1. Jeremias provadian Jerusaleant thaun pordesant urlolea zanntteank, iadnikank, provadiank ani Nebukadnezzaran Jerusalea thaun Babiloniek nirvaxi korun vhel'lea sogllea lokak ek potr boroun dhaddlem; tem hanga dil'lem asa.
2. Jekonia raza raz-matek gheun ani izddeam, Judachea ani Jerusaleachea fuddariam borabôr, toxench kamaram ani loharam sangatim, Jerusalea thaun bhair sorlea uprant, hem potr tannem boroilem.
3. Hem potr tannem Shafatachea puta, Elasa, ani Hilkiachea puta, Gemaria kodde diun pattoilem, hankam dogãik-ui Judachea razan, Zedekian, Nebukadenazzar, Babiloniechea raza sorxim dhaddlole. Hea potrar oxem boroil'lem aslem:
4. Sorvsoktivont Sorvespor, Israelacho Dev, Jerusalea san Babiloniek nirvaxi korun vhel'lea soglleank oxem sangta:
5. Ghoram bandat ani tea desant ravat; porsam laiat ani tantum utpon zata tem khaiat;
6. logn zaiat ani putam-dhuvank zolma haddat; tumchea putank hoklô venchun kaddat, ani tumchea dhuvank novre sôdun kaddat; oxem tim-i putank ani dhuvank zolma haddum. Tumchi sonsôt thoim vaddon vochum, tichi sonkia denvum noiê.
7. Tumkam Hanvem nirvaxi korun dhaddleant tea-tea xarachê xanti pasot vavrat; tachê khatir Sorvespora lagim prarthon korat, kiteak mhollear tanchê xanticher tumchich xanti dhòrloli asa.
8. Sorvsoktivont Sorvespor, Israelacho Dev, oxem mhonntta: Tumchê modem asat tea provadiank ani parkhiank tumkam fosounk dium nakat. Tanchea sopnank kan dium nakat;
9. kiteak Mhojea nanvan te tumkam fôtti sangtat. Hanvem tankam dhaddunk nant. Uloita to Sorvespor!
10. Sorvespor oxem mhonntta: Babiloniek dil'lim asat tim sot'tôr vorsam bhòrlea uprant, tumkam Hanv bhett diunk ietolom, ani tumkam xubh bhasavnni kel'li ti palltolom: tumkam hea zagear portun haddtolom.
11. Sorvespor oxem mhonntta: tumchê vixim Mhojea monant asa ti ievzônn Hanv zannom; ti ievzônn mhollear xanti diupachi, noxtt haddpachi nhoi; hi ievzônn tumkam bhorvanxean bhòrlolo boro fuddar samballun dovorta.
12. Tumi Mhojê-xim ieun Mhaka ulo martat ani prarthon kortat tedna, Hanv tumchem aikotolom.
13. Tumi Mhaka sôdtat tedna, Hanv tumkam melltolom; sogllea kallzan Mhaka sôdunk iexat zalear,
14. Hanv tumkam melltolom. Uloita to Sorvespor! Hanv tumkam tumchem dharzonnem portun ditolom, ani jea-jea raxttramnim ani ganvamnim Hanvem tumkam dhanvddaun ximpddailim, tea sogllea raxttrantlim ani ganvantlim bhair kaddun tumkam Hanv novean ektthaim kortolom. Uloita to Sorvespor. Jea desantlim Hanvem tumkam bhair kaddun nirvaxi kel'lim, tea desant Hanv tumkam portun haddtolom.
15. Sorvesporan Babilonient amchê khatir provadi utpon kele' oxem tumi mhonnttat dekhun,
16. atam Davidachea xinvasonar bosla tea raza vixim ani tea Xarant ravtat tea nagrikam vixim, tumchea vangdda nirvasonnant vochunk nant tea tumchea bhavam bhoinnim vixim, Sorvsoktivont Sorvespor sangta tem hem:
17. Hanv atam tancher zhuz, dukôll, pidda-xidda dhaddunk vetam; Hanv tankam khaunkuch zainant toslea kuslolea anjiram sarkim kortolom.
18. Hanv zhuz, dukôll, pidda-xidda gheun tanchea pallank lagtolom. Prithvê velea sogllea raxttrank xirxiro haddta tosli vôst Hanv tankam kortolom; jea raxttramnim Hanvem tankam ximpddaileant tea sogllea raxttrank tim Hanvem xiraploli zat mhonn dakhoitolom; tanchê mukhar kanttalleacho ani kenddnniancho ani moskoriancho mhal tankam korun sôddtolom.
19. Kiteak zori Hanvem thar ghenastana sogllea Mhojea sevokam provadiank tanchê sorxim dhaddle, tori tãnnim Mhojim utram kanar gheunkuch nant, Mhojem utor aikunk tim kobul zalim nant. Uloita to Sorvespor!
20. Punn tumi sogllim, nirvaxitamnô, Jerusalea thaun Babiloniek Hanvem pattoun dileant tim, Sorvesporachem utor aikat!
21. Ahab, Kolaiacho put ani Zedekiah Masheiacho put, Mhojea Nanvan tumkam khotte sondêx ditat; tôr tanchê vixim Sorvsoktivont Sorvespor, Israelacho Dev, oxem sangta: Hanv tankam Nebukadnezzar Babiloniechea razachea tabeant ghaltolom, ani to tankam tumchea khaxa dolleam mukhar jivexim martolo.
22. Zoxem Babiloniechea razan Zedekiak ani Ahabak ujeant bhazlole, toxench Sorvespor tumkam-i korum oslo xirap, tankam favo zal'lea noxibacher dhòrlolo, Babilonient aslolim sogllim nirvaxi Judeikaram vaportolim.
23. Oxem ghòddtolem kiteak tãnnim Israelant ekdom noxttim kortubam keleant: aplea xezarianchea bailamkodde tãnnim pordvar kela ani Mhojea hukuma virêt Mhojem Nanv gheun khotte sondêx dileat. Hanv tôr hem sogllem zannom, Hanvuch tacho sakxi. Uloita to Sorvespor!
24. Ani Nehelamantlea Shemaiak tum oxem sangtoloi:
25. Sorvsoktivont Sorvespor, Israelacho Dev, oxem sangta: tunvem, aplêch budhin, Jerusaleantlea sogllea lokak, Maseiachea puta Jefaniak ani toxench sogllea iadnikank ek potr pattoilãi; tea potracher oxem boroil'lem aslem:
26. Sorvesporachea Mondirant manddavôll rakhunk ani konn-ui piso apunn provadi mhonn dakhoita tosleak khastichea tikttear ghalun ôddunk ani golleak lojechi pott'tti ghalun dovrunk, Sorvesporan tuka Jehoiada iadnikachea zagear iadnik nemla.
27. Toxem zalear, kiteak mhonn tunvem Anathotachea Jeremia-sak xist lavunk naim? to apunn provadi mhonn tumchê mukhar boddai dakhoita.
28. Apunn provadi mhonn sangun tannem Babilonient aslolea somestank oso êk sondêx porian dhaddla: tumi ozun zaitim vorsam pordesant urtoleat; dekhun ghoram bandat, tea desant ravat, porsam laiat ani tanchem utpon khaiat.'…
29. Jefania iadnikan hem potr Jeremias provadiak vachun dakhoilea uprant,
30. hem Sorvesporachem utor Jeremiasak pavlem:
31. Ho sondêx sogllea nirvaxitank dhaddun di: "Nehelamachea Shemaia vixim Sorvespor oxem sangta: Shemaiak Hanvem pattounk na astana, tannem tumkam bhakit kelam ani tumkam fôtticher patieunk pavoileant.
32. Dekhun Sorvespor oxem sangta: Nehelamachea Shemaiak ani tachê sonstik Hanv khast laitolom. Mhojê porjecher Hanv borem haddtolom tem bhôgunk hê porjê modem tachea kuttumbantlo dadlea lingacho konnuch ascho na, kiteak tannem lokak Sorvesporacher kolpunk xikoilam. Uloita to Sorvespor! " '
