1. Xanti orponant chorbechea masacho kuddko kuxin dovortat, toxem Davidak Israel porjentlo venchun kaddlolo.
2. Bhurgeanchea vangdda khelltolê bhaxen to xinvanchea vangdda khell'llo ani menddream borabor khelltolê bhaxen to vanxelam borabor khell'lo.
3. Bhurgoch astana tannem eka rakesak marlo ani aplea lokanchi loz dhuvun kaddli aplê gofnnint êk fatôr ghalun marun tannem boddai dakhovpi Goliatak marun uddoilo.
4. Kiteak tannem Bhov Vortea Devak ulo marlo, Zannem tea podvedar zhuzareacho xevôtt korpak tachea uzvea hatak boll dilem, taka onodacho mukutt favo korun, aplea svotachea lokachem boll Tannem ugddapem kelem.
5. Tannem dha hozarank jivexim marle dekhun taka xrei diun, tannim tacho bhovman kelo; Sorvesporachi stuti gait taka mhoimecho mukutt favo kelo.
6. Char-ui bazumnim tannem dusmanacho xevôtt kelo; aplea dusman aslolea Filistevkarancho Tannem bhosm kelo ani sasnnachea sasnnak tanchem boll mostilem.
7. Sogllea aplea kamant tannem Bhov Vortea Povitr Devak onodachea utramnim dhin'vaslo. Aplea Rochnnarachea mogan, aplea kallzan thaun tannem aplea Sorvesporak gitam gailim.
8. Suvadik gaionam gavchê khatir tannem gavpeank vedi fuddeant dovorle.
9. Tannem utsovank chokmôk dilo. Porbank tannem povitr dobazo dilo. Hea vorvim Sorvesporachea Povitr nanvachi stuti zaunk lagli ani fanteapahrar thaun stuti gitamnim Dev-sthan gazunk laglem.
10. Sorvesporan tachim patkam bhogxilim ani tachem boll odikuch vaddoilem. Tannem taka rajki korar dilo, ani Israelant voibhovi xinvason dilem.
11. Tachea fattlean tachea huxar putan raj aplea hatant ghetlem ani tachê huxarkaiê khatir to khuxal jielo.
12. Sovostkaiechea kallar Solomonan raj choloilem, ani tannem aplea nanvan ek ghor ubarunk, ani sasnnak togpi ek Dev-sthan toiar korunk, Devan taka sorbhonvtim sovostkai dili.
13. Itlo tornatto astanaim ekê nodi vori tum kitlo zannvaien upatt bhorlolo asai!
14. Tujem mon sonvsar-bhor bhonvta ani to sonvsar tum ojapanchea vak'keamnim bhôrtai.
15. Tujem nanv poixilea zunveamnim pavlem ani tê sovostkaiê khatir lokan tuzo mog kelo.
16. Tujim gitam, tujeô vopari, tujeô mhonn'nneô ani tuje zobab sonvsarantlim ojapam aslim.
17. Sorvespora Devachea nanvan, taka Israelacho Dev mhunnon pachartat. Tunvem potrea bhaxen bhangar ani kollxea bhaxen chandi ektthaili.
18. Tuji kudd tunvem ostoreank bhettoili ani tum tujea ruchincho gulam' zaloi.
19. Tujea manacher tunvem khot ghatlem. Tujea lokanchem tunvem nanv ibaddlem ani hê porim tunvem tujea bhurgeancher khast haddli, ani tujea murkhponnank lagun, tankam dukh bhôgchi poddli.
20. Rajvôttkeche don vantte zale ani Efraimachem ek bonddkhor raj toiar zalem.
21. Punn, Sorvespor kaklut diunk fatti sorlo na; Tannem aplem ekui utor bhair uddoilem na. Apnnem môg kelolea mon'xanchea bhurgeank nakari na vô tanchi sonsôt sompoina. Ani tea khatir Jakobak tannem urlolem dilem ani tacheantlean Davidachea kullak komri futtli.
22. Solomonan aplea purvozam sangatak visôv ghetlo ani apnna fattlean raj cholovpak eka putak dovorlo. Tea desantlo soglleant ginean naslolo murkh Rehoboam'. Tannem porjek bonddak pavoili.
23. Tachê uprant, Nebatachea putan Jeroboaman Israelak patok adarunk lailem, ani Efraimak khottê vatten vhelo. Tednachean tanchim patkam oxê porim vaddlim, ani tankam tancheach desantle tankam bhair ghatle.
24. Kiteak, tannem protek torechim khotteponnam adarlim ani okherek farikponnan tacher zoit melloilem. Ovesvor
25. Tedna Elija provadi êk uzo koso utthlo, ani tachem utor ujeachê chuddi bhaxen zolltalem.
