1. Mhojea puta, Sorvesporachi chakri korunk tum axetai zalear, tallnnek toiar rav.
2. Promannik kallzacho za, thir rav, ani hal-upodre ietat tedna bhienakai.
3. Tujea jivitachea xevottak tuka man mellchê khatir, Taka ghôtt veng mar ani Taka sôddinakai.
4. Tujer ieta titlem-i tum manun ghe ani tujê khaltê gotir vaitt-borem zata tedna sonsnnikai ghe,
5. kiteak bhangar ujeant ghalun topastat ani vinchun kaddlolea mon'xank hinnponnachea khornant.
6. Tacher visvas dovor ani To tuka pavtolo nitt margan chol ani Tacher bhorvanso dovor.
7. Sorvesporachi bhokti kortoleamnô, Tachê kakluticher patieun ravat, Bhuim poddona zaunk rostea bhair cholonakat.
8. Sorvesporachi bhokti kortoleamnô, Tacher patieun ravat, ani tumchem inam' tumkam melltolench.
9. Sorvesporachi bhokti kortoleamnô, borea vostunk ani sasnnachea sontosak ani kaklutik axeun ravat.
10. Purvozanchea pillgeancher nodor marat ani polleiat: Sorvesporacher visvas dovorpi konn tori lojek sampoddla? vô Tachê bhoktichea margar thirien choltoleak Tannem kedna tori sôddla? vô Taka ulo martoleak Aple kan bhere kele zait?
11. Kiteak Sorvespor kaklutvont ani mogall, To amchim patkam bhogxita ani dukhim-koxttanchea disamnim To amkam pavta.
12. Bhezudd kallzanche ani osokt hatanche, je patki don vattamnim choltat tanchem kotta.
13. Osokt kallzacheanchem kotta, Kiteak tankam visvas na, Tea khatir tankam asro mellcho na.
14. Dhittai ibaddtoleamnô, tumchem khoreponnim kotta; Tumcher khast poddtoli. Sorvespor nit korunk ietolo tedna tumi kitem kortole?
15. Sorvesporachi bhokti kortat tim, Tachea utranchi beporva korinant; Tacho mog kortat tim Tachê khoxê pormannem jietolim.
16. Sorvesporachi bhokti kortat tim, ani tacho mog kortat tim Tachi khoxi kortolim, ani Somurtint tankam dhadosponn melltolem.
17. Sorvesporachi bhokti kortat tim, aplim kallzam toiar dovortolim Tachê mukhar man bagoitolim ani mhunnttolim:
18. Amkanch ami Sorvesporachea hatamnim ghalum-ia; Mon'xanchea hatamnim nhoi. Kiteak, Tachi kaklut Tachê podvê itlich vhoddli. Ovesvor
