1. Dusreak vaitt korinakai ani tukai vaitt zanvchem na.
2. Vaitta poros pois rav ani tem tujea poros pois ravtolem.
3. Mhojea puta, onitin bim vompinakai, tuka tem sat pavttinim lunvpachem pik zanvchem na.
4. Sorvespora lagim vhoddlo zago magonakai ani razakodden manacho zago sôdinakai.
5. Tujem promannikponn Sorvespora fuddeant manddinakai, vô raza fuddeant tujê zannvaiechem prodorxon korinakai.
6. Onitik mostuvpachi tuka sobhavik tank aslea xivai, tum nit korunk fuddem soronakai. Konnuim unchlea ud'deavelea mon'xacho tujer probhav poddlo zalear, tujea promannikponnak dhoko bospak xokta.
7. Lokak okmanaum nakai. Samania mon'xacher onit adarinakai ani tujea boraborchea nagrikam modem tuka aslolo man vogddainakai.
8. Tench patok don pavtti adarinakai. Ekech pavttin pasun tuka khast lagonastana tum sutto nasot.
9. `Mhojea torekvar bhettovnneank lagon sorv unchlea Devacher mhozo probhav poddtolo ani jedna hanv Bhov Vortea Devak iodn bhettoitam, tedna Tannem to manun ghenvunkuch zai.' Oxem mhunno-nakai.
10. Magnnem korpak fattim soronakai ani bhikxea ghalpacher visôr ghalinakai.
11. Dukhi aslolea mon'xak hanso nakai. Soklak uddovpeachean taka voir ukholpak zata.
12. Tujea bhava vixim nhoi mhunnon tujea ixtta vixim fotti sangonakai.
13. Samball, fotti mari nakai. Fottimnim kitench borem zaina.
14. Zanntteanchea zomatimnim chodd uloinakai ani tujem magnnem porot porot korinakai.
15. Kuddik tras divpi ani xetantlea kamank fattim soronakai. Bhov Vortea Devan tem formailam.
16. Patkeanchea zomeamnim bhitôr soronakai, ugddas dhôr, farikponnak vêll lagcho na.
17. Samko khalto za, Kiteak, Devak vollkhonasloleachi mozuri uzo ani kidde.
18. Tujea faidea khatir eka ixttak bexttoch vogddainakai, vô khaxea bhavak Ofirachea bhangara khatir visvas-ghat korinakai.
19. Borê ani xannê ghorkarnik fatt korinakai. Kiteak, tichem gunnest asnnem bhangara poros moladik.
20. Aplem kam' sarkem kelolea chakrak ani tuka visvaxi aslolea vavraddeak vaitt korinakai.
21. Tujea sogllea kallzan eka huxar gulamacho môg kôr, ani toslea chakrak tachi svotontrtai diunk fattim soronakai.
22. Tujê lagim gorvam asant? Tancho samball kôr. Tim tuka faido haddtat zalear tankam dovor.
23. Tuka bhurgim asant? Tankam xikop di. Bhurgeponnar thaun tankam adnia pallunk vô sanglolem korunk xikoi.
24. Tuka dhuvô asat? Tankam moriadin vaddoi, Punn, zai tem korunk tankam mekllik dium nakai.
25. Tujê dhuvek logn kelea uprant tum ek vhoddlem kam' sompoitai. Punn, tika eka somjikaiechea mon'xak di.
26. Tuka êk bori ghorkarn asa tôr tika pois korinakai. Tum ticho môg korinaim zalear, tika kednanch patienakai.
27. Sogllea tujea kallzan tujea bapaik man di ani tujê avoin tuka zolm ditana kaddlole tras kednach visornakai.
28. Ugddas dhôr. Tankanch lagon tum zolmolai. Tannim tujê khatir jem kitem kelam tem tujean koxem farik korunk zata?
29. Sogllea tujea Atmean Sorvesporachi bhokti kôr ani tachea iadnikank bhovman di.
30. Sogllea tujea bollan tujea Rochnnaracho môg kôr ani Tachea munniareank sanddum-nakai.
31. Sorvesporachi bhokti kôr ani tachea iadnikank man di ani tuka formailam toxem taka tacho vantto di; prothom' follam, farikponnacho iodn, boli kelolea zonavorachem ek bhuz, somorponnacho iodn ani povitr vostunchim prothom' follam.
32. Toxench sodôll hatamnim goribank dan kôr ani tuzo Dhoni tuka sopurnn axirvad ditolo.
33. Protek jivea mon'xa thaim tujem doiallponn pavom-di ani meloleam sovem toxem korunk visornakai.
34. Roddtat tankam fatt korinakai. Dukhestanchea dukhant vantto ghe.
35. Piddestank bhett diunk fatti soronakai; Oxem kelear, lokamnim aplo môg kori sarkem tum kortoloi.
36. Tum kiteim kortana, tujea xevottachi iad kôr; tum kednach patok adarcho naim. Ovesvor
