1. Nunacho put Joshua zhuzant ekdom' huxar aslo, ani Moizesacho daiji aplea nanva pormannench to Sorvesporachê porjecho vhoddlo soddvonndar koso jielo. Apnnacher akromonn kortoleank tannem haroile ani Israelak tachem daiz porot melloun dilem.
2. Aplo hat voir kaddun aplê torvarin tannem xarancher akromonn kelem tedna polleunk kitlem oprub distalem!
3. Hachea sarki nixtta hea adim konnem dakhoiloli? To Devachem Povitr Zhuz zhuztalo.
4. Tannem suriak thamboun, êk dis don disam itlo lamb korunk na?
5. Charui vattamnim apnnache dusman akromonn kortale tedna tannem Bhov-Vortea Sorvesporak ulo marlo ani Sorvesporan tancher akantachem zhodd-modd dhaddun dilem.
6. Tannem dusman raxttrancher ghuri ghatli. Sorveporacho bhokt koso to zhuztalo ani Sorvespor kitlo bollixtt tem desank kollounk, tem zhodd-modd dusmanachea desancher dhaddun dilem Beth-Horon denvter tanchem nisonntton kelem.
7. Moizes apli bhokti dakhoita tedna, to êk Sorvpodvedaracho patlavdar aslo. Tannem Jefunechea puta Kaleban ak'kheach somazak virodh korun, patok adarpachem advarlem ani bhonddachem ghunnghunnop bond kelem.
8. Dekhun oronneantlean cholpi sôv hozar dadleam ani ostoream modle tankam dogaimkuch vattaile; ani tankam dud ani mhonv vhanvtolê tanchê poustik daizache bhuim-er pavoile.
9. Ani Sorvesporan Kalebakui ghottai favo keli, ji tachea mhatarponnan porian urli. Hê udexim tanchean aplê mhatar piarier, desachea voir dongrancher vochun jikhun ghetli ani aplê sonstek tannem ti dovorli.
10. Jê udexim Sorvesporacho pattlav kelear kitlem borem tem dôr Israelachea mon'xan vollkhunchem.
11. Tea Nitidarank ani visvaxi kallzachea mon'xank dôr ekleak apovnnem kelam tedna, zannem kednach Sorvesporak fatt korunk na, tanchê iadicher axirvad poddum.
12. Tachim haddam fonddantlean novean jivim zaum, ani tea mahan mon'xachea nanvan tachê sonstek novem moladik jivit favo zaum.
13. Samuel aplea Sorvesporachea mogacho aslo. Sorvesporacho bhaknnar to; tannem rajvôttki stahpon keli ani aplê porjecher razank makhle.
14. Sorvesporachea updesamnim tannem porjechi nit keli ani Sorvesporan Jakobacher apli nodor dovorli.
15. Tachea promannikponnak lagon taka bhaknnar mhunnon vollkholo tachea utram udexim to visvaxi mhunnon taka vollkholo.
16. Tache dusman taka charui vattamnim chepon ditale tedna, êk dudpietolo menddro bhettoitana, tannem Sorvesporak Sorvpodvedar mhunnon pacharlo.
17. Ani tedna Sorvpodvedaran sorgavelean êk dhenkso ghatlo ani mottea godd-goddeantlean aplo tallo aikum-so kelo.
18. Dusmanachea sogllea fuddareancho ani Filistevkaramnim sogllea rajeancho sotianas kelo!
19. Tacho sasnnacho visôv gheupacho kall ienvchê adim Sorvesporak ani Tannem makhloleank to govai ravlo. `Khoincheach eka jivachi malki vô êk vhannachi zoddi legit hanvem kaddun gheunk na.' Nhoi mhunnon konnakuch taka lagun guneanvkari kelo na.
20. To nhidlolo astana legit tannem novean bhakit kelem ani raza koxê toren mortolo tem kollit kelem. Porjechem khotteponn kaddun uddounk, sonvsara bhailo êk tallo zalolea bhaxen to uloilo. Ovesvor
21. Tachea fattlean, Davidachea nanvan bhakit korchê khatir Nathan ailo.
