1. Heô sokoileô vostu korunk tuka loz disunk favo na. Dusre kitem chint'tole ani ievjitole tem chintun patok adarinaka.
2. Sorvesporache updes, kaide ani korar onbhavartheank legit favo ti nit dita.
3. Tujea sangatak veapar kortolea vô sangata provas kortoleachea vangdda khorchache vantte korop. Vô tujea ixttanchea sangatak tujea daizachi vanttnni korop.
4. Mapam ani voznam sarkim vaprop ani thoddo-chôdd faido kaddop.
5. Tujea dhondeant nofo mellovunk, tujea bhurgeank xistin haddunk ani eka beiman gulamak tachem rogot vhanvo porian chabkamnim mar diunk.
6. Tujê ghorkarnnicher tujean visvas dovorunk zaina tôr tujea xik'keacho upeôg kôr ani zôr sorbhonvtim khub lôk asa, tôr tujeô vostu tum chavient dovor.
7. Tum viktai tem ankddeamnim ani voznan vikh. Tum kitem khorchitai ani viktem ghetai tem eka kagdar boroun dovor.
8. Eka murkhak vô pixeak tachi chuk dakhoun diunk fatti soronaka; vô ballbudsannin tornnatteam vangdda karandai korpi mhatareak nittaier haddunk fattim soronakai. Oxem korxi tôr apunn khoroch xikop aslolo mhunnon somazant dakhoitolo, ani somestanchi tuka xebaski favo zatoli.
9. Tika khobor nastana êk dhuv aplea bapaik zago dovorta. Tichea huskeamnim taka nhid poddona. Tornnatti asot zalear ti logn zainastana urot mhunnon, ani logn zalear ti ghorkarachea ghorant mandvona zait mhunnon taka huske astat.
10. Ti ankvar asot zalear tika konnuim fosoit ani apleach ghorant astana ti gorbhest zavun bhurgeak zolm diit mhunnon. Aplo ghorkar astana ti ganvar bhonvot mhunnon. Ani logn zavunuim bhurgeank zolma haddina zait mhunnon taka huske astat.
11. Ti apleach vadheachi zali zalear, tujê dhuvecher chotur nodor dovor. Na zalear tujea dusmana mukhar ti tuka hanxeachem karonn korun uddoitolim. Ganvchea lokam mukhar tum êk sodankal fokannacho vixoi zatolo. Lokanchea khobrancho êk avddicho vixoi zaun tum sobhêmazar lojek sampoddtoloi.
12. To sundor dista mhunnon khoincheai dadleak pollet ravonaka ani ostoream vangdda chakattam marunk bosonaka.
13. Jê bhaxen kopddeantlean sannôs bhair sorta, toxench ekê ostrorentlean dusrê ostorechi nosai bhair sorta.
14. Ekê ostorechea doiallponna poros eka dadleachi nosai odik bori. Kiteak, ostoreô loz ani beabru vaddoitat.Tea fuddem hanv Sorvesporachea kortutvanchi iad kortam ani hanvem kitem pollelam tem sangtam. Sorvesporachea utran tachim kortutvan ghoddon ailim ani soglli rochnna Tachê khoxek pallo dita.
15. Suriachim kirnnam sogllea vostuncher denvtat ani teô soglleô vostu Sorvesporachê mhoimen bhortat.
16. Aplea podvedar kortutvanchem vornnon korunk Sorvesporan aplea povitr dutank legit podvi diunk na. Sogllê srixttin tachê mhoiment thir ravunk, Mon'xakulla khatir tim mozbutaien rochleant.
17. Taka mon'xachea kallzanchi ani somdirachi kholai zannovta ani amchê torekvar ghutt somzota. Kiteak, Vortea Devak zanna zavpachea sogllea vostunchi Taka khobor asa ani To iugancheô khunna somzota.
18. Je kitem aiz meren zalam ani jem kitem sasnnak ghoddttolem tachi Taka khobor asa ani tea vostunche gupit roste To kolloita.
19. Ek pasun vichar taka chukonk xokona ani ekui utor Taka lipun urona.
20. Tannem aplea zannvaiechim kortututvam sobit nettoileant, ani sasnnachea sasnnak tantun kitench ektthaunk zaina; tancheantlem kitench kaddunk zaina. Taka kednanch budhichi goroz asona.
21. Tachim sogllim kortutvam kitlim sundor ani dolleank tim kitlim chokmokit!
22. Tim sogllim sasnnachea sasnnak jietat, ani koslei poristhitint tim sogllim adnia palltolim.
23. Soglleô vostu Tannem zoddien rochleat ani ekamekak purnn kortat. Tannem kitench opurnn korunk na.
24. Ek vost dusrê vostuchi bhovmanachi thoknnai korta. Tachê mhoimek pollet ravunk konn punn ubgovtolo? Ovesvor
25. Amchê voir aslolem chokmokit ani nitoll mollob kitlem sundor ani kitlo onodbhorit to dekhavo!
