1. Dukollachea kallar Sorvespor hê porim Jeremiasa kodde uloilo:
2. Juda rudon korta, pinrgun pinrgotat tachim nogram, ani lôk zomnir aptton poddta.
3. Unch kulliechim mon'xam aplea chakrank udok haddunk dhaddtat; chakram bãicher pavtat, punn udok tankam melloch na, rite kollxe gheun tim portotat: lojen bhoron, gondhollak sampddon, tondd dhampun ietat.
4. Paus poddona zaun zomin zalea suki-korddi, dekhun xetkari lôk ekdom khontint buddla, mathem dhampun bhonvta.
5. Chorôv na dekhun ranantlem merum porian halinch zolmol'lea porank sôddun veta.
6. Ran'gaddvam padd dongrancher ubim ravun koleam bhaxen dhapetat; tanchea dolleancher ieta kallôkh, kiteak chorvak zhadd-palo kãich na.'
7. [Israel-porza Sorvesporak oso ulo marta:] Amchim patkam amcher add sakxi ditat khorem, tori Tum, Sorvespora, Tujeach Nanvacho man rakhun kitem tori kôr, amkam pav! Hôi, khub pavtti ami Tuka patt keli, Tujer add ami pap kelem!
8. Tori Tum, Sorvespora, Israelachea Bhorvanxea, akantachea vellar amkam pavtolo ekloch Tum! Kiteak mhonn amchea desant porko monis zal'lê porim vagtai Tum? kiteak mhonn êkuch rat vostek ravtolea vattsura bhaxen choltai?
9. Kãi nokllo zaun thottak zal'lo toslo konn kai Tum? aploch dês rakhunk podvi-naslolo zhuzari zaunk pavlai Tum? Tori, Sorvespora, amchê modem Tum tthikann korun asai, Tujem Nanv amkam dil'lem asa,[Tuji vinchloli porza ami,] tôr amkam poro ghalum naka!
10. Hê porjê vixim Sorvespor oxem sangta: 'Hêvtten-têvtten dhanvun vochunk kitli mhonn tankam khuxi! Aple pãi êkêch kodden thir dovrunk tanchean zaina! Dekhun tim atam Mhaka manovnant; atam Hanv tancho guneanv Mhojea monant dovortolom ani tanchea patkam pasot tankam xikxa laitolom.'
11. Magir Sorvesporan mhaka sanglem: Hê porjê khatir Mhaka vinoum naka, tankam borem kôr mhonn magum naka.
12. Tim upas kortit, Hanv tanchea magnneak kan diuncho na. Tim hom' ani dhanneacheô bhettovnniô vopunk ietit, tim Mhaka manovchim nant. Urfattim, zhuzan, bhuken-tanen ani piddê-xidden Hanv tankam nattak kortolom.'
13. Hanvem mhollem: 'Sorvespora Dhonia, he polle provadi tankam sangtat: "Zhuz mhonnlolem kednanch dekhchim nant tumi, tumchê modem dukôll kodinch poddcho na; Hanv tumkam hea zagear khori xanti bhôgunk ditolom mhonn bhas ditam. " '
14. Tedna Sorvesporan mhaka mhollem: 'He provadi Mhojea nanvan fottkire sondêx ditat; Hanvem tankam dhaddunk nant; tankam Hanvem kosloch hukum' diunk na; tanchê kodde Hanv ulounkuch na! Fottkirim dorxonam, polkim bhakitam, apleach monantlim sopnam itlench te tumkam sangtat.
15. Dekhun Sorvespor oxem sangta: tankam Hanvem dhaddunk naastana Mhojea nanvan sondêx ditat ani hea desant zhuz pavchemna ani dukôll poddcho na mhonn tumkam sangtat te provadi apunnuch zhuzant ani bhuken-tanen mortole.
16. Ani jea lokak te oslo sondêx ditat,to-i lôk bhuken-tanen ani zhuzant mortolo ani tanchim pretam Jerusaleachea rosteancher uddoitolim ani tankam purunk konn ascho na, kiteak mhollear hench tanchem soglleanchem nirmonn: tanchem, tanchea bailanchem, tanchea putanchem ani tanchea dhuvanchem porian. Tanchem khotteponn Hanv tancheach mathear poddo-xem kortolom.
17. Dekhun [tujêch khonti vixim] sang tankam hem utor: 'Dis ani rat thambonastam, mhojea dolleantlim vhanvum dukam, kiteak mhoji porza borich ghaiall zalea, tichi sokti sarkich moddon gelea.
18. Kheddea-ganvamnim vochon zalear, zhuzant marlolim mon'xam thoim poddlolim asat; nogramnim bhitôr soron zalear, mhaka melltat tim bhuken-tanen vollvollun morunk pavleant. Provadi ani iadnik porian desant aplem kam korunk bhonvtat-firtat, punn kitem ghòddta tem tankam somzoch na.'
19. Sorvespora, Judak Tunvem sarkoch soddun diloi? Tujea jivak Sionachi itli vitt ieta kai? Kiteak mhonn Tunvem amkam itlo mar ghaloi? Borim zavpacho bhorvanso porian amkam na! Xantichi vatt ami polleit asleanv punn faido koslo? Ami borim zatoleanv mhonn ravtaleanv punn, portench zalear, amcher ailo akant!
20. Amchem khotteponn ani amchea purvozancho guneanv ami vollkhun ghetanv, Sorvespora! Khorench ami Tujer patok kelam!
21. Punn atam Tujea Nanva khatir amkam poro ghalum naka, Tujea Mondirachi, Tujea voibhovi xinvasonachi, abru ubon vochunk dium naka. Amcho ugddas kôr: amchê kodde Tunvem kel'lo korar visrum naka!
22. Raxttranchea nirupeogi kud'dea devam modem konn tori paus dhaddit mhonn asa? Vô mollbachean apxinch dhoddkô dhaddunk zata? Sorvespora, amchea Deva, hem sogllem korta to Tunch nhoi Ga? Tum ekloch hem sogllem kortai dekhun, Tum ekloch amcho Bhorvanso!
