1. Aik, Israela, tum portun iexi zalear,- uloita to Sorvespor- Mhojêch-xim tum portun ieunk zai. Tujeô Ollxikô Mhojea mukha veleô kaddun uddoixi zalear, ani Mhaka visvaxi ravxi zalear,
2. sotan, nitin ani promannikponnan, jivea Sorvesporachea Nanvan tujean soput gheum-ietolo. Tedna Tachem nanv gheun raxttram apnnancher axirvad magtolim ani Tachê sovem mhoima bhôgtolim.
3. Judachea lokak ani Jerusaleak Sorvespor oxem mhonntta: "Tumchi padd zomin kamais korat ani kantteam-kuntteam modem bim marum nakat.
4. Judachea mon'xamnô ani Jerusaleant ravtoleamnô, Sorvesporachea manak tumchi sunôt korat, tumchea kallzachi sunôt korat; na zalear, tumchea khotteponnank lagun, ujea bhaxen Mhozo krôdh bhair sortolo ani to palounk konnuch ascho na. " '
5. Judant jahir korat, Jerusaleant porgôtt korat ani mhonnat: 'Ak'khea ganvant tuturi vazoiat ani arddun sangat: Zhuzak toiar zaiat! Kottam-durgamnim bandlolea nogramnim vochat!
6. Siona vatten bavtto ubarat! Jiv rakhunk pollun vochat, tharum nakat! Ut'torê koddsun ek vhodd noxtt Hanv haddcho asam.
7. Xinv aplea jhilkuttantlo bhair sorla, raxttranchem nisontton korpi vattek lagla, tujea desacho bhosm korunk to aplea ghorantlo bhair sorlo; tujim nogram padd zatolim, thoim tthikann korunk konn ascho na.
8. Dekhun tumi angak sak ghalat, rudon ani vilap korat, kiteak Sorvesporacho zollto rag amchêvelo koddsorun vochunk na.
9. Tea disa'- uloita to Sorvespor!- 'razachem ani kunvrachem boll virghollun vetolem, iadnik thorthorun akant'tole ani provadi ghabortole.'
10. Tedna hanvem mhollem: 'Sorvespora Deva, hea lokak ani Jerusaleak Tunvem sarkinch fosoilim-i portun-portun oxem mhonnun: "Tumkam xanti astoli." Punn atam torvar amchê gomtter ubarloli asa!
11. Tedna hê porjek ani Jerusaleak mhonnttolim: oronneantlea padd dongrancher thaun hun-hun varo Mhojê porjechea razdhani xaracher marta, punn tika varem diun nitôll korunk nhoi!
12. Thoim thaun ek khor vadoll Mhojea hukuman uprasun ieta. Atam tancher Hanvuch Mhozo nirnnoi diunk vetam.'
13. Polle, kupam vori to denvun ieta, tache roth tufana sarke, tache ghodde goruddam poros odik vegan dhanvun ietat. Kotta amchem! Amchem nisontton zalem!
14. Jerusalea, tujea kallzantlem khotteponn dhuun kadd ani tuka taronn melltolem. Tujim khottim chintna tujea kallzant kitlo kall mhonn rig gheun ravtolim?
15. Dan pranta thaun êk tallo oso gazta, ani Efraimachea porvotancher thaun noxtt porgôtt'ta.
16. Raxttrank sangat, Jerusaleak porgôtt korat: Poixilea desa thaun dusman ietat, ani Judachea nogram add zhuzache nare ghaltat.
17. Xetachea rakhonndaram bhaxen tãnnim taka veddho ghala, kiteak tem Mhojer kolpolam. Uloita to Sorvespor!
18. Tujê vagnnuken ani tujea kortubamnim hem noxtt tujer haddlam. Kitlem mhonn koddu tujem khotteponn! tannench tujem kalliz vidhlam!'
19. Khôl khôl mhojea kallzant kedo vhôdd mhozo sontap! Mhojem kalliz khontovlam! Mhojem kalliz savronastana ddobddobta! Mhojean xant ravunk zaina, kiteak hanvem tuturecho avaz aikola; zhuzacho naro to!
20. Nisonttona pattlean nisonttonachich ieta khobor. Ak'khea desachem zalam ghorttann, mhoje tombu okosmat moddon gele, eka khinna bhitôr soglle mhojê addos bhongle.
21. Kedna porian bavtto ubarlolo polleum hanv ani tuturecho sad aikum?
22. Mhoji porza pixi, dekhunuch hem oxem ghòddlam, tim Mhaka vollkhonant, tim mhollear ginean naslolim bhurgim, tankam mat-ui ok'kol na. Vaitt korunk tim huxar, punn borem korunk tim nokllot.'
23. Hanvem prithumecher nodor marli: ti akar-naslolea oronnea sarki zal'li; mollbar dolle laile, ani thoincho uzvadd na zal'lo.
24. Hanvem porvotancher nodor marli: te kamptale ani ievxim-tevxim kolkoltale.
25. Hanvem nodor marli: monisuch naslo ani ontralla velim suknnim porian uddun gel'lim.
26. Hanvem nodor marli: Sorvesporachea zolltea krodhan soglli pikall zomin soddo zal'li, sogllea nograncho bhosm zal'lo.
27. Hôi, Sorvespor oxem mhonntta: 'Sogllo dês padd zatolo, punn Hanv tacho sarkoch sotianas korcho na.
28. Hea pasot prithvi rudon kortoli ani voilem mollob kallem-kitt zatolem. Kiteak Hanv uloilam, Hanvem nirnnoi ghetla, Hanv Mhojem mon bodôlcho na ani pattim sorcho na.'
29. Ghoddesvoranchea ani bannekaranchea avazak ak'khem xar pollun veta: konn-konn jilkhuttamnim liptat, konn-konn khoddpanchea dholimnim liptat, dôr-ek xar sôddun vetat, konnuch tantum urcho na.
30. Kitem korunk sôdtai tum, soglleamnim sôddlolea xara? Zambllea vostramnim nhesxi, bhangarachea olonkaramnim tukach nettoixi, kazol ghalun tuje dolle lamb-rund korxi, tori nirfollim tum surêkh-sundôr disunk sôdtai! Tuje adle mogi tuji beporva kortat, tuzo prann kaddunk sôdtat.
31. Khorench mhollear, ballonterak pavlolê bailecheô bobô-hueli hanv aikotam; poilêch pavtti porsutt zaunk pavlolê bailechea venniam khatir bobô aikum ietat. Suskar sôddunk dhap kaddtolê Sionachê dhuvechi bob ti. Aple hat vistarun ti mhonnta: 'Kotta mhojem! Hanv jiv sôddtam! Khuni monis mhozo jiv kaddtat!'
