1. Sorvesporan mhaka oxem ek dorxon dilem: anjiranche don panttule Sorvesporachea Devmondirachea fuddeant dovorlole asle. Babiloniechea raza Nebukadnezzaran Jekoniak, Jehoiakimachea putak, Judachea razak, ani tachê borabôr Judachea vhoddam-vhoddam mon'xank, loharank ani dhatuchea karagirank Jerusaleant thaun Babiloniek nirvaxi korun vhelea uprant hem ghòddlem.
2. Poilea panttuleant borim borim anjiram aslim, rokddinch piktat toslim; dusrea panttuleant ekdomuch vaitt anjiram aslim, itlim vaitt ki tim khavpak upkaronaslim.
3. Sorvesporan mhaka mhollem: 'Jeremias, kitem dekhtai tum?' 'Anjiram',- hanvem oso zobab dilo- 'borim tim ekdom borim, ani vaitt tim ekdom vaitt, itlim vaitt ki tim khavpak upkaronant.'
4. Tedna Sorvesporan novean mhaka mhollem:
5. Sorvespor, Israelacho Dev, oxem sangta: "Hea zagear thaun Hanvem Kaldeikaranchea desant nirvaxi korun dhaddlolim Judachim mon'xam borea anjiram sarkim; Hanv tanchi kallji ghetolom ani tanchea boreak vavurtolom.
6. Tanchea boreponna khatir Hanv Mhozo dollo tancher dovortolom ani tankam hea desant porot haddtolom; tanchem raj novean bandun haddtolom, tem môddun uddouncho na; tankam thoim thir roitolom, umttun unddouncho na.
7. Hanv Sorvespor mhonn vollkhun gheunk Hanv tanchea gineanacher uzvadd ghaltolom; tim zatolim Mhoji porza ani Hanv zatolom tancho Dev, kiteak tim sogllea aplea kallzan Mhojê-xim portun ietolim.
8. Vaitt anjiram vixim, itlim vaitt ki tim khavpak upkaronant, Sorvespor oxem sangta têch bhaxen Zedekiak, Judachea razak, tachea vhodda-vhodda mon'xank, ani Jerusaleant urleant tankam, hea desant ravleant vô Ejiptant geleant tankam, hea soglleank Hanv tea vaitt anjiram bhaxen vagoitolom.
9. Tankam polleun jogantlea sogllea rajeank xirxiro ie-so kortolom; ani jea desamnim Hanv tankam ximpddaitolom, thoim lôk tanchi ninda kortolo, ani tanchem nanv gheun vopari martolo; tim zatolim êk kenddnniancho mhal ani xiraploli zat: osli Hanv tanchi gôt kortolom.
10. Hanv tancher torvar, bhuk, ani pidda-xidda dhaddtolom, ani oso tankam ani tanchea purvozank dil'lea ganvantlim Hanv tankam nanch kortolom." '
