1. Eka voizak tachê vevsaiê khatir favo to man di; Sorvesporan taka hea khatir rochla.
2. Eka razachea hatantlean ghetlolea dennea bhaxen Bhov Vortea Devachea hatantlean pekovnni ieta.
3. Eka voizachem xikop tachi tokli voir dovorta ani manest monis tankam bhovmanan polletat.
4. Sorvesporan vokhdachim zhaddam ani jhilam dhortorentlean upzoileant ani khoinchoch somjikaiecho monis tim vapurpak fattim sorcho na.
5. Sorvesporachê podvechi khunna diunk eka kallar eka lakddachea kuddkean koddu udok godd korunk na?
6. Aplea mahan kortutvam khatir, ami apnnak mhoima dinvchê khatir Tannem zaitea lokank hi zannvai dilea.
7. Ek vokdam vikpi, pidda pekonvchê khatir ani dukh poisavchê khatir, tim bhôrxita ani tancho vapôr korta.
8. Haka lagun, Sorvesporachea kortutvank xevôtt na. Tanchêch khatir ak'khea sonvsarak boreponn favo zata.
9. Mhojea puta, tum pidest astana, piddê vixim chintinakai, punn, Sorvesporak prarthona kôr ani to tuka pekoitolo.
10. Tujeô chuki sôddun di, tuje hat nitoll dovor ani tujem kalliz sogllea patkantlem dhuvun kadd.
11. Dhumpachi ani borea pittachi bhettovnni kôr; ani ti bhettovnni tuka tankta titlê vegim zaum-di.
12. Uprant voizak apoi. Kiteak Sorvesporan takai rochla - taka vochunk dium naka. Kiteak, tuka tachi goroz asa.
13. Kaim pavtti, tuji bori bholaiki vô ovlombun urta.
14. Kiteak, tujeô dukhi komi korunk, tuka pekovunk ani hea udexim tujem jivit vaddovunk. To aplê votin prarthonaim korta.
15. Sorvesporachê nodrê mukar je patok adartat, te piddest zaun, voizanchea hatamnim poddunk favo.
16. Mhojea puta, melolea khatir dukham gholloi, tuji dukh dakhounk rodd ani favo tea aitemonnan ti kudd toiar korun nikhep. Tachea fondda-xim vochunk visor naka.
17. Imtteamnim rodd. Tujem hodd'ddem boddoi. Lokanchim vaitt utram vattanvchê khatir, melolea mon'xacher êk vô don dis, favo ti dukh kôr ani tea uprant tujea kallzak ghottai ghe.
18. Kiteak dukh mornnak pavounk xokta. Eka dukhimnim bhorlolea kallzachi soglli takôt sompta.
19. Koxttanchea vellar dukh urta ani dukhabhorit jivit jieunk kottin lagta.
20. Tujem kalliz dukhant xenddoi naka, ami sogllim eka disa mortoleanv mhunnon ugddas kôr ani dukh pois kôr.
21. Konnui melolo monis porot iena, hem visornaka, Tujean taka adar diupak zaina Portench zalear, tum tukach vaitt korun ghetoloi.
22. Aiz mhozo xevôtt zala tosoch tuzo-i zatolo. Kal mhozo xevôtt zalolo tosoch aiz tuzo.
23. Melolea mon'xak matiek lailo toso, tachê iadicher visôr ghal. To melea uprant tachi dukh korit ravo nakai.
24. Eklo borovpi zannvaien boroitolo zalear, taka mekllo vêll aspachi goroz asa. Mekllo vêll eka borovpeak apli zannvai vaddovunk sondh dita ani thoddench zanna aslolo monis zannvaien vaddta.
25. Zorui eka zomin kospeacho sogllo haves fokot aplim gorvam chorovpant, aplea boilank vhorpant, aplea kamamnim gul'l zavpant, tachem ulovop fokot boilam sombondinch asta. Tedna to zomin kospi zannvaien bhortolo.
26. Tachem sogllem lokx nangrachea tasacher asta ani tacheô soglleô sanzô aplea paddeank motte korpantuch astat, te koxe zannvaien bhorlole zaum-ietat?
27. Têch bhaxen soglle vavraddi ani aplea hatamnim kam' korpi lôk, rat-dis kam' kortat ani mhôr korunk sodanch te novea-novea nomunneancho vichar kortat. Ek jivita sarki murti toiar korunk khub thokôs ghetat, ani aplem kam' somponvchê khatir ratr meren vavrot astat.
28. Tech porim êk kamar aplea dhopttivpachea fatra kuxik bosta; tea koch'chea lokonddachem kitem korchem tem ievjita, ujeacho dhôg tachi kat bhazta, ani, khornantlê gormê vangdda to zhuzta astana, tea ghonnacho avaz tache kan bheraita. Tachi nodor nomuneancher tharloli asta ani tem kam' borê bhaxen korpant tannem aplem dhean ani mon lailam ani xevottcho hat-bar lanvchê khatir to rat meren zago ravta.
29. Tech porim êk kumbar aplem kam' korta astana aplea paiamnim tem chokr ghunvddaita. Thambonastna to aplea kamacher chotur ravta; aplea hatachem protek chiputt tannem adim ievjilolem asta.
30. Aplea hatamnim to ti mati dhôpttita ani aplea paiamnim to ti môllta. Taka favo titlo chokmok divpa katir to aplem dhean ani mon laita. Aplo khorn nitôll korpa khatir to uxir meren zago ravta.
31. Ho sogllo lôk aplea hatancher patieta ani protek zann aplê kolent zannkar asta.
32. Toslea lokam xivai eka xarant jievpak zaina. Heô vostu mellonant zalear, thoinsor konnuch bhett dinvchona vô jienvchona.
33. Osle monis sonsoddent vavronk xokonant ani zomatint tankam manacho zago mellona. Te neai sodrecher bosonant ani tankam kaideanchi mahiti na. Tankam xikop nasta anink tankam vhoddli zannvai nasta ani te zobor totvgineaniim asonant.
34. Te sonvsaracheô ratti chalu dovortat ani aplea dhondea sombondim te aplim prarthonam kortat. Ovesvor
