1. Girestkaiechem chintit ravlear mon'xachi nhid pois zata ani tachem vozonuim denvta.
2. Dispott'ttea dhondeache huske tuka nhidunk dinant. Ekê marekar piddê bhaxen tuji nhid pois kortat.
3. Grest sodankal koxtt korta. Duddu ektthaita ani uprant sust bosun, khospaiechea chokmokant jieta.
4. Goribui sodankal koxtt kortat. Torui tanchem pottuch sarkem bhorona. Ani sasnnacho visôv gheupachea vellar legit te goribuch urtat.
5. Duddvancho môg kortat tanchean sompeponnim patok korinastana ravunk zaina. Faideachea fattlean vochpeak, faidoch bhroxtt kortolo.
6. Bhangarak lagon zaitea zannachem nisontton zalam, ani tancher ieta tem nisonttonui svota tannench toiar kelam.
7. Duddvank bhultat tankam tem êk fas zata ani murkh monisuch tantun xirkovtat.
8. Guneanv korinastana grest zala to axirvad poddlolo. To dovlotichea fattlean dhanvona.
9. Oslo monis khoim asa? Ami taka porbim diunk favo; kiteak, apnna sarkeanchea sangatak tannem ojapam ghoddunk nant?
10. He poristitintlean konn dox nastana urtolo? Haka lagun taka gorv bhôgunk favo. Taka patok adarpachi sond mevloli; punn tannem patok adarunk na. Taka vaitt korpachi sond mevloli punn tannem vaitt korunk na?
11. Toxem asot zalear tachê dovlotik karonn asa ani tachea udarponnachi sobhemazar tust zatoli.
12. Bhorpur khann aslolea jevnnachea mezar tum boslai zalear, tujem lenvtteponn sobhê mazar dakhoinakai. Ani `Kitlem jevonn asam?' mhunno nakai.
13. Ugddas dhôr. Axechi nodor asop bori nhoi. Dolleam sarkem sonvsarant axechem kainch na. Dekhunuch te lôk sodanch roddot astat.
14. Tuka dixtti poddtolea dôr-eka jevnna aidona kodde hat ghalinaka. Jevonn ghetana dusreak dhuklinakai.
15. Tujea borabor jevnnachea mezar aslolea dusreancheô-i gorzô vollkhun ghe. Tankam somzun ghe.
16. Tuka dilam tem jevonn eka borea dekhichea mon'xa bhaxen jev. Jevtana vonnttancho ani jibecho avaz korinaka. Tosle monis konnakuch manonant.
17. Borê rit-rovisen poilo jevpacho thamb. Pott bhorvonnea bhaxen vagum nakai. Tuka okman favo zatolo.
18. Zorui tum zaitea lokam borabor asai, soglleam poros poilo jevonn gheum-nakai.
19. Borê rit-rovisen vaddlolea mon'xak thoddench jevonn puro. Nhidunk vetai tedna tum ghusmottcho na.
20. Unnem jevlear bori nhid poddtta. Dusrê sokallim tum vegim utth'tai ani tujea jivakui borem dista. Pott-bhôr jevtoleak favo ti nhid poddona, onkareô ietat ani pottan chabta.
21. Zorui tuka boll korun chodd jevoila asot zalear, tum uttun voch ani onkun uddoi. Tednach tujea jivak borem distolem.
22. Mhojem aik mhojea puta. Mhojea utranchi beporva korinaka. Ek dis tuka mhojea utrantlem sot zannovtolem. Tum kiteim kortai tem favo titlench kôr. Tum kednanch piddent poddcho na.
23. Borem jevonn manddta tea iezmanachi lôk tust kortat. Ani tachea udarponnachi khatri zata.
24. Punn eka imttea iezmanachi soglleank tiddôk ieta. Lôk tachê imtteponnachi viskottavnnim ruchin kortolo.
25. Apnna lagim kitlo soro pieunk zata tem dakhoun boddai kori nakai. Kiteak, sorean zaitea zannachem padd ghatlam.
26. Khornant ghaltôch lokhonn kitlem ghôtt tem gomta. Soro pieun bhasabhas kortana mon'xacho sobhav somzota.
27. Favo titloch pielear soro mon'xak novem boll dita. Sorea bogor jivitan koslo faido asa? Mon'xak khoxi korpak to rochlolo.
28. Favo tea vellar ani zagear soro pielear mon'xachem kalliz khuxal zata ani mon dhadoxi korta.
29. Ragar astana ani polkea jhetan tum chôdd soro pienvxi zalear tuka monachi bejarsann ani tras favo zatat.
30. Eka pixea bebdeak krodh ieta tedna to apnnakuch vaitt korun gheta. Dhopke marpachea vellar tachea angantli xokti komi zata ani dusro taka sompeponnim marta.
31. Dogui soro pietat tedna dusreak challoinaka. To dhadoxi astana tachim fokannam korinaka, tachi ttik'ka korinaka, vô tujê koddlean ghetlole duddu porte magonaka, taka bejear korinaka. Ovesvor
