1. Jerusaleachea rosteamnim hêvtten-têvtten bhonvat, chotraien polleiat atam ani chovkoxi korat: neainit korta ani sot sôdta toslo êk tori monis tichea chovkamnim mellot zalear Hanv tika bhôgxitolom.
2. Uloita to Sorvespor! 'Sorvesporachea jivachean' oxem tim soput ghetat khorem, punn tancho soput khotto.
3. Sorvespora, Tuje dolle sot sôdinant tôr? Tunvem tankam mar diloi, tori tankam dukh bhògli na. Tunvem tancho nas keloi, kiteak tãnnim apli chuk vollkhun ghetli na. Aplim tonddam tãnnim khoddpa-vôn nibor kelim; mon bodlunk tim raji na zalim.
4. Tedna hanvem mhollem: 'Tim dolldirim ani ok'kol-naslolim! Sorvesporachea vattanchi, aplea Devachea nemanchi, tankam vollokh na.
5. Dekhun mha-zonnam sorxim vochun hanv tanchê kodde uloitolom, kiteak tankam Sorvesporachea vattanchi ani aplea Devachea nemanchi vollokh astolich.' Punn hãnnim-i toxench zum môddlem ani bandpas tôddle.
6. Hea pasot, ranantlo xinv tankam girastolo, vonantlo landdgo tankam khaun uddoitolo, bibtto vagtanchea nogram bhonvtim doddeak ravtolo, ani tantlim bhair sortat titleank-ui pisddun to tancheô vadriô kortolo. Tanchea khub pradam ani hixôb-naslolea ovisvaxiponnam khatir hem oxem ghòddtolem.
7. Koso mhonn Hanv tuka mafi dium? Tujea bhurgeam-ballamnim Mhaka patt vôll'li ani dèvuch nhoi tanchea nanvan tãnnim soput ghetlo. Hanvem tankam pott-bhôr jevunk dilem, punn tãnnim pordvar kelo ani vesvanchea ghorachi vatt dhôrli.
8. Khaun-jevun moste zal'lea anddel-ghoddeam bhaxen, zonn-eklo peleachê bailechê axen uchambôll zata.
9. Oslea kortubank Hanv khast lavcho na? uloita to Sorvespor! Oslea raxttracho Hanv sudd gheuncho na?
10. Tanchea unchlea dakam-molleancher choddun vochat ani tancho vidvas korat, punn tancho sarko sotianas korum nakat! Tancheô khandiô katrun uddoiat, kiteak teô Sorvesporacheô nhoi!
11. Israelachem Ghorannem ani Judachem Ghorannem, kitlim mhonn ghatki zaleant! Uloita to Sorvespor!
12. Sorvesporak tãnnim sôddun dila ani mhollam: "To konn nhoi; amcher kãi vaitt ieunchem na, zhuz ani dukôll ami polleunchim nanv.
13. Ani provadi fokot varem; tanchê sovem Sorvesporacho sondêx nanch; te sangtat tem tankanch ghoddon ieum." '
14. Hea pasot Sorvespor,Sorv soktivont Dev, oxem mhonntta: 'Oxem tim uloileant dekhun, Mhojim utram tujea tonddant Hanv ujea sarkim kortolom, ani hê porjecho zollôv kortolom ani ho uzo tika ulpaitolo.
15. Israelachea Ghorannea, poixilem ek raxttr Hanv tujer upraso-xem kortolom. Uloita to Sorvespor! Togta toslem raxttr tem, purvilem raxttr tem; zanchi bhas tum noklloi, toslem raxttr tem; ani tim kitem uloitat tem tuka somzona.
16. Te soglle bollixtt zhuzari, tanche bann mhollear chukonaslolo fôndd.
17. Tumchem pik ani tumchem jevonn-khann te khatole, tumchea putam-dhuvank te girastole; tumchea gorvam-menddreanche hindd te gilltole, tumcheô dak-vali ani anjirachim zhaddam te khaun uddoitole, tumi tumcho visvas dhôrtat tea durgam-kottanchea nograncho tolvar gheun te nas kortole!
18. Punn tea disamnim porian- uloita to Sorvespor!- Hanv tumcho sotianas korcho na.
19. Ani jedna tumcho lôk oxem vicharit: "Sorvespora amchea Devan hem sogllem amkam kiteak nirmilam?," tedna tumi tankam oso zobab diat: "Zoxem tumi Mhaka sôddun tumchea khaxa desant porkea devanchi seva keli, toxench hea tumcho nhoi tea desant tumi porkeanchi seva kortoleat."
20. Jakobachea Ghoranneant hem prosidh kôr, toxench Juda prantant hem porgôtt kôr:
21. Pixê ani ginean-naslolê porjê, hem aik: dolle asun tumkam disona, kan asun tumi aikonant!
22. Mhoji bhirant tumkam disona? -uloita to Sorvespor!- Hanvuch To doriachi xim tharaunk renv ghalea To; Mhojea sasnnik hukuman doriachean utrunk zaina tosli xim ti; tori Mhojea mureant tumi koddkoddnant? Zori lharam voir sokol sortat, tori tanchean ti xim utrunk zaina; tim gorôz ghaltit, punn tanchean anink fuddem vochunk zaina.
23. Punn hi porza apleach vadeachi ani fitur kallzachi; ti kolpolea ani koddsorun pois-pois sorlea.
24. Tim aplea monant hem-i gholloinant: Sorvespora amchea Devachi ami bhokti korum-ia. Toch amkam nemlolea kallar poilo paus toxench toddio paus dhaddta, ani nemlolim pikavollichim satollim amchê khatir rakhun dovorta.
25. Tumchea khotteponnamnim hê manddavollicho gondhôll kela., ani tumchea patkamnim him dennim addaun dovorleant.'
26. Kiteak Mhojê porjê modem khotte monis asat, xikarek zagrut aslolea bhaxen te mon'xank fas manddtat ani dhôrtat,
27. Zoxem panzrem sovnneamnim bhòrlolem asta, toxim tanchim ghoram luttichea mhalan bhòrlolim asat; dekhun te bollixtt ani girest zaunk pavleat,
28. te bore motte zaleat ani matleat, tanchea khotteponnak xim-mer na; dusreanche hok'k te mandinant, onathanche hok'k te lêkhinant, ani heach pasot te matleat! Goribank te neainit korun dinant.
29. Oslim kortubam kortoleank Hanvem xikxa diunk favo na? -uloita to Sorvespor!- ani oslea raxttracho Hanv sudd gheunchona?
30. Hea desant thottak korpacheô ani kanttallo haddpacheô vostu ghòddtat:
31. Provadi fottkirim bhakitam kortat, ani iadnik apnnank zai toxi zobordosti kortat! Ani Mhojê porjek hem manovta! Punn xevôtt pavtôch kitem kortoleat tumi?
