1. Jedna Babiloniecho raza Nebukadnezzar ani tachi soglli fouz, tachê sot'tiê khal aslolea prithvechea sogllea rajeancho ani sogllea porzancho tenko gheun, Jerusaleacher ani tachê bhonvtonnim aslolea sogllea nograncher zhuz kortale, tedna hem Sorvesporachem utor Jeremiasak pavlem:
2. Sorvespor, Israelacho Dev, oxem mhonntta: "Voch ani Judasachea raza Zedekiah kodde uloi ani taka oxem sang: Sorvespor oxem sangta: Hanv atam hem Xar Babiloniechea razachê svadhin kortam, ani to tem lasun uddoitolo.
3. Ani tum tachea chopkeantlo suttchoch naim, punn tuka dhôrtole ani tachea tabeant ghaltole. Tum tujeach dolleamnim Babiloniechea razak dekhtoloi ani tachê kodde khud uloitoloi. Uprant tum Babiloniek vetoloi.
4. Tori astana tum, Zedekiah, Judachea raza, Sorvesporachea utrak kan di! Tujê vixim Sorvespor sangta tem aik: tum zhuzant morcho naim;
5. tum xantin mortoloi. Ani tuje adlea razank, tujea purvozank, dhump lasun purtalim toxench tuka-i dhump lastolim, ani amchea dhoniachem kotta!, oxem mhonnun tujê pasot ek vilapachem git gaitolim, Hem Mhojem utor. Uloita to Sorvespor! " '
6. Him sogllim utram Jeremias provadian Jerusaleant Judachea raza Zedekiachea kanar sadoilim.
7. Tednanch Babiloniechea razachi fouz Jerusaleacher ani Judachea Lakhish ani Ajeka nograncher akromonn kortali. Him nogram ozun ubim aslim kiteak tim kottamnim ghôtt kel'lim.
8. Zedekiah razan Jerusaleant aslolea sogllea loka kodde tanchea gulamank suttka pôrgottun êk koblat kel'li, tea uprant Sorvesporachem utor Jeremiasak pavlem.
9. Hi porgôttnni oxi asli: zonn-eklean aplea Hebrev gulamank, dadleank toxem bailank, suttka diunchi, ani hea fuddem khoincheach Hebrêv dadlean vô bailen aplea Hebrêv bhavak vô bhoinnik gulamponnant dovorchim nhoi.
10. Hi koblat manun ghetlolea tea sogllea fuddariamnim ani sogllea lokan ek-eklean ap-aplea gulamank, dadleank toxem bailank, suttka diunchi mhonn ani fuddem tankam gulamponnant dovorchim nhoi mhonn kobul zal'lim.
11. Punn magir tãnnim aplem mon bodôl'lem ani suttka dil'li tea gulamank, dadleank toxem bailank, portun haddlim ani novean tankam gulamam kelim.
12. Tedna Sorvespor oso Jeremiasa kodde uloilo:
13. Sorvespor, Israelacho Dev, oxem mhonntta: "Tumchea purvozank Ejiptantlim, gulamponnachea ghorantlim, bhair kaddun haddlolim tedna tanchê kodde Hanvem êk korar kel'lo; to korar oso aslo:
14. Konn-ui Hebrevamnim apnnankuch dusrea Hebrêv dhoniak vô dhoninnik viklim zalear, sat vorsanchea xevottak zonn-eklea dhonian vô dhoninnin aplea Hebrêv bhavak vô bhoinnik mukt korunk zai; sôv vorsam tim tumchea gulamponnant ravunk xoktat, punn tea uprant tankam mukt korun tumi tankam soddounk zai. Punn tumchea purvozamnim Mhojem aikunk na ani Mhaka kan diunk na.
15. Punn aiz tumi tumchem mon bodôl'lem ani, tumchea xezariank suttka diun, Mhaka mandta tem kelem. Tumi Mhojea huzram Mhojem Nanv aslolea Mondirant êk korar kelo.
16. Punn magir tumi novean adlich vatt dhôrli ani Mhojem Nanv bhoxttaun, ek-eklean mukt korun dhaddlolea ap-aplea gulamank, dadleank toxem bailank, portim haddlim ani zobordosten tankam novean tumchim gulamam kelim."
17. Dekhun Sorvespor oxem mhonntta: "Tumchea bhavam-bhoinnink ani xezariank suttka dinam zaun, tumi Mhojem utor môddlem. Borem tôr, Hanv Mhojê pallien uloita to Sorvespor! torvarik, bhukek ani piddek tumchê sorim zai toxem korunk Hanv mekllik ditolom, ani hea jogantlea sogllea rajeam mukhar xirxiro haddta tosli vôst Hanv tumkam kortolom.
18. Ani Mhozo korar môddlo ani Mhojê hujir kel'lea korarache kaide pallunk nant tea soglleank ek padduk koxim lêkhtolom; oslea paddkachim lôk don ordam korta ani tanchê modlean veta.
19. Paddkachea don ordam modlean gel'lea Judachea ani Jerusaleachea fuddariank, izddeank, iadnikank, ani desantlea sogllea lokak
20. Hanv tanchea dusmananchê adhin ani tankam jivexim marunk sôdtoleanchea tabeant kortolom, ani tanchim pretam mollba velea suknneanchem ani zomni velea mon'zatinchem khann zatolim.
21. Ani Zedekiak-ui, Judachea razak, ani tachea fuddariank tanchea dusmananchea ani tankam jivexim marunk sôdtoleanchea ani atanch pattim sorlolê Babiloniechê foujechea hatant ghaltolom.
22. Aikat, Hanv hukum ghaltolom ani hea Xaracher novean akromonn korunk ani tem jikhun gheunk ani tem lasun uddounk Hanv tankam hanga portun haddtolom. Uloita to Sorvespor! Judachea nogranchem konnuch ravona toslem oronnem Hanv kortolom." '
