1. Te dis ietôch -uloita to Sorvespor!- Israelachea sogllea Ghoranneancho Hanv Dev zatolom, ani tim zatolim Mhoji porza.
2. Sorvespor oxem mhonntta: Zhuzantlim vattavoleant tankam oronneant bhogsonnem mell'lam, Israel aplea somadhanachea zagear veta.
3. Hanv taka pois thaun dixtti poddlom. Sasnnik mogan Hanvem tuzo môg kela, dekhun doiall mogan Hanvem tuka Mhojê-xim ôddun haddla.
4. Israelachê porjê, Hanv tuka ani êkdam bandun kaddtam, ani tum novean bandon ietolii. Novean xringaramnim nettoil'li ani dholkim vazoun, anondan uddun-nachun tum bhair sortolii.
5. Samariechea dongrancher tum novean dakam-molle laitolii, ani te laitat tinch tanchim follam khatolim.
6. Efraimachea dongrancher pahredaramnim oxi bob marpacho dis ietolo: 'Utthat! Sion dongrar choddun vochum-ia, Sorvespora amchea Deva-xim vochum-ia.'
7. Kiteak Sorvespor oxem sangta: Jakoba khatir anondache ul'las sôddat! Raxttranchea Fuddariak zoizoikar korat! Porgôttat! Vakhannat! Arddun sangat: 'Sorvesporan Aplê porjechem, Israelachea urlolea zomeachem, taronn kelem!'
8. Polleiat, Ut'torechea desantlim Hanv tankam portun haddtolom ani prithumechea poixilea ximam thaun tankam zoma kortolom. Tanchê borabôr kudd'ddim toxem thonttim, gorbhest bailô, toxem ballonterak pavloleô bailô, sogllim mellun êk vhôdd urpônz hanga portun ietoli!
9. Dukam varoun tim pordesant gel'lim, buzvônn diun tankam portun haddtolom. Adllun poddonant toslea sopatt margan Hanv tankam udkachea vhallam sorxim vhortolom. Kiteak Israelak Hanv êk bapui, ani Efraim mhozo malgoddo put.
10. Raxttramnô, Sorvesporachea utrak kan diat. Poixilea kinariank ani zunveank porgôttat; tankam sangat: Zannem Israelak duspottail'lo, Toch atam tankam zoma korunk veta; zoso gonvlli aplea hinddak rakhta, tosoch To atam tankam rakhun dovortolo.
11. Kiteak Sorvesporan Jakobak mukti dili, tachê-vôn bollixtt hatantlo taka mukt kelo.
12. Anondan gavun ul'lasun tim Sionachea dongrar choddun ietolim; Sorvesporachim udondd vordanam gheunk zoma zatolim: gonv, novo soro ani zoitunanchem tel, menddranchim ani gorvanchim poram him sogllim vordanam gheun murgott'tolim. Borê ximplolê bhagê vori, tancho jiv rosrostolo; tim anink gollun poddchim nant.
13. Tedna cheddvam anondan nachtolim, tornnatte ani zanntte kuxali kortole. Tanchem dukh kaddun tachê bodlek Hanv tankam sukh ditolom, tankam buzvônn ditolom, tanchea trasam koxttam uprant tankam anondbhorit kortolom. Uloita to Sorvespor!
14. Boreaborea jevnna-pinnean Mhojea iadnikank khuxal kortolom, Mhojea subham denneamnim Mhojê porjek dhadoxi kortolom. Uloita to Sorvespor!
15. Sorvespor oxem sangta: Rama ganvant vilapacho ani rudonacho avaz aikum ieta: Rakel aplea bhurgeam khatir rudon korit asa; aplea bhurgeam pasot ti buzvônn ghena zali, kiteak tim atam nantuch!
16. Sorvespor oxem sangta: Tujem roddnnem bond kôr, tujea dolleantlim dukam pusun kadd, kiteak tujea koxttank melltoli mozuri, ani tim dusmanachea desantlim portun ietolim.
17. Tujea fuddara vixim bhorvanso dhôr, tujim bhurgim aplea ganv ghora portun ietolim. Uloita to Sorvespor!
18. Mhojê porjecho vilap Mhojea kanar poddla: Eka tornnea xikxonn gheunk naslolea boila vori Tunvem mhojer chabuk marloi; ani hanvem to chabuk ghetlo. Tunch amkam portun hadd, ani ami portun ietoleanv, kiteak Tunch Sorvespor, amcho Dev!
19. Kiteak ami Tuka patt kel'li, punn atam ami portun ietanv. Ami vaitt kelam mhonn ami somzoleanv, atam ami dukhin hodd'ddem boddoitanv. Amkam borich loz bhògli, tondd dhampchem poddlem. Amchê tornnê piraiechea kortubancho ami ozun beman bhôgtanv.
20. Israel Mhozo mogacho put nhoi? To Mhozo itlo heram poros opurbaiecho bhurgo, ki jitlê pavtti tachea patkancho ugddas kortam, titlê pavtti Mhojem Kalliz tachê pasot kollvollta. Dekhun Mhojem Kalliz taka otrekun otrekta, dekhunuch Mhoji konnvallai tacher vhanvot-vhanvot asa. Uloita to Sorvespor!
21. Rostear tumkam vatt dakhounk pattiô ubarat, ximô dakhounk nis marat. Margacher chotrai dovor, jea margan tumi gel'leant, tacher tumchem lokx dovrat. Israelachê porjê, portun ie, hea tujeach nogramnim ravunk portun ie.
22. Ovisvaxi porjê Mhojê, kitlo kall tum pattim-fuddem sortolii? Sorvespor prithver novem kitem rochun haddta: êk bail novean aplea potichê vengent chol'li.
23. Sorvsoktivont Sorvespor, Israelacho Dev, oxem sangta: 'Tanchea pordexiank Hanvem portun haddlea uprant, Judasachea desant ani tachea nogramnim lôk him utram novean vaportolo: "Povitr porvota, Sorvesporachem doiallaiechem nitivontponn Tujê bhitôr tthikann korun asa: Toch Sorvespor tujer axirvad ghalum!"
24. Ani hea Judachea desant ani tachea sogllea nogramnim xetkamti ani menddram-rakhnne aplea hinddam soit ektthaim jietole,
25. kiteak Hanv thokloleank tankam goroz titlem ditolom ani bhuken osokt zal'leank khaunk-pieunk diun dhadoxi kortolom.'
26. Hanv zago zalom tedna mhojê nhiden mhojem somadhan zalem mhonn mhaka koll'lem.
27. Polleiat, Hanv Israelachem Ghorannem ani Judachem Ghorannem mon'xamnim ani menddram-gorvamnim bhôrtolom: osle dis ietat.
28. Ani zoxem adim tankam umttun kaddunk, môddun uddounk, omtim uddounk, tancho nas korunk ani tancher noxtt haddunk Hanvem tancher dollo dovorlolo, toxench atam tankam bandun haddunk ani rovunk Hanv zoton ghetolom. Uloita to Sorvespor!
29. " Bapaiamnim ambott dakô kheleô ani bhurgeanche dant sonnsonnle" : osli mhonn'nni tea disamnim anink lokachea tonddant mellchi na.
30. Urfattim dôr-êk monis ap-aplea khud guneanva pasot mortolo. Jim konn ambott dakô khatit, tanchech dant sonnsonntole.
31. Polleiat -uloita to Sorvespor!- Israelachea Ghoranneak ani Judachea Ghoranneak Hanv êk novo korar kantoun ditolom: osle dis ietat;
32. tanchea purvozank hatak dhôrun Ejiptantlim Hanvem bhair kaddlolim tea disa tankam Hanvem êk korar kantoun dil'lo, toslo ho korar zauncho na; zori Hanv tancho poti aslom, tori ho korar tãnnim môddlo -uloita to Sorvespor!
33. Na, te dis pavtôch, Israelachea Ghoranneak Hanv korar kantoun ditolom to oso zatolo -uloita to Sorvespor!- Khôl tanchê bhitôr Hanv Mhoji Somurt khonchoitolom, tanchea kallzancher Hanv ti kantoitolom, ani Hanv zatolom tancho Dev ani tim zatolim Mhoji porza.
34. Tedna "Sorvesporachi vollokh gheiat!" oxem mhonnun ek-eklean aplea bhavam-bhoinnink xikovpachi goroz aschi na. Na, tim sogllim, lhanam toxim vhoddam, Mhaka vollkhotolim -uloita to Sorvespor!- kiteak Hanv tanchem khotteponn bhôgxitolom ani tanchea patkancho anink ugddas korcho na.
35. Sorvespor disa vella uzvadd ghalunk Suria dita ani ratchea vella uzvadd diunk chondrim ani noketram; Toch somdir uchambollaita ani tachim lharam ghongetat toxim korta. Tôr Zachem Nanv Sorvsoktivont Sorvespor, Toch oxem sangta:
36. Thir sthaploli hi manddavôll Mhojea mukhaili soron vochot zalear, -uloita to Sorvespor!- tedna mat Israelachi sonsôt Mhojê mukhar sodankal togta toslem ek raxttr zaunk pavchem na!'
37. Voir aslolea mollbachem kedna tori konn map gheunk xokot zalear, ani sokoilean prithvechê buniadicho kedna tori konn tthavg heunk pavot zalear, fokot tedna Israelachea akhea kullak, tannem kelam tea sogllea pasot, Hanv poro ghaltolom! Uloita to Sorvespor!'
38. Polleiat, Jerusalem Xar Hananel Gopura thaun Konnxeachea Darvonttea porian Mhojea manak novean bandon ietolem: osle dis ietat.
39. Tedna zokh kaddpachem sut novean nitt Garebachea Dongra porian pavtolem, ani thoim thaun Goasachê vatten vollon vetolem.
40. Ani pretam ani kochro uddoun bhoron ail'lem ak'khem falkem ani Kidron Vhallak tenkun poddtat tim sogllim xetam-mollam Ghoddeanchea Darvontteachea konnxea porian, udenti vatten, Sorvesporak somorpil'lem zatolem. Tem anink kednanch moddon vechem na, tachem ghorttan zaunchench na.
