1. Mhojea Hinddantlea xelliank sanddtat ani ximpddaitat tea gonvlliancher kotthin dis ieunche asat- uloita to Sorvespor.
2. Hea pasot, Mhojê porjek chorvak vhortolea gonvlliam vixim Sorvespor, Israelacho Dev oxem mhonntta: "Tumi Mhojea hinddak ximpddaila, taka tumi dhanvddaila ani tachi zoton tumi ghetli na. Borem tôr, tumchea khottea kortubank lagun Hanv tumkam xikxa ditolom. Uloita to Sorvespor!
3. Punn Mhojea hinddacho urlolo zomo jea-jea desamnim Hanvem ximpddail'lo tea-tea desantlo Hanv taka tanchea khaxa desant portun haddun zoma kortolom; to sufôll zatolo ani tachi sonkia vaddot vetoli.
4. Tanchi rakhônn korunk ani tankam chorvak vhorunk Hanv gonvlli upzoitolom. Hea fuddem tankam anink bhirant aschi na, akant-ui ascho na; eklo porian sanddchona. Uloita to Sorvespor!
5. Polleiat, Davidak Hanv êk promannik fantto upzoitolom; to khoro raza koso zannvaien raj choloitolo. Ho dis lagim pavta. Uloita to Sorvespor!
6. Tachea disamnim Judachem raj zoitivont zatolem ani Israelachem kull surokxit jietolem. Ani taka vollkhotolim hea nanvan: 'Sorvespor-amchem-Doiallaiechem-Nitivontponn.' "
7. Polleiat, soput gheunk lôk anink kednanch oxem mhonncho na: "Jea Sorvesporan Israelachea putam-dhuvank Ejiptantleô bhair kaddleô, tea Sorvesporachea jivachean;"
8. punn soput ghetana lôk oxem mhonnttolo: "Sorvesporan Israelachea Ghoranneachê sonstik Ut'torechea desantli ani Tannem tika ximpddail'li tea sogllea desam thaun portun haddli ani aplea khaxa desant tika ravunk dilem; tôr tea Sorvesporachea jivachean"- oso soput gheunche dis pavot ietat. Uloita to Sorvespor!
9. Provadiam vixim [Jeremias apnnachêch bhitôr oso pinrgota:] Mhojêch bhitôr futtlam mhojem kalliz, mhojim sogllim haddam koddkoddtat; Sorvespora pasot ani Tachea povitr utrank lagun hanv eka bebdea sarko zalam, soro mhojê toklek choddlolê bhaxen hanv zalam.
10. [Sorvespor mhonntta:] 'Devak ovisvaxi zal'lea mon'xamnim dês bhòrla. Devan xirap ghala mhonnun, ak'kho dês dukhant asa ani chorva-moidanam suki-korddi zomin zaleant. Vaitt korunk tim poilim, nitt margar cholunk proitn korich nant.
11. Khorench, provadi ani iadnik porian devdhorm naslole monis zaleat. Mhojea Mondirant porian vaitt kortanch te Mhaka sampoddleat. Uloita to Sorvespor!
12. Haka lagun tancheô vattô tanchoch ghat gheunk pavtoleô. Kallokhachea vattamnim te choltat, tancheruch te nisrun adllun poddtole. Tankam khast lavchem voros ietolem tedna Hanv tancher noxtt dhaddtolom. Uloita toSorvespor!
13. Samariechea provadiam modem, Hanvem murkheponnam dekhleant: Baalachea nanvan tãnnim sondêx dilo ani Mhojê Israel-porjek vankddea vattamnim vheli.
14. Punn Jerusaleachea provadiam sovem Hanvem odik khotteô vostu dekhleat: te Devak ovisvaxi zaleat, portun-portun lobaddiô sangtat, vaitt kortoleanche hat te ghôtt kortat, dekhunuch apli vikottaiechi vatt konn sôddina. Mhaka zalear te soglle Sodomachea loka bhaxen zaleat, ani Jerusaleant ravtat tim sogllim Gomorrachea loka sarkim.
15. Mhonnttôch provadiam vixim Sorvsoktivont Sorvespor sangta tem hem: "Hanv tankam jevnnak koddu bhaji ditolom ani pieunk vikarem udok, kiteak Jerusaleachea provadiank lagun ak'khea desant Devdhormachem kãich na."
16. Sorvsoktivont Sorvespor oxem sangta: "Tumkam sondêx ditat tea provadianchem aikunkuch nakat. Te tumkam fosoitat: Sorvesporachea tonddantlem ieta tem khud utor nhoi, punn apleach monantlim sopnam tumkam sangtat.
17. Sorvesporachem utor bherea kanancher ghetat tankam te oxem sangtat: Tumkam xanti astoli: oxem Sorvespor mhonntta. Ani apleach vadea pormannem choltat tankam te oxem sangtat: Tumcher kãi noxtt ieunchem na!"
18. Punn [hanvem mhollem:] Sorvespor Apleô gupit ievzonnô manddtalo tedna tanchê modlo konn tori Sorvespora hujir ubo aslo kai ani Tachem utor konnem tori aikolam zait? Konnem tori Tachea utrak chit dilam ani taka kan dila zait?
19. Polleiat, atam Sorvesporachem krodhachem vadoll sutt'ta bhirankull tufan uprasta, tem noxtteanchê tokler futt'ta.
20. Aplea monant ievjil'lem asa titlem-i xarthi pavoilea xivai, Sorvesporacho krôdh tharcho na. Ietea disamnim hem tumkam sarkem tthavem zatolem.
21. Hanvem hea provadiank dhaddunkuch nant. Tori te dhanvim-dhanvim gele. Hanv tanchê kodde ulounkuch na, tori tãnnim Mhojea nanvan sondêx dilo.
22. Mhojeô gupit ievzonneô manddtana, te hajir asle zalear, tanchean Mhozo sondêx Mhojê porjek diunk zatolo aslo, ani tankam aplea khottea marga velim ani aplea vaitt kortubam thaun koddsoraunk zatolem aslem!
23. Lagim asam tednanch Hanv Dev kitem? -uloita to Sorvespor!- ani pois asam tedna Hanv anink Dev nhoi?
24. Mhojê nodrek poddona zaunk konnachean khoincheach gupit zagear lipon ravunk zait? Sogllêch kodden, ontrallar ani prithver, Hanv asanch mhonn nokllot tumi? Uloita to Sorvespor!
25. Mhojea nanvan fottkire sondêx diun provadi kitem sangtat tem Hanvem aikolam. Te mhonnttat: "Mhaka ek sopon poddlem! Mhaka ek sopon poddlem!"
26. Kitlo kall porian provadiam modem fottkire sondêx divpi ani aplinch sopnam porgôtt korpi astole?
27. Ekamekak sangtat tea sopnam udexim Mhojê porjechea monantlo Mhaka kaddunk te bharim vavurtat; toxem tanchim purvozam Baala pattlean vochun Mhaka visorlim.
28. Apnnak sopon poddlam tem aplench sopon mhonn provadian sangchem! Ani Mhojê koddsun zaka sondêx pavla, tannem to spoxttponnim porgôtt korcho! Tonna ani gonva modem sôr korunk kitem asa? Uloita to Sorvespor!
29. Mhojem Utor ujea sarkem nhoi kai? Uloita to Sorvespor! Khoddpam porian fôddun uddoita toslo tutio Mhojem Utor nhoi?
30. Mhonnttôch, provadiam koddem Mhaka vivad korcho asa- uloita to Sorvespor!- kiteak te Mhojim utram ekameka koddsun chorun vhortat.
31. Apleô jibô haloitat titlê-i pavtti bhakitam kortat tea-i provadiam kodde Mhozo vivad.
32. Fottkirim sopnam dhôrun bhakitam kortat tea provadiam kodde Mhaka vivad korcho asa. Uloita to Sorvespor. Apleô fotti ani boddaiô sangun Mhojê porjek te vankddê vatten vhortat. Hanvem tankam kednanch pattounk nant, vô kodinch tankam nemunk nant. Hê porjechea kosleach faideak te poddonant. Uloita to Sorvespor.
33. Jedna hi porza, vô êk provadi, vô êk iadnik tumkam vichar kortat: "Sorvesporacho bhar konn?" tuzo zobab oso zauncho: "Tumich mhaka êk bhar, ani tumcho Hanv nas korcho asam. Uloita to Sorvespor!"
34. Ani zo provadi, iadnik vô konn-ui dusro mhonnot: "Sorvesporacho bhar", tea mon'xak ani tachea ghorabeak-ui Hanv xikxa laitolom.
35. Tumi tumchêch modem ekamekak oxem mhonnunk zai: "Sorvesporan koslo zobab dila?" vô "Sorvesporan kitem sanglam?"
36. Punn "Sorvesporacho bhar!" oxem anink mhonnum nakat. Kiteak jim konn oxem uloitat, tankanch hem tãnnim vaporlolem utor êk bhar zait. Kiteak tumi jivea Devachea utracho ôrth tumkam zai toso bodôltat. Sorvsoktivont Sorvespor, amcho Dev To!
37. Provadia kodde tumi oxem vicharunk zai: "Sorvesporan tuka koslo zobab dila?" vô "Sorvesporan kitem sanglam?"
38. Punn "Sorvesporacho bhar" oxem mhonnxat zalear, Sorvespor oxem sangta: " 'Sorvesporacho bhar' oxem mhonnunk tumkam Hanvem addvarlolem astam, 'Sorvesporacho bhar' hem utor tumi ozun vaportat mhonnttôch,
39. Hanvuch tumkam ubartolom ani Mhojê mukhailim xevttun uddoitolom; tumkam ani borabôr tumchea purvozank dil'lea Xarakui.
40. Tumcher Hanv sasnnak togpachi loz haddtolom, soron sorona ani visôr poddona toslem nirbhag. " '
