1. Tannench tancher bhuk haddli, ani aplê hurben tancho bhosm kelo.
2. Sorvesporachea utran tannem ontrall dhamplem, ani tin pavtti tannem uzo poddo-so kelo.
3. Elija, tujea kortutvamnim tum kitlo mhonn mhoimevont! Ani boddai sangunk tuka karonn asa toxem anink konnak asa?
4. Bhov Vortea Devachea utran ek moddem tunvem jivont keleim ani patallantlem vattaileim;
5. Razank tunvem nisonttonak pavoilei ani odhikariank aplea khattim-vele khala apttilei;
6. Sinai dongrar zupatti dil'li tunvem aikolii ani Horeb porvotar khastichim formonnam;
7. Sudd gheunk tunvem razank makhlei ani tujê svater provadiank makhun dovorlei;
8. ujeachea bhonvrean ani ujeachea ghoddeamnim ôddlolê gaddien tuka voir ubarun vhelo;
9. Devacho krôdh zoran pettchê adinch thonddaunk avoibapaichim kallzam aplea bhurgeam vatten oddun haddunk ani Jakobachim kullam portun sthapunk nisonttonachea bhakitamnim nemlolo asa to tunch.
10. Tuka polletat tim ani mogan meleant tim subhagi; kiteak amkam-i jivit melltolem.
11. Elijak eka bhonvrean lipoilo ani Elisha tachea gunnan bhòrlo; ak'khea tachea jivitant khoincheach razan taka halounk zaunk na ani konnacheanuch taka domavunk zalem na.
12. Taka kaich kotthin mhonn naslem, ani mornnant porian tachê kuddin bhakit kelem.
13. Aplea jivitant tannem vismitam kelim, ani mornnant tacheô kornniô ochoriancheô zaleô.
14. Punn, itleim astana, tannem aplea desantlean kaddun, koidi koxe ak'kheach sonvsarant ximpddailea bogor, porjen apleô patki sonvoiom soddleô nant.
15. Davidachê kulliechea raza vangdda fokot thoddoch lôk urlo. Thoddeamnim Sorvesporachê khoxê pormannem kelem ani dusreamnim patkacher patok dallun dovorlem.
16. Hezekian aplem xar mozbut kelem ani zomni pondak udkachi purvônn keli. Lokhondd gheun tannem Khoddpantlean bhuim-ar bandlem ani udik santtunk ttankeô bandleô.
17. Tachea rajachea kallar, Sennakeriban xaracher akromonn kelem ani Rabshakenak dhaddlo; Siona add aplo hat ubarlo ani khorkosaien, mottean boddaien uloilo.
18. Tedna tanche hat ani paim kample ani ekê zolm diupachê ostorê bhaxen tankam dukhiche kollvolle aile.
19. Punn, tannem kaklutsar Sorvesporak ulo marlo, ani tachê vatten aple hat ubarle. Soddsoddit, sorgant bhov xrêxtt Sorvesporan tachem aikolem ani tankam vattaunk Izakak dhaddun dilo.
20. Sorvesporan Assiriechê foujecher dhopko marlo ani Tachea dutamnim tanchem nisonnttonn kelem.
21. Sorvesporak manovta toxem Hezekian kelem ani aplea bapai Davidachê dekhin to chol'lo. Aplea disnneacher visvas dhôri sarkea Izaias provadiak formailem.
22. Tachea disamnim suria fattim gelo ani razachem jivit lamb kelem.
23. Atmeachea bollan tannem nimanneô vostu polleleô, Sionantle dukhestank bhuzvonn dili.
24. Kallachea xevotta meren kitem ghoddtolem tem Tannem ugddapem kelem ani khoreponnim ghoddchê adinch khub liploleô vostu kollit keleô. Ovesvor
25. Pormôll toiar korpachê ekê kolen toiar kelolea pormollit dhumpa porim Josiahchem nanv. Zoxem jibek mhonv godd lagta ani ekê soreachê porbek songit zoxem modurai vaddoita, tech porim Josiahchi iad.
