1. Zedekiah xinvasonar boslo tedna taka ekvis vorsam aslim, ani tannem Jerusaleant ikra vorsam raj choloilem. Tachê avoichem nanv Hamital, ani hi Libnas nograntlea Jeremiasachi dhuv.
2. Zoxem Jehoiakiman kel'lem, toxench tannem Sorvesporachea dolleam mukhar vaitt tem kelem.
3. Sorvesporachea ragak lagun Jerusaleachi ani Judachi doxa oxi zaunk pavli; xevttim Tannem tankam Aplê nodrê thaun pois kelim.
4. Zedekiah Babiloniechea razacher kolpolo. Tachê razvôttkechea nnovea vorsa, dhavea mhoineant, mhoineachea dhavea disa, Babiloniecho raza Nebukadnezzar soglli apli fouz gheun Jerusaleacher dhadd ghalunk ailo; tannem Xara mukhar pennem kelem ani sobhonvtim matieche band ubarle.
5. Zedekiachê razvôttkechea ikravea vorsa porian Xaracho veddho urlo.
6. Chovthea mhoineant, mhoineachea nnovea disa, Xarant marekar dukôll poddlo ani barik lokak jevonn-khann bilkul na zalem;
7. tedna Xarachem kott môddun vatt ugti keli. Kaldeikar Xarak veddho ghalun asle khorem, tori ratchea kallokant soglle Zedekiache zhuzari pollun gele: razachê bagê lagim aslolea don kottam modlea darvontteantlean bhair sorun Jordanachea falkeachi tãnnim vatt dhôrli.
8. Kaldeikaranchem loskor razachê pattik laglem ani Jerikechê soklattir tãnnim taka dhôrlo, ani thoim tache soinik taka sôddun gele.
9. Punn Kaldeikaramnim razak dhôrlo ani taka Hamathachea vattarant Riblas nogrant Babiloniechea raza mukhar vhelo, ani hannem tacher xikxechem formonn marlem.
10. Babiloniechea razan Zedekiachea dolleam mukhar tachea putank jivexim marle; toxench tannem Riblas nogrant Judachea sogllea sordarank marun uddoile.
11. Magir tannem Zedekiache dolle konchoun kaddle; ani pitullche kodde ghalun Babiloniechea razan taka Babiloniek vhelo; thoim taka moro porian koidi korun dovorlo.
12. Panchvea mhoineant, mhoineachea dhavea disa Babiloniechea raza Nebukadnezzarachea ekunnisavea vorsa Nebuzaradan,rakhonndarancho sordar, Babiloniechea razachea budhvontantlo eklo, hannem Jerusaleant provês kelo.
13. Tannem Sorvesporachem Mondir, razvaddo ani Jerusaleantlim sogllim ghoram lasun uddoilim.
14. Rakhonndaranchea sordara borabôr aslolê Kaldeikaranchê foujen Jerusalea bhonvtonnchim sogllim kottam môddun uddoilim.
15. Nebuzaradanan, rakhonndaranchea sordaran, Xarant urlolê porjek ani desantlea kãi gorib lokak, toxench apli fouz sôddun Babiloniechea razak ektthovlolea soinikank, ani urlolea xilpiank, koidi korun pordesant dhaddlim.
16. Punn Nebuzaradanan, rakhonndaranchea sordaran, kheddea ganvchea kãi gorib lokak dakam-molle ballgunk ani xetam vosounk dovorlo.
17. Kaldeikaramnim Sorvesporachea Mondirantle pitullche khambe, Sorvesporachea Mondirantlim chakam-aslolim peddam ani pitullcho Doria, hem sogllem môddun soglli pitull Babiloniek vheli.
18. Toxinch gobrachim aidonam, dovle, suriô, bolianchem rogot ghevpachim tostam, dhumpelam, ekach utran, sevadhormant vaporcheô soglleô pitullcheô vostu, him sogllim vhelim.
19. Tea bhair, rakhonndaranchea sordaran bhangarachem ani rupeachem aslem titlem-i vhelem: kanxe, dhumpelam, bolianchem rogot ghevpachim tostam, gobrachim aidonam, divlianchim peddam, patram ani piri.
20. Solomon razan Sorvesporachea Mondirak pitullcheô zaiteô vostu kel'leô don khambe, êk Doria, Doria samballunk bara pitullche boil, ani chakam-aslolim peddam. Hea sogllea vostunchi pitull zokunk zaina titli asli.
21. Khambeanchi gozal kelear, dôr-eka khambeachi unchai otthra hat, tachi bhonvtônn bara hat, tachi dhattai char bottam; bhitorlean te pokoll asle.
22. Tanchê voir pitullchem kofxe laslem, ek-eka kofxelachi unchai panch hat; kofxela bhonvtim zalli-kam ani dallimam: hem sogllem pitullchench. Tosoch dusro-i khambo aslo.
23. Zalli-kama bhonvtim sogllim mellun xembor dallimam aslim; tantlim xannov (96) zomnir thaun dixtti poddtalim.
24. Rakhonndaranchea sordaran Seraiak, mukhêl iadnikak, tachê pattlean odhikar aslolea iadnikak, Zefania, ani tegam dar-rakhnneank koidi kele.
25. Xarant tannem zhuzariancho odhikari aslolea eka izddeak koidi kelo, toxench Xarant taka sampoddlolea razachea sat budhvontank, foujent bhitôr sortoleanchi zobabdari aslolea senapotichea adariak, ani Xarant sampoddlolea satth nanv-vosteam mon'xank.
26. Nebuzaradanan, rakhonndarachea odhipotin, hea mon'xank dhôrun Riblas nogrant Babiloniechea raza-xim vhele,
27. ani Babiloniechea razan Hamath vattarantlea Riblas nogrant tancho prann kaddlo. Hê bhaxen Judachi porza aplo dês sôddun pordesant pavli.
28. Nebukadnezzaran pordesant pavoila tea lokachi sonkia oxi asli: Satvea vorsa tin hozar ani tevis Judeikaram;
29. Nebukadnezzarachea otthravea vorsa Jerusalea thaun atthxim bot'tis mon'xam;
30. Nebukadnezzarachea visavea vorsa Nebuzaradanan, rakhonndaranchea sordaran,satxim ponchê-challis Judeikarank pordesant pavoilim. Sogllim mellun, koidi korun pordesant vhel'lim mon'xam char hozar soixim zannam aslim.
31. Punn Jehoiakim, Judachea razachea pordesachea sat'tisavea(37) vorsa, baravea mhoineachea ponchvisavea disa, mhonngê jea vorsa Evil-Merodak Babiloniecho raza zalo, tea vorsa tannem Jehoiakinak, Judachea razak, bhôgxilo ani taka bondkhonnintlo bhair kaddlo.
32. Tannem taka moipasan vagoilo, ani je raza tachea vangdda Babilonient nirvaxi asle, tanchê von taka odik unch zagear bosoilo.
33. Tedna Jehoiakinan aplim koidiachim vostram bodôl'lim ani moro porian to razachea mezar jevnnak boslo.
34. Tachem dôr-disachem udorposonn jivit-bhôr moro porian dispottim taka diunchem mhonn razan nirnnoi ghetlo.
