1. Sorvespora, soglleanchea Deva, amchi kaklut kôr ani amcher nodor ghal.
2. Videxi raxttrancher Tuzo hat ubar ani tankam Tuji podvi dakhoi.
3. Jê bhaxen Tunvem tanchê mukhar Tuji podvi amkam dakhoili, toxich amchê nodrê mukar tankamTuji sopurnnai dakhoi.
4. Sorvespora, Tujê mukhar anink dusro Dev na mhunnon ami volkhotanv toxench tankaim Tuji vollokh pavoi.
5. Noveô khunna dakhoi, novim vismitam kôr. Tujea hatak ani Tujea uzvea bavlleak mhoima jikhun ghe.
6. Jakobachea sogllea kullank ektthaim kôr, survatek tanchem daiz aslem tem tankam portun di.
7. To dis lagim hadd. Soputacho ugddas kôr ani Tujea podvedar kortubanchi khobor lokank sangum-di.
8. Jivim urleant tankam Tujea ujea sarkea krodhan gillum-di. Ani Tujê porjek piddapidd ditat tanchem nisontton zaum-di.
9. `Amchê bhair dusro konnuch na mhunnttat' toslea khorkôs razancheô tokleô mosti.
10. Jakobachea sogllea kullank ektthaim kôr, poilem aslolem toxem tanchem daiz porot di.
11. Tujem Nanv gheta tê porjechi doia kôr, Sorvespora, malgoddo put zal'lê porim Tunvem vagoilolea Israelachi kaklut kôr!
12. Tujea povitr xarache churchure kôr, Jerusaleachi doia kôr: Tujea visovacho zago to!
13. Sion-xar Tujea vakhann'nnechea gitamnim bhôr, ani Tujem Povitr ghor voibhovan nettoi.
14. Tunvem survatek rochloleank sakxi di, ani Tujea Nanvan kel'lim bhakitam xarti pavoi.
15. Tuka ravtoleank inam' di, ani Tujea provadiancher visvas tthevunk zata mhonn dakhoi.
16. Aaronan Tujê porjecher axirvad ghal'lo tea pormannem, Sorvespora, Tujea sevokanchem magnnem aik;
17. hê porim Tum ekloch Sorvespor ani sasnnacho Dev mhonn prithumechim sogllim mon'xam vollkhunk pavum.
18. Zorui ami amchea pottan sogllê torechem jevonn ghaltanv, torui thoddim jevnnam dusrea jevnnam poros borim astat.
19. Jê bhaxen ekê jibechean veg-vegllea jevnnachi ruch parkhunk zata, tech bhaxen chotur monacho monis fotti somzota.
20. Ek palpoll sobhavacho monis, dusreak bejar haddtta; punn, tosleank koxê toren farik korunk zai tem somzunk onnbhovachi goroz asta.
21. Ek ostori khoinchoi ghorkar manun ghetoli. Punn, thoddeô dhuvô dusream poros boreô astat. Dekhun, eka dadlean apli ghorkarn chotraien venchun kaddunk zai.
22. Ekê ostorechi sundorai ghorkarak dhadoxi korta. Kiteak, eka dadleak tichea poros anink kitench dusrem manovna.
23. Tichem ulovnnem nomllaiechem zalem zalear, ticho ghorkar êk dhadoxi monis zatolo.
24. Ek dadlo logn zata tedna taka sonvsarantli boreantli bori vost mellta. Adar ani boll diupachi êk ghorkarn taka favo zata.
25. Amchea bhattak durig na zalear, chor ieun apnnak zai tem gheun cholonk lagtat. Têch bhaxen eka dadleak bail asona tedna to khoinchê-khoim bhonvpi zhogddekar zata.
26. Eka ganvantlean aplim hatiaram gheun bhonvpi chorak konn patieta?
27. Tech porim asro naslolea mon'xak, zo protek rati veg-vegllê suvater ravta, taka konnuch patienvcho na. Ovesvor
