1. Sorvespora, Raia mhojea, hanv Tuka dhin'vastam; Deva, mhojea Soddvonnara, hanv Tuka vakhanntam, Tujea Nanvak argam ditam;
2. kiteak Tunvem mhaka samball'loi ani rakhloi, ani mhoji kudd nisonttonantli vattailii. Lobaddi jibechea fasantlo, fottkiri govai sangtolea tonddantlo, Tunvem mhaka nivarloi. Mhojê bhonvtonnim asloleam hujir Tum mhozo dhir zaloi.
3. Tujê subham' kaklutin ani Tujea kirtivont Nanva pormannem mhaka gillunk ravtoleanchea hatantlo, mhozo jiv kaddunk sôdtoleanchea chopkeantlo, hanvem sôslolea khub dukhim-khontintlo,
4. mhaka veddho ghal'lea agtteantlo, hanvem pettounk naslolea ujeantlo,
5. Patallantlê khorintlo, mellê jibentlo ani fottkirea sobdantlo,
6. raza mukhar mhojer boglantt ghaltolê lottik jibentlo Tunvem mhaka vattailoi. Mhozo otmo mornnak lagim tenklolo, mhozo jiv Patallachê khorik pavlolo.
7. Sogllea vattamnim mhaka veddho ghaltalim, ani mhaka adar diunk konnuch naslo; mhaka konn adar ditolo hanvem sôdlo, punn konnuch mell'llo na.
8. Tedna, Sorvespora, Tujê kakluticho, ani purvim kel'lea Tujea kortutvancho mhaka ugddas ailo; Tuji vatt sonsnnikaien polletoleank koso Tum soddoitai ani tanchea dusmananchea chopkeantlim koso Tum tankam vattaitai, hacho mhaka ugddas ailo.
9. Ani prithumer thaun hanvem mhojim prarthonam ubarlim; mornnachea ghansantlo mhaka nivar mhonn hanvem maglem
10. ani Sorvesporak, mhojea dhoniachea Bapak, hanvem oso ulo marlo: `Konixttaiechea disamnim, gorvixttancher add upai na tedna, Tum mhaka sanddum naka.
11. Tujem Nanv hanv thambonastana vakhanntolom ani dhin'vaxi kallzan Tuji stuti gaitolom.' Mhojem magnnem Tunvem aikoleim
12. kiteak nisonttonantlo Tunvem mhaka soddoiloi ani vaitta-vignantlo mhaka nivarloi. Tea pasot Tuka hanv dhin'vastolom, Tuka vakhanntolom ani Sorvesporachem Nanv vonditolom.
13. Hanv ozun tornnatto aslom tedna ani sonvsarantleô vattô cholchê adim, mhaka zannvai di mhonn sogllea kallzan hanvem maglem.
14. Devmondira mukhar ravun hanvem ti magli, ani ti mello porian hanv tika sôdtalom.
15. Tichem ful dakê vori mhojê bhitôr foll zai porian, ticher mhojea kallzak sontôs bhoglo. Nitt margar hanvem mhoje pai dovorle ani bhurgoch astana tichea panvlamnim hanv bhonvlom.
16. Kan diun hanvem tika aikun ghetli, ani mhaka khub xikovnn mell'lli.
17. Tika lagun hanvem zaiti ud'dorgôt kelea; mhaka zannvai dilea Takach soglli mhoima!
18. Tichê pormannem jieunk hanvem ievjilam, borem tem korunk hanv hurben vavurlam ani hanv kodinch lojek sampoddcho na.
19. Ti zôddunk mhozo otmo zhuzla, bariksannen hanvem Somurt samball'lea; mhoje hat sorgak ubarun, mhaka tichi vollokh na mhonn hanv roddlom;
20. ticher mhozo otmo hanvem dovorlo, ani nitôll-nirmôll ravun ti mhaka mell'lli. Survatek thaun hanvem mhojem kalliz ticher thoroilem Ani hanv kednanch sanddcho na.
21. Kallzant thaun hanv tika sôdunk axetam Atam mhaka ek daiz favo zalam.
22. Devan mhaka ek jibechem dennem favo kelam. Tichê udexim hanv Tachi stuti gaitolom.
23. Tumi, oxikxitamnô, mhojea fuddeant ieat. Mhojê xallent tumi zago gheiat.
24. Tumchea otmeank tichi tan laglea. Tedna heô soglleô vostu nant mhunnon tumi kiteak tokrar kortat?
25. Hanvem mhojem tondd ugoddlem ani sanglem: `Duddvam xivai tum ti vikti ghe. Tichea zunvam pondak tuji man ghal
26. Tujea otmeank xikxon mellom-di. Ti laginch, tujea hata laginch asa.
27. Tumich polleiat: Hanvem itle komi proitn kele ani mhaka itli sogott xanti favo zali.
28. Khub rupem diun, zannvai vikti gheiat. Tika lagon tuka bhorpur bhangar favo zatolem.
29. Sorvesporachi kaklut polleun tumchea otmeank khuxalkai labum, Tachi stuti kelea mhonnon tum kednanch lojek sampoddcho na.
30. Thorailolea vella adim, tujem kam' kôr, Ani iogeo vellar To tuka Tujem inam' favo kortolo. Hi Sirakachea puta Jezuchi zannvai.
