1. Aplea utramnim patok adarunk na to axirvad poddlolo. Taka aplea patka khatir poschatap korcho poddona.
2. Zachem ontoskorn tachi ninda korina, ani zannem bhorvanso kednanch sôddlolo na, to bhagi.
3. Svarthi monis grest zavop sarkem nhoi. Eka himtteak aspoticho koslo upeôg?
4. Apleak unnem korun grestkai ektthaili zalear, ti tum dusrea khatir ektthaitoloi. Ani tujê girestkaiê kustar tech movza marun jietole.
5. Apnnak himtteponnam korun to konna khatir girestkai ektthaita? Aplea svotachea koxttanchem foll legit to bhôgina.
6. Apnnakuch himtteponnam korta tachê poros sonvsarant konnuch noxtto asunk xekona. Hem patok taka svotachi khast zaum-ieta.
7. Zori-i to kiteim borem korit, tem to chukon korta, tachem khotteponn, fattim-fuddem distti poddta.
8. Kunn'nnatti nodor aslolo monis khotto. To dusreachea gorzam vellar apli fatt portita. Taka dusreachea jivitachem poddon vochona.
9. Axechea mon'xa lagim jem kitem asa, tachê vorvim to dhadoxi zaina. Axa tacho atmo bavoita.
10. Imtto aplea mezar jevonn haddunk imtteponnam korta ani tachea mezar bhuk asta.
11. Mhojea puta, tujean zata titlê borê bhaxen tuzo samball kôr ani favo tea molacheô bhettô Sorvesporak dhadd.
12. Ugddas dor, moronn kallav korchem na; ani tem kedna ietolem tem tuka sangonk na.
13. Tum morchê adim tujea ixttank moipaxi rav. Tujê tanki pormannem tujean zata titlem tankam borê bhaxen vagoi.
14. Aichea disacheô boreô vostu tuka dinastana ravonakai, ani kaidean jem tujea vantteak favo zata, tem chukonk dium-nakai.
15. Tunvem ektthailoli girestkai tum dusreak dovorcho naim. Ani tujea koxttanchem foll te vanttun ghenvche nant.
16. Dusreak di, ghe anink tum dhadoxi rav. Patallant him dhadosponnam asonant.
17. Protek mon'xachi kudd kopddeam bhaxen zhoron veta. `Protekan morunkuch zai' mhunnon adleancho kaido asa.
18. Monis eka zhaddachea pana bhaxen. Adlim panam zhoddtat ani tanchea zagear novim vaddtat, tech porim amchea modem rogta-masacheô pillgeô. Eklo morta ani dusro zolmota.
19. Mon'xachea hatamnim kelolem sogllem kusta ani tacho nas zata. Tachê borabor to monis sompta.
20. Zannvaiecher niall korta to ani gineanan ievjita to bhagi.
21. To aplea kallzan zannvaieche kaide xikta ani tiche gutt niallta.
22. Eka xikarea bhaxen to tichê fattik lagta ani tichea rostear pahro korun ravta.
23. To lipun tichea zonelantlean polleta ani tichea darar ravun aikota.
24. Apleachean zata titlo to tichea ghora lagsar aplem biradd korta. Vostu lambovpachi apli khuntti tichê vonntik marta.
25. Tichê kuxik to aplo tombu ubarta. Ani apnnak ek bês borem biradd toiar korta.
26. Aplea bhurgeank tichê savllek dovorta, ani tichea khandeanchea pondak visôv gheta.
27. Ti taka gormê vellar asro dita, ani tichê mhoiment thoinsoruch to aplo rabito korta. Ovesvor
