1. Sorvesporan mhaka sanglem: 'Voch ani penkttak bandunk êk rumal ghe ani to tujea penkttak band. Punn to udkant buddoun kaddum naka.'
2. Mhonnttôch Sorvesporan mhaka sanglolem tea pormannem, hanvem êk penkttacho rumal ghetlo ani to mhojea penkttak bandlo.
3. Dusrê pavtti Sorvespor oso mhojê kodde uloilo:
4. Tunvem vikto ghetlai ani tujea penkttak bandlai to rumal dhôr. Utth, Eufrat nodi-xim voch ani thoim eka khoddpachê khanchint to lipoi.'
5. Mhonnttôch Sorvesporan mhaka sanglolem tea pormannem Hanv gelom ani Eufrat nodi-xim to lipoilo.
6. Zaitea disam uprant, Sorvesporan mhaka sanglem: 'Utth ani Eufrat nodi-xim voch ani thoim lipoun dovor mhonn Hanvem sanglolo to penkttacho rumal portun hadd.'
7. Mhonnttôch hanv Eufrat nodi-xim gelom ani to rumal hanvem sôdun kaddlo. Punn hanvem to hatant ghetlo tedna, tacheô vadriô zal'leô ani to kiteakuch upkaronaslo.
8. Tedna Sorvespor novean mhojê lagim oso uloilo:
9. Sorvespor oxem sangta: "Oxench Hanv Judachea ani Jerusaleachea gorvacheô vadriô kortolom.
10. Mhojem utor aikunchê svater, hi noxtti porza, sodanch darunn kallzachi ani khotti, dusrea devank bhôzunk pavli ani tanchi seva tinnem keli. Ti zatoli hea penkttachea rumala sarki, kiteakuch upkarona tosli.
11. Kiteak zoso êk penkttacho rumal mon'xachea penkttak chikttun urta, toxench Judachem ak'khem Ghorannem Mhaka chikttun urchem mhonn Hanvem ievjillem- uloita to Sorvespor! Tim Mhoji porza zaunchim mhonn ani Mhojea Nanvak mhoima, man ani vhoddvik tãnnim haddchi mhonn Hanvem oxem kelem. Punn tãnnim Mhojem aikunk na."
12. Sorvesporan mhaka sanglem: '[Jeremias,] oxem-i sang tankam: "Sorvespor, Israelacho Dev, oxem sangta: Soreachea dabeamnim soro bhôrcho." Tim mhonnttolim: "Dôr-eka soreachea dabeant soro bhôrunk zai mhonn ami nokllo asleanv kitem?"
13. Tedna tum tankam sang: "Sorvespor oxem mhonntta: Polleiat, Hanv hea desantlea somestank, tim bebdim zai-sôr, soro bhôrunk vetam: somestank mhonngê Davidachê gadier bostolea razank, iadnikank, provadiank, ani Jerusaleachea sogllea lokak.
14. Tedna avoi-bapaiank ani tanchea bhurgeam-ballank vangdda ekamekacher apttun-dopttun Hanv tanche kuddkean kuddke kortolom -uloita to Sorvespor!- Nixtturaien, doia-maia nastana, churchure dhôrinastana, Hanv tancho nas kortolom! " '
15. Aikat ani kan diat! Gorvixtt zaum nakat! Uloita to Sorvespor!
16. Sorvespor tumcho Dev tumcher kallôkh dhaddcho asa, ani kallokhant buddlolea porvotar tumche pãi adllon poddo-xe kortolo: hem ghòddchê adim Sorvespora tumchea Devak mhoima diat. Tumi uzvaddak axeun ravtat, punn tumcho axel'lo uzvadd bodlun To mornnacho kallôkh kortolo.
17. Hê xiddkavnnek tumi kan dina zaxat tôr, tumchea gorvak lagun Mhojem kalliz ekantim roddtolem; Sorvesporachea hinddak koidi korun gulamponnak vhortat dekhun, Mhoje dolle koddu dukam golloun roddtole, ani dukancheô zhori vhanvtoleô.
18. [Sorvesporan mhaka sanglem:] 'Razak ani razmatek oxem sang: gadiê voilim denvun sokla bosat, kiteak tumcho mhoimecho mukutt tumchea mathea velo sokla poddla.
19. Negebachea nogrank veddho ghala, konnacheanuch thoim bhitôr soruk zaina. Judachê ak'khê porjek nirvaxi korun vheli, konnakuch bhairainastana tankam nirvaxi kelim.
20. [Jerusalea,] tuje dolle ubarun polle,Ut'torê thaun konn ietat te polle. Tuka ballgunk dil'li porza, tuji opurbaiechi porza, khoim asa ti atam?
21. Kitem mhonnttolii tum atam? Tuje fuddari zaunk tunvem lhan-vhodd kel'le tech atam nanch zale: dekhun tum hi piddapidd bhôgtai. Ballonteracheô dukhi bhôgtolê ostoriê bhaxen tujer-ui vollvolle ietole.
22. Ani 'hem sogllem mhojer kiteak ailam?' oxem tujêch bhitôr vicharxi zalear, tujea vhodda guneanva pasot tuje ghagre ubarle ani tujer bolatkar kelo mhonn tunvem somzunchem.
23. Konn Ethiopiekar apli kat bodlunk xokot? Vô bibttea-vagan aplê katiche rongi-pat bodlunk zata? Ani tum? Vaittachi tuka itli sonvoi zalea astam, tujean borem korunk zait?
24. Oronneantlea varean ubon veta toslea pola bhaxen Hanv tumkam uboun ximpddaitolom.
25. Tum Mhaka visorlii ani kud'dea devancher tuzo visvas tunvem dovorloi dekhun, ho atam tuzo noxibacho vantto, Hanvench tuka mezun-mapun dil'lo. Uloita to Sorvespor!
26. Mhonnttôch Hanvuch tujim vostram ukôltolom ani tuka vinglli kortolom, ani tum sobhêmazar lojek poddtolii.
27. Mhaka logn zal'lii tum, punn zalii ovisvaxi: sogllich kuddichea sukhak lobhdol'li, êkê xindôll bailê sarki! Dongrancher ani xetam-mollamnim tea tujea kanttalleachea kud'dea devank Hanvem dekhleat! Zoso êk dadlo aplea xezariachê bailê pattlean vô ek andêll-ghoddo ghoddiê pattlean axeun veta, toxi tum kud'dea devam pattlean geleai. Kottakotta, Jerusalea! konixttaieche dis tujer ietat! Kedna tori tum nitoll-nirmôll zatolii?'
