1. Tedna soglle senapoti, bhov-korun Johanan, Kareiacho put, ani Azaria, Hoshaiacho put Jeremias provadia-xim aile; tanchê borabôr ailo sogllo lôk, lhan toso vhôdd;
2. tãnnim Jeremiasak mhollem; 'Upkar korun amchi magnni aik, amam pasot ani hea urlolea zomea pasot Sorvespora tujea Deva kodde vinoti kôr ami kitlim asleanv ani atam kitlim thoddim zaleanv tim tuka tôr dixtti poddta.
3. Tôr ami kosli vatt dhôrchi ani ami kitem korchem tem Sorvespora tujea Devan amkam dakhounchem.'
4. Jeremias provadian zobab dilo: 'Borem tôr, tumi magtat toxem, hanv Sorvespora tumchea Devakodde vinoti kortam; ani zo zobab Sorvespor tumcho Dev tumkam diit, to hanv tumkam kolloitolom; tumkam kãich lipoun dovorcho na.'
5. Tedna tãnnim aplê pallien Jeremiasak mhollem: 'Sorvespor tuzo Dev tujê udexim amkam sangit titlem-i ami pallinanv zalear, Sorvespor amchê virudh khoro ani visvaxi sakxi zaum.
6. Sorvespora amchea Deva kodde amchê khatir ulounk ami tuka dhaddtanv mhonnttôch, Tachem utor amkam manun vô na manum, ami tem palltoleanv. Oxem Sorvespora amchea Devachem utor pallun ami sukhest zaunk pavtoleanv.'
7. Dha disam uprant Sorvesporachem utor Jeremiasak pavlem.
8. Tedna Jeremiasan Johananak, Kareiachea putak ani hachea vangdda aslolea senapotink ani her somestank, lhanank toxem vhoddank, apoun haddlim.
9. Tannem tankam mhollem: 'Sorvespora-xim, Israelachea Deva-xim, tumi mhaka tumchea nanvan tumchim magnnim gheun pattoil'lo. Tôr To atam oxem sangta:
10. "Tumi hea desant ravxat zalear Hanv tumkam bandun haddtolom, môddun uddouncho na; Hanv tumkam roitolom, umttun uddouncho na; kiteak tumcher Hanvem noxtt dhaddlem mhonnun Mhaka khônt bhògta.
11. Babiloniechea razachi tumkam bhirant dista: tachi bhirant dhôrum nakat, taka bhieum nakat uloita to Sorvespor! kiteak tachea hatantlim tumkam vattaunk ani tachea chopkeantlim tumkam soddounk tumchea sangata Hanv asam.
12. Hanv tumche churchure dhôrtolom ani tosoch to-i tumche churchure dhôrtolo ani tumkam tumchea khaxa desant portun vochunk ditolo.
13. Punn portench, hea desant ami ravchim nanv, oxem tumi mhonnxat zalear, ani Sorvespora tumchea Devachem utor môddun,
14. Na, ami Ejiptakuch vetoleanv; thoim amkam zhuz polleunk poddchem na; tuturecho zhuza avaz aikunk poddcho na; ami bhukek sampoddchim nanv; thoim ki ami ravtoleanv, oxem tumi mhonnxat zalear,
15. Judachea urlolea zomea, Sorvesporachea utrak kan diat: Sorvsoktivont Sorvespor,Israelacho Dev, oxem sangta:
16. tumi Ejiptak vochunkuch tharav ghetat zalear, ani thoim vochun tumi ravxat tôr, thoim torvar tumchi patt dhôrtoli ani thoim tumi mortoleat.
17. Hôi, zãnnim Ejiptak vochun thoim ravunk tharav ghetla, tankam soglleank toxench ghòddtolem: tim torvarin, bhuken ani piddê-xidden mortolim. Ani tanchê modlim konnuch urchim nant vô Hanv tancher dhaddunk vetam tea noxttantlim vattavonchim nant.
18. Khorench Sorv-soktivont Sorvespor, Israelacho Dev, oxem mhonntta: Zoso Mhozo challovl'lo kinv Jerusaleant ravtoleancher pettlolo, tosoch Mhozo krôdh, tumi Ejiptant bhitôr sorxat zalear, tumcher pett'tolo. Tumi sosum nozo toslea kanttalleachi ani xirxiro haddta tosli vôst, xiraploli zat ani kenddnniancho mhal zaunk pavtoleat; ani ho dês tumi anink kednanch polleunchim nant."
19. Judachea urlolea zomea, Sorvesporan tumkam sanglam: "Ejiptak vochum nakat." Aizuch hanvem gombhirtaien Devachea nanvan tumkam xiddkavnni dilea mhonn sarkem lokxant dhôrat.
20. Jedna tumi mhaka Sorvespora tumchea Deva-xim pattoilo ani mhollem: "Sorvespora amchea Deva lagim amchê khatir vinoti kôr; Sorvespor amcho Dev sangit titlem amkam spoxtt sang ani ami tem palltoleanv." Oxem uloitana, tumi khorea monan ulounk na.
21. Aiz hanvem tumkam kollit kelam, punn Sorvespora tumchea Devachea utrak tumi pallo diunk na, nhoi mhonn mhojê udexim Tannem tumkam dil'lea sondexachem ek utor porian tumi pallunk na.
22. Mhonnun hem atam spoxtt somzun gheiat: jea ganvant tumi vochunk sôdtat, thoim tumi torvarin, bhuken ani piddê-xidden mortoleat.'
