1. Zaitê pavtti favo nhoi tea vellar ani gorjê bhair dhobkavnneom favo zatat. Torui astana vogi ravta to chotraiecho xanno monis asta.
2. Rag damun ravlolea poros dhobkavop kitlem borem!
3. Apli chuk manun gheta to khast vattaita.
4. Bollan nit korunk sôdta to ekê choliechem nirmollpon bhoxttaunk sôdtolea eka izddea bhaxen.
5. Vogi ravta taka xannom mandtat, ani chodd uloita tacho dvês kortat.
6. Eklo zobab diunk nokllo zaun vogi ravta ani dusro kedna ulounk zai tem somzun vogi ravta.
7. Favo to vêll ailea xivai êk xanno monis uloina. Punn, boddboddpi pixeak to vêll kedna ieta tem somzona.
8. Chodd uloita taka konnuch lagim dhôrina. Dusreacho hok'k bollkaita tacho dvês kortat.
9. Vaitt noxib zaitê pavtti ies haddtta ani borem noxib tuka luskonnant ghalta.
10. Kaim pavtti êk denngi tuka kosloch faido dina. Dusrê pavtti ti tuka dupett dita.
11. Zaitê pavtti bhovman tuka okman korpacho asta, Ani zaitê pavtti samke nimnnea zageavelea mon'xamnim apli tokli voir kaddun te manache zagear pavleat.
12. Zaitê pavtti sovai doren khub vostu gheta, punn uprant sat pavttim tacher khorch korta.
13. Xannom monis aplea utramnim mog jikhta. Punn, pixean kel'lea upkarank mol asona.
14. Murkhachê denngiecho kosloch faido zaina. Kiteak, to aplê vostucho fôll sat pavttim kaddtolo.
15. To thoddench dita ani chodd axeta. Eka perganv ghaltolea bhaxen to aplem tondd ugoddta. Zo aiz dita ani faleam portun magta, to samko vitt haddpa sarko monis.
16. Piso mhunnttolo: `Mhaka ixtt nant. Mhojea borea kornneam khatir mhaka abhar favo zainant.
17. Mhojem khatat tech mhojem vaitt uloitat.' Ani khoreponnim te lokachea hanxeachem karonn zatat.
18. Jib nisorlolea poros paimvatter nisorlear odik borem. Hêch porim eka khottea mon'xak nisontton ojapamnim sampddaita.
19. Ulovpachi rit naslolo êk monis, eka pixean thambonastana portun-portun sanglolê ekê kanniê bhaxen.
20. Eka pixean sangloli vopar konnuch kanar ghena, kiteak, to ti favo tea vellar sangina.
21. Goribkaiek lagun jea mon'xan patok adarunk na tea mon'xachem ontoskornn tachi xanti bigddanvchi na.
22. Pixeanchea fuddeant uloupak fattim sorxi zalear, tum tuzo svabiman vogddaunk xokta.
23. Na mhonnonk tuka loz dista dekhun eka ixttak khotti bhasavnni dita ani gorjê bhair dusman korta.
24. Fotti marop mhollear eka mon'xachea sobhavacher kallem khot. Punn, xist nasloleachea vonttar tem sodanch asta.
25. Sonvoim vochona toslea fottinga poros êk chor odik boro. Punn, dogui nisonttonachê vatten choltat.
26. Fotti marop êk vitt ieupa sarki sonvoim. To sodanch opmanant jieta.
27. Xanneponnan uloi ani tum sonvsarant fuddem sortoloi. Chotur monis mahan mon'xak avoddtat.
28. Dhortori kôsta taka bhorpur pik zata. Vhoddlea mon'xank tum mandloi zalear, te tujeô chuki bhogxitole.
29. Upkar ani denngeô borea mon'xache legit dolle vankdde korunk xoktat. Tonddak gudd'ddo marlolê bhaxen vaittacher vaitt ulovpachem te advartat.
30. Lipoilolê zannvaiecho ani sôdunk naslolê girestkaiecho faido koslo?
31. Aplem pixeponn dhampun dovorta to apnnakuch zannvai samballun dovorta tachea poros odik boro. Ovesvor
