1. Dupett unchaiechea vonnttinchi ani Mondirachea unch dhigank tannem buniad ghatli.
2. To rajvôtt choloitana, tannem êk somdira sarki udkachi tolli khonnli.
3. Porjek vinaxeantlean vattavpachea huskean, tannem xarachea bhonvtim akromonn addavpa sarkem ek kott ubarlem.
4. Podd'deantlea dev-sthanantlo bhair sortana to kitlo onodbhorit distalo! Sogllo lôk urponjimnim tachea bhonvtim vetalo.
5. Eka kupam modlea fanteavelea noketra bhaxen ani punvechea chondrima sarko.
6. Bhov Vortea Devachea Mondiracher chokmoktolea suria bhaxen. Chokmokit kupancher porzolltolea donnush banna sarko.
7. Vosont Rutuchea kallavelea gulaba bhaxen. Zhori koddlea Lili fula bhaxen.
8. Gimanchea disantlea dhumpachea zhadda-khandea bhaxen. Dhumpelantlea ujea ani dhumpa bhaxen. Sogllea toranchea thikamnim revddailolea eka vhoddlea bhangarachea aidona bhaxen.
9. Eka follamnim bhorlolea zoitunachea zhadda bhaxen. Kupamnim jheltolea pachvea-char soru-rukha bhaxen.
10. Jedna to aplem dobajeachem lamb anglem ani sobit daginnem nhestalo, tedna to vedi-xim vetalo ani Dev-sthanacho zago onodan bhôrtalo.
11. Jedna svota apunn ubo ravun mukheli iadnikachea hatantlean aplê bhettovnnecho vantto ghetalo, tache bhav tachê bhonvtim ravtale, tedna taka maddamnim veddo ghatlolea tea panamnim bhorlolea devdhar rukha bhaxen to distalo.
12. Devacheô bhettovnneô aplea hatamnim gheun aplea sogllea onodan Aaronache put ak'khech Israelachê sobhê mukar ube ravtale.
13. Ani jedna to vedicher magnnem sompoitalo, udar monan apleô bhettovnneom Sorvpodvedar Bhov Vortea Devak bhettoitalo.
14. Tedna Aaronache put bobô martale. Apleô datuncheô tutureô vazoun Bhov Vortea Devak iad kelolea bhaxen vhoddlo avaz kortale.
16. Ani teach vellar sogllo lôk sangatan ap-aplim mukhamollam dhortorek tenkoun saxttangim poddtale ani aplea Bhov Vortea Sorvpodvedarak, soglleant unchlea Devak prarthona kortale.
17. Ani gavpi vakhann'nnechim gitam gaitale ani ak'khem mondir tea gavpeanchea modhur avazan bhorlem.
18. Zoxem lokan Sorvespora Bhov Vortea, Deva lagim prarthona kelim ani tim sompo-sor ani iodn kobar zai-sor Bhov Doialla hujir magnnim kelim.
19. Magir Simanv sokla denvlo ani aplea tonddan tankam Sorvesporacho axirvad divpak sogllea Israelitanchê sobhecher aple hat voir kaddle. Kiteak, tachem nanv gheupacho fokot takach odhikar aslo.
20. Sorvespora, Bhov Vortea Devacho axirvad gheunk tannim soglleamnim ap-apli man bagoili.
21. Atam sogtta-sorvanchea Devak vakhannat: To sogllê kodden vhodd-vhodd vostu korta; zolma thaun To amche dis voir kaddta ani Aplê kakluti pormannem amchê thaim vagta.
22. To amkam khuxal kallzam dium ani, adlea kallar kel'lem toxem, hea amchea-i kallar Israelant xanti voso-xi korum.
23. Tachi doia visvaxiponnan amchê sovem togum ani amchea disamnim To amchem taronn korum.
24. Hanv vittetam tosle don des asat ani tisreak êk dês mhunnokuch favona. Te mhollear,
25. Seira Dongravele lôk, Filistevkar ani Shekemant ravpi murkh lôk.
26. Sirak, Eliazarachea putan - Jezun, zannvaien ani gineanan hea pustokar boroilam. Tannem aplea kallzantlê zannvaiecho pavs hanga votoila.
27. Hê xikovnnecher aplem chint diunk aplo vêll dita tacher Devacho axirvad poddom, ani zo konn hi xikovnn aplea kallzant dovorta, to xannom zatolo.
28. Tachea pormannem jieta to kosleai vellar mozbut zatolo. Kiteak, to Sorvesporachea uzvaddan choltolo. Ovesvor
