1. Atam amchea nanv vostea mon'xank, ani pinddkam-pinddkamnim amchea purvozank vakhannum-ia.
2. Sorvesporan ut'tom toren apli mhoima fankoili, Ani purvil'lea kalla meren Tannem ti porgôtt keli.
3. Thoddeamnim razachim sutram aplea hatant ghetlim, Aplea bollak lagon te lovkik zale. Thodde xanneponnan budh diupi zale, tôr thoddeamnim Devacho sondêx ximpddailo.
4. Dusreamnim porjechim monam vollkhun ani aplea xikovpantlea zannvaiechea utramnim ani aplê budhin lokank margdorxon kelem.
5. Dusreamnim songit ghoddllem ani kovon-kanniô rochleô.
6. Dusre grest ani bollixtt asle. Te xant'taien ap-aplea ghoramnim jiele.
7. Tanchea kallavelea sogllea lokamnim tankam bhovman dilo ani tea kallar tim kortutvam bov lovkik aslim.
8. Tantlea zaiteamnim apli kirti dovorli ani lôk tankam ozunuim vakhanntat.
9. Thoddeamnim kosloch ugddas porian dovrunk na; hea sonvsarant jieunk naxil'lêch bhaxen te somple. Zolmunk naxil'lê bhaxen te jiele, Ani toxench tanchê pattlean tanchim bhurgim-ballam oxim jielim.
10. Punn he monis doiall udar kallzache ani tanchea borea kornniancher visôr poddunk na.
11. Tanchem daiz tanchea natvank poddtolem, ani tanchi grestkai tanchê sonstik urtoli.
12. Tanchi sonsôt Korarak thir ravli, ani tankam lagun tanchea bhurgeanchim bhurgim-i.
13. Tanchi sonsôt sasnnak togtoli ani tanchi mhoima palovon vechi na.
14. Tancheô kuddi sovostkaien nikhipileat; ani tanchim nanvam pinddkeancheô-pinddka jivinch asat.
15. Soglleô pillga tanchi zannvai porgott'toleô ani bhoktanchi sobha tanchi stuti gaitoli.
16. Enokan Sorvesporak sontosbhorit ani Sorvesporan taka Sorgar ghetlo. To sogllea pillgeank ek poschetapachi êk sfurti zalo ani jivit bodlunk, to pillgeanchê pillgek nomunno zalo.
17. Noah purnnponnim promannik monis aslo. Nisontton ailem tea vellar to soglleancho daiji zalo. Kiteak, takach lagun, buddttechea vellar, buddtti somplea uprant, sonvsarant monis vanchle.
18. Hachea fuddem anik kednanch buddttê udexim jivê mon'zaticho nas korcho na mhunnon Sorvesporan tachê lagim korar kelo.
19. Abraham zaitea desancho purvôz zaun aslo. Tachea onoda sarko onod konnakuch favo zaunk na.
20. Tannem Bhov Vortea Devache kaide pall'lle ani tachea vangdda tannem korar kelo. Te kaideamnim tannem aplea angar môr marli, ani vêll pavlo tedna aplê porikxechea vellar visvaxiponn dakhoilem.
21. Dekhun tachê sonsthê udexim desacher uzvadd ghaltolo mhunnon, tachi sonkia dhortorechê renvê bhaxen vaddtoli ani tachê pillgek noketram bhaxen voir kaddtole mhunnon Sorvesporan soputa khal taka utor dilolem. Toxich tanchi bhuim doriachê ekê kinarê thaun dusrê kinarek ani Eufrates nodi thaun sonvsarachea nimannea tonka meren pavtoli. Ek daiz koxem apunn ti tankam ditolom mhunnon Tannem tankam bhasailolem.
22. Tachea bapai Abrahama khatir, Izakakui Tannem sogllea mon'xakullacho axirvad bhasailo.
23. Toxench Tannem to korar Jakobacheai mostokar dovorlo. Tannem taka aplo axirvad dilo ani tachea daizachi taka zomin dili. Tiche Tannem vantte kele ani tachea barai kullank vanttun dile. Ovesvor
