1. Aplea putacho odik mog korta to bapui taka chodd pavtti mar dita. Magir kaim vorsamnim to put tacho alaxiro zata.
2. Aplea puta sovem koddok xistin vagta taka khub faido zatolo ani aplea vollkhicheam lagim boddaien tachi khobor uloitolo.
3. Aplea putak bori dekh dita ti polleun, dusmanak kunn'nnattai zatoli, ani aplea ixttam sangatan tachi tachean boddai sangunk zatoli.
4. Oslo bapui melo zalearui to melo koso dischona, Kiteak, tachea fattlean tachea pavlamnim tacho put jiet astolo.
5. To jivo astana tachea putachea sangatan taka dhadosponn mell'llam. Atam morta astana Taka huske-khonti ascheonant.
6. Aplea dusmanacho bodlo gheunk ani aplea ixttache upkar attounk tannem taka dovorla.
7. Punn, aplea putachi vatt laitolo apnnakuch ghaiall korun ghetolo. Tachi protek kinvchi aikota tedna hachea kallzak dhoko bostolo.
8. Zoso nittaier haddunk naslolo êk ghoddo hott'tti zata, tosoch êk xistik haddunk naslolo put apnnachea vadheacho zata.
9. Tujea bhurgeachi chôdd opurbai kelear to tuka thorthoraitolo. Tachea vangdda khellxi zalear to tuka dukh haddtolo.
10. Tachea vanngdda tum hansot ravxi zalear êk dis tachea vangdda tunvem roddchem poddtolem ani okherek pochtapan tuje dant korkoraitoloi.
11. To tornatto astana taka soglli mekllik dium-naka ani tachê chukincher add nodor korinaka.
12. To bhurgoch astana ani favo tea vellar taka khast lai ani tujea odhikarak man diunk lai. Na zalear to hott'tti ani adnia pallina toslo zatolo. Tuka vhôdd dukhak pavoitolo.
13. Dekhun tujea putak xistin vaddoi ani taka kam' korunk lai. Na zalear tachea urmottponnacho poschatap tuka sonscho poddtolo.
14. Kuddiche kollvolle sonsun grest zalolea poros, gorib punn borê bholaikecho ani jivan nirogi aslear odik borem.
15. Bholaiki ani ghottai khoincheai bhangara poros moladik ani hixeop korunk zaina toslê girestkaiê zagear êk mozbut kudd aslear odik bori.
16. Kuddichê bholaikechem mol kitle-i grestkaien korunk zaina. Ani kallzachê khuxalkaiê poros vortem khoinchench dhadosponn aschem na.
17. Dolldirea jivita poros moronn odik borem ani zoddar poddlolê piddê poros sasnnacho visôv odik boro.
18. Dhamplolea tonddant jevonn ghalop mhollear meloleachea tonddan jevonn ghatlolea porim.
19. Ekê murtek jevonn diun koslo faido? Tachean jevunk ani vas gheunkui zaina
20. Devacho rag fattik lagloleak koso vollkhop? Ekê sundor choliek vengent dhôrlolea ek hizddea bhaxen to tea jevnnak polloit ravta ani suskarta.
21. Tukach tum mud'dom dukhant ghalinakai. Ghoddon gelam tacher chintun tukach tum piddapidd dium-nakai.
22. Kallzantlem dhadosponn tujem jivit fuloita ani khuxalkai tujem jivit vaddoita.
23. Tuje huske kuxin dovor. Tujea kallzak ghottai di. Tujea dukhink pois kôr. Kiteak, dhukhimnim ani khontimnim zaite zannachem nisontton kelam ani tacho konnakuch faido zaina.
24. Kunn'nnatai ani rag tujem jivit mottvem korta ani huske tuzo kall ienvchê adinch tuka mhataro korun sôddta.
25. Eka hanstea mukamollachea ani borea sobhavachea mon'xak bori ruch asta ani aplea jevnnacho to anond gheta. Ovesvor
