1. Sorvespora, Mhojea Bapa ani Mhojea jivitachea Dhonia, mhojea svotachea utranchea niontronna khala mhaka sôddinaka. Tankam lagun mhaka sokla apttunk dium-naka.
2. Mhojea khottea chintnam khatir konn mhaka soiteamnim martolo, jea udexim mhojea kallzantli zannvai hanv xistin dovortolom? Hanv chukta tedna mhojim patkam topaxi nastana mhaka sôddlolo mhaka naka.
3. Jea udexim mhojeô chuki vaddon, mhojim patkam choddon, hanv mhojea virodhokam fuddeant poddon, mhoje dusman mhaka hinnsait mhunnon mhaka bhirant dista.
4. Sorvespora mhojea Bapa ani mhojea jivitachea Deva, mhojea dolleank gorvan bhôrunk dium nakai.
5. Kunn'nnatteantlo mhaka nivar.
6. Axek ani vanxek mhojer tabo gheunk dium naka; tea loz naslolea naddanche suvadin mhaka korum naka.
7. Mhojea bhurgeamnô, hanv xikoitam tem aikat. Hanv sangtam toxem korta to guneanvank sampoddcho na.
8. Patki aplea svotachea khorkhôs ani okmanachea utramnim sampoddtat. Tachê udexim okmanaupi ani gorvixtt ghuspun poddtat.
9. Soput gheupachi sonvoient poddum nakai, Gorjê bhair Sorvesporachem nanv gheupachi sonvoim kori nakai.
10. Jê bhaxen sodanch mar khaupi êk gulam' panddam xivai asona, tosoch sodanch soput ani Sorvesporachem nanv gheta to patkantlo nitoll zanvcho na.
11. Sodanch soput gheta to monis khotteponnan bhorlolo ani tachea ghorant khast kednach komi zavchi na. Aplea soputacher add nodor korta tôr tachim patkam dupettin vaddtolim. To khotto soput gheta zalear, taka konnuch niropradhi mhonncho na. Kiteak, tachem ghor odruxttan bhortolem.
12. Mornnak sori korpa sarki mhellem uloupachi êk rit asa. Ti rit Jakobachê sonsti modem asunk dium-naka. Bhokti monis patkachea rebant lollona. Toslea sobhava poros te pois ravtole.
13. Ran'votti ani mhellim utram uloupachi sonvoim kori-naka. Kiteak, tantunt patki utram bhorlolim asant.
14. Tum vhoddlea mon'xam borabor boslolo astana apunn konn to visrun pixa porim vagona zanvchê khatir, tujea avoi-bapaicho ugddas kôr. Toxem korunk tum visorxi zalear tum aplea zolmanchea disak xiraptoloi, ani tea vellar tuka, apunn zolmonkuch naslolo zalear odik borem aslem, oxem tuka distolem.
15. Hi lojek ghalpi bhaxea uloupachi êk pavtti sonvoim zali zalear, tea monxachean ti jivit-bhôr sôddunk zanvchi na.
16. Patkacher patok adarpi lôk don toranche astat ani tisro khast voddun haddta toslo.
17. Agttea porim bhogbhogpi lingache ontrek taka samko giraslea xivai sompche nant. Apleach kuttumbantlea vangddeam koddlean vanxen cholta to apnnak sopurnnaien laslea xivai thambcho na. Toslea, konnacheai vangdda lingachem dhadosponn gheupi mon'xak khoinchi-i ostori upkarta. Ani tacho jiv vochosor tem to sôddcho na.
18. Aplea lognachea polonga add patok adarpi aplê ostorek bevisvaxi aslolo dadlo mhonnttolo: `Hanv konnak dixtti poddttam? Mhojea bhonvtim kallokh asa. Vonntti mhaka lipoitat. Mhaka konnuch pollena. Magir mhaka bhirant kosli? Bhov Vortea Devak mhojea patkancho ugddasui urcho na.'
19. To mon'xachê nodrek bhieta. Punn, Sorvesporachi nodor suria poros dha pavttinim odik porzollit mhunnon taka khobor na. Mon'xachea protek kortubacher To apli chotur nodor dovorta. Kedeai guttache konnxe tachê nodrek poddtat.
20. Tannem vixv roch'chê poilim Taka sogllea vostunchi khobor asli. Ani atam-i Taka sogllea vostunchi khobor asa.
21. To ravona toslea vellar tea patkeak dhôrtole, ani xarantlea rosteancher, sobhemazar, soglleanchê hujir taka khast laitole.
22. Tech porim, dusreachea vorvim zolmololea bhurgeak aplea potichea hatan dita te porduvarê ostorekui toslich khast favo zatoli.
23. Poilim: tinnem Sorvesporacho kaido pallunk na. Dusrem: ti aplea ghorkarak be-visvaxi zalea. Tisrem: tinnem xindullki ani produvarponn adarlam, ani dusrea dadleachea bhurgeacho gorbh dhôrla.
24. Ani ti dusrea dadlea vorvim gorbhest zalea. Tika sobhemazar ube kortole ani tichea bhurgeam vixim vaspus kortole.
25. Tichea bhurgeank somazant zago mellcho na. Tankam bhurgim-ballam aschim nant. Tichea sandheank follam zanvchim nant.
26. Aplea fattlean ti xirapanchi iad dovortoli. Tichi loz kednanch punson vechi na.
27. Sorvesporachi bhokti korpa itlem anink kitench borem na, ani Sorvesporachea updesank pallo diupa sarki suvadik vost na mhunnon, jivim urtat tankam kollon ietolem. Ovesvor
