1. Tuka eka somarombhachem Odheokxpôd dilam? Tôr boddaieô korinaka. Tuji vagnnuk dusream sarkich zaum-di. Sogllea soireanchi vevostha poilim polleun ghe ani uprantuch bos.
2. Tujem kortovea pall'llea uprantuch tuzo zago ghe ani dusream vangdda dhadoxi rav. Tunvem borem kam' kelam dekhun, lokak tujem gorv zaum-di.
3. Choddxea soiream modem tum mhataro zalear, tujean uloum-ieta. To tuzo hok'k. Punn tum apunn kitem uloita tacher chotrai dhôr ani vatavoronn padd kori-naka.
4. Konnuim gaita zalear uloit ravo-naka. Favo nhoi tea vellar tujem xanneponn dakhoi naka.
5. Soreachea jevnna vellar songitachi kariavôll mhonngê bhangaracher Ruby thik bosoilolea bhaxen.
6. Borea sorea vangdda borem songit asop mhollear, bhangaracher ek Emerald thik bosoilolea porim.
7. Tôr tornnattea, goroz aslearuch uloi. Ani tem-i zalear, êk vô don pavttich. Tachea uprant tuka uloi mhunnot zalearuch tum uloi.
8. Mud'deak dhôrun thoddeach utramnim uloi. Tum khub zannaim, punn, tum uloinaim oxem lokank disum-di.
9. Fankivont mon'xam vangdda astana, Apunn-ui tancheach sarko zalolea vori vagonaka. Konnui uloita astana, mellot tosle prosn korun vitt haddum-naka.
10. Jê porim goddgoddea poros poilem zogil pavta, toxich mansugechea mon'xachi kirti thoim pavta.
11. Suvalleak hajir zalai zalear thoincho bhair sorpak nimnno zaum-naka. Vegim bhair sor ani daracher ghuspum naka. Sorôll ghara voch.
12. Tujea mona pormannem, thoinsor tuzo vêll moujen sar. Punn, boddaieô sangun patok adarum-nakai.
13. Ani hea sogllea borea upkaram khatir tujea Rochnnarak argam di ani Tannem dilolea denneam khatir dhadoxi za.
14. Sorvesporacho tuka môg asa zalear tachê xittkavnnek pallo ditoloi. Apnnak sôdta tacher To axirvad ghaltolo.
15. Adnia sôdta taka tichem posvonn favo zatolem. Punn, dhongi tika adllun poddtolo.
16. Sorvesporachi bhokti kortoleank, to mandun ghetolo ani tacheô boreô kornneom porzolltoleô.
17. Patki monis xiddkavnnek fatt korta ani aplê hott'tti sobhava khatir to nimit dita.
18. Somzut monis xiddkavnnek bejar zaina. Punn, videxiank ani gorvixtt mon'xank bhiranticho sumar asona.
19. Borê bhaxen nihall'lea xivai koslench kam' korinaka. Uprant aplea kortubancho tuka poschatap zanvcho na.
20. Ghatmare vatten vocho naka. Tea fatrancher tum addkhollun poddtoloi.
21. Borea ani soroll rostean choltana legit svotacher hixeopa bhair chôdd visvas dovri nakai.
22. Tujea svotachea bhurgeancher nodor dovor.
23. Tujea protek kuttumbachea vangddeacher tuji chotrai dovor. Adnia pallpachi hi porian êk vatt.
24. Sorvesporacher patieta to tache kaide pallta. Sorvesporacher visvas tthevta taka kitench vaitt zanvchem na. Ovesvor
