1. Vaitt nanv tuka loz ani dox haddtolem. Don bhasamnim ulovpi patkeak favo zata toslem.
2. Tujea ragachea krodhan kiteim korinakai. Eka boila bhaxen toch tuzo atmo pinzunk xokta.
3. Tujim svotachim panam khaun follancho nas korta ani okherek tuzo bhês eka sukea lakdda bhaxen zatolo.
4. Niontronn naslolo khotto rag asta to, svota apunn biradd korta tachoch nas korta ani to tachea dusmanak hanspacho vixoi zata.
5. Ek modhur tallo ixttanchi sonkia vaddoita, ani goddvaiechem ek utor mannsugi choddoita.
6. Tujê kodde xantin jietat tanchi sonkia vaddom, punn hozaram modem budh diupi mhollear êkuch zaum.
7. Tum ixtt zôddunk sôdtai zalear, tachi porikxa kôr ani rokddoch tacho visvas dhôrum naka.
8. Konn-konn aplea faideak lagun ixtt zata, punn akantachea disa tuka visvaxi ravcho na.
9. Konn-konn ixtt aslo to dusman zata, ani dha zonnam modem tuka loz korunk tumchim zhogddim uktim korta;
10. Konn-konn tujea mezar bosunk tuje ixtt, punn akantachea disa tuka visvaxi ravcho na.
11. Tujea sukhant to tuzoch zatolo ani tujea chakrank porian budh xikoit;
12. punn tujer noxtt iet zalear to tujer portotolo, ani tujê nodrê bhair vochun liptolo.
13. Tujea dusmanam thaun tum pois rav, ani tujea ixttam kodde choturponnan bhonv.
14. Ek visvaxi ixtt mhollear êk ghôtt asro; oslo ixtt mellta taka êk tthevo sampoddta.
15. Visvaxi ixtta itli moladik vost na, ani tachem mol korunkuch zaina.
16. Ek visvaxi ixtt mhollear jivitachem vokhod koxem, ani Sorvesporachi bhokti kortoleank to melltolo.
17. Sorvesporachi bhokti korta to khore ixtt korun dovorta, kiteak zoso apunn, toso tacho ixtt-ui zatolo.
18. Mhojea puta, tujea tornattponnachea poilea disamnim thaun ti xikun kadd, ani tuje kens dhove zait pasun, tuka ti zannvai mellot astoli.
19. Eka nangorpea ani vomp'pea bhaxen zannvai komais kôr, ani borê pikavollichi vatt polleit rav. Thoddoch vêll tuka koxtt kaddche poddttole. Magir rokdddench tachem pik tum khatoloi.
20. Xist naslolea lokank ti kitli khorkôs! Ani ginean naslole murkh tichea borabor chodd kall ravonant.
21. Ginean nasloleank ti êk kosvôttnechea fatra bhaxen bharadik lagtoli. Ani tem vozon tachean sonsunk zaunchem na. Toslo monis vêll ibaddinastana rokddoch tika pois uddoitolo.
22. Kiteak to zannvaiê pormannem jieta, ani chodd zannak ti mellona.
23. Mhojea puta, mhojem aik ani mhoji budh ghe. Tika pois korinakai.
24. Tuje paim tichea sanklleamnim ghal ani tujê manier tichem zum dovor.
25. Tuji man bagai ani zannvai tujea khandacher ghe ani tichea bondonancher bejar zai nakai
26. Sogllea tujea bollan zannvaiecho pattlav kôr, ani sogllea tujea bollan, ticheô sonvoiom pall.
27. Zannvaiê fattafatt voch, tika sôd ani ti tuka melltoli. Tika êk pavtti vengoilea uprant tika sôddun dium-nakai.
28. Kiteak, okherek tichê thaim tuka xanti melltoli, ani tujê thaim ti khuxal zatoli.
29. Tichea sanklleam udexim tuka bollixtt rakhonn melltoli ani tichem zum tuka êk unchamolachi gollxiri zatoli.
30. Tichem zum tuka ek bhangarachem daginnem zatolem ani tichim bondonam tuka zambllichea rongachim fitam zatolim.
31. Ek bhovmanachem vostr koxem nhesun, tujea mostokar êk dhadosponnacho mukutt koso tum ghaltoloi.
32. Mhojea puta, tuka khoxi asot zalear tuka xikoum-ieta. Tacho tunvem faido kaddlo zalear tum xannom zatoloi.
33. Tuka aikopachi khoxi aslear tum xiktoloi ani tunvem lokx dilear tum zannvaien bhôrtoloi.
34. Zanntteanchea zomatimnim voch. Ani thoim êk zannvik monis aslear taka pankun rav.
35. Deva koddlean ieta tem khoincheim ulovop khoxen manun ghe. Xanneponnacheô vopari tuka chukhunk dium-nakai.
36. Somjikaiecho monis dislo zalear, taka veginch mellunk voch. Tujea pavlamnim tacho humbro zhorum-di.
37. Sorvesporachea adexancher nihall kôr ani tacheô adnia xikun, tuzo sogllo vêll sar. Teô tujem mon mozbut kortoleô ani tum axetai ti zannvai tuka favo zatoli. Ovesvor
