1. Ek bebdo kamgar kednach grest zanvchona, ani supurle vostuncher loksh dina, to sovkas-sovkas khala poddtolo.
2. Soro ani ostoreô budvont mon'xak ibaddtat, ani porduvari ostoream-xim ieta, taka lozui disona.
3. Tachi kusloli kudd kiddeanchem jevonn zatoli, ani to loz vogddailolo monis aplem jivit vogddaitolo.
4. Lokank sompeponnim patievop mhollear pixeponn. Patok patkeakuch dukhoita.
5. Vaittponant dhadosponn gheta to guneanvkari thorta.
6. Chaddiancho dvês kelear patok vattovta.
7. Tuka sangloli khobor portun sangonakai, ani tuka kitench vaitt zanvchem na.
8. Ti khobor sangonastana ravlear patok zatolem, oxem dislear, ti khobor zaum ixttank, zaum dusmanak sangonakai.
9. Lôk tujem aikotolo. Punn, tujer patienvcho na ani kaim kalla bhitôr tuzo dvês kortolo.
10. Tunvem kitem aikolam? Tem tujea sangatak morum-di. Ghottai ghe! Ti gozal tuzo sfott korchi na.
11. Eka bhurgeak zolm diupachea vellar êk ostori koxttovta tê porim ti khobor kanar poddona fuddem eka pixak zata.
12. Kednaim tachea kanar êk gutt poddlo zalear, to gutt taka aplea zangddar êk bhalo marlolea porim zata.
13. Tujea ixttan êk chuk adarli mhunnon tunvem aikolem zalear, ti khobor tachê lagim vichar. Tannem ghoddiek kainch korunk nasot. Ani tannem kelaim asot zalear to novean toxem kednanch korcho na.
14. Tujea xezareank sangunk favo nasloli vost tannem sanglea mhunnon tunvem aikolam zalear, tachê lagim vichar kôr. Ghoddiek tannem sangonkuch naslolem zait. Ani tannem sanglam zalearui to novean sangcho na.
15. Tujea ixtta sombondim tunvem kiteim aikolam zalear, tem tachê lagim vichar. Ti ghoddiek êk fott zait. Tum aikotai titleim tum sotmaninakai.
16. Bezababdarponnan ani sarko orth ghenastana monis zaitê pavtti uloita. Protek monis kedna na kednaim tori osleô chuki adarta.
17. Tujea xezareacho rag ieta toslem tunvem kiteim aikolem zalear, tacher akromonn korchê poilim tachê lagim chovkoxi kôr ani urlolem Sorvpodvedar Devachea hatan sôdd.
20. Sopurnnaien Sorvesporachi bhokti korpant ani Tachi somurt pallpant khori zannvai asta.
22. Khotteponna vixim tum sogllem zanna zavxi. Punn, tem tuka xannom korina. Patkeanchê budhint zannvai nasta.
23. Vitt haddtta tosleim xanneponn asa. Zachê lagim zannvai nasta to piso.
24. Huxar ani updês pallina toslo aslolê poros, Devachê bhiranticho punn, huxarkaien unno aslear odik borem.
25. Hixopa bhair huxar asonuim o-promannik zatat, vô ekdom' borê rit-rovisen vagun aplem sadoun gheupa sarke lôk astat.
26. Thodde monis bhailean xrêxtt ani dukhaborit zaun apli tokli khala ghalun choltat. Punn, khoreponnim bhitorlean tanchea ontoskornnant ghat asta.
27. Tujem aikona zalolê bhaxen tum uloitana te dusrê vatten polletole. Punn, uprant tuka matui kollonk dinastana te tuzo faido ghetole.
28. Tankam favo tem boll naslolea karonnak lagun thodde monis patok adarunk xokonant. Tankam sondh mellona fuddem te khotteponn adartole.
29. Zoso eklo monis koslo tem taka polleununch sangum-ieta, toxench tachea mukamollar nodor marun eka chintpeak vollkhum-ieta.
30. Tachea nhespacher, hanspacher, ani cholpacher eka mon'xacho sobhav kollta. Ovesvor
