanchea xetank pikuch na.
14. Sorvespor oxem sangta: 'Mhojê porjê Israelak Hanvem daiz koxem dês dil'lo; tacho nas kela tea sogllea tichea khottea xezariank, oxem sangtam: Polleiat, tankam ap-aplea desantle umttun kaddtolom, ani uprant Judachea Ghoranneak tanchê modlem Hanv kaddtolom.
15. Punn ekdam tankam oxem umttun kaddlea uprant, Hanv novean tanchi doia kortolom ani zonn-ekleak portun ap-aplea daizachea vantteant ani desant portun pavoitolom.
16. Tim Mhojê porjecheô vattô xiklim zalear, ani zoxem tãnnim Mhojê porjek Baalachem nanv gheun soput gheunk xikoilam, toxem "Jivea Sorvesporachean" soput ghetlo zalear, tedna Mhojê porjechea kuttumbam modem tankam-i lêkhtolom.
17. Punn khoinchem-i raxttr Mhojem utor aikunk kobul na zalear, taka mulla soit umttun uddoitolom ani tacho nas kortolom. Uloita to Sorvespor!'
