1. `Apunn tuzo ixtt' mhunnon tuka konnuim sangot. Punn, thodde ixtt nanvam purtech astat.
2. Tujea boraborcho vô ek ixtt tuzo dusman zata tedna tujean sonsunk zaina titli tuka dukh zaina?
3. E khottê ievzonnê! Devan tuka kiteak rochli, ho sonvsar visvas-ghatamnim bhôrunk?
4. Tuzo vêll boro asa porian thodde lôk tuje ixtt zatole. Punn, tujer vaitt vêll ieta tedna te tujer portovtole.
5. Ekê toreche tuje khore ixtt asat; tankam khoreponnim tujer maiest bhavnam astolim. Ani zhogddim korpachea vellar te aplea hatamnim tuji rakhonn kortole.
6. Toslea khorea ixttak tum visornakai ani tujea hatan grestkai aili toxem taka tujea monantlo bhair uddoinaka.
7. Tuka zaite zann budh ditat tantle thodde zann aplea svarta khatir tuka budh ditole.
8. Tuka konnuim budh diunk ieta tedna chotrai dhôr; taka tujê koddlean kitem zai tem poilem sôdun kadd. Zorui tujea voir tacho svarth asa, ani zôr to tujea poros aplem poilem chint'ta mhunnon tuka kollonk na zalear, ti vost korun gheupachi taka kiteak takit asa tem polleun ghe.
9. `Tum sarkea rostean asai' mhunnon to tuka sangtolo. Punn khoreponnim tuka kitem ghoddta tem polleunk to pois ubo ravtolo.
10. Tujer visvas dovrinant tanchê lagim budh maginaka ani tujer kunn'nnattponnam kortat tankam tujeô ievzonneom gupit dovor.
11. Ekê ostorê lagim, tichea dusmana vixim vicharinaka, eka bhivkureak zhuza vixim, eka veapareak, vevhara vixim, eka giraikak, vikpa vixim, eka himtteak abhara vixim. Khoincheai svartheak doiallponna vixim, allxeak kosleai vavra vixim, disvoddeachea vavraddeak kam' sompovpa vixim, allxi vavraddeak, vhoddlea kamam vixim. Hantlea khoicheai ekleak tuzo kan dium-nakai.
12. Tea boldek tum sodanch Devacheô adnia pallpi mon'xacher ani Devacheô adnia pallta tacher visvas dovor. Tacho atmo, tujea atmea bhaxen asa, ani tum chuktai zalear, to tuji kaklut kortolo.
13. Okherek tujea ontoskornnachich tum budh ghe. Tachea poros tuka ani konnuch odik visvaxi ascho na.
14. Eka rakhnnechea kollsar aslolea sat chovkidaram poros tachem ontoskornn tuka sorôll xiddkavnni dita.
15. Ani aplim panvlam sotachê vatten vhor mhunnon, Bhov Vortea Deva thaim prarthona kôr.
16. Somjikai protek kortubacho man zaunk zai; ani kosleim kam' hatant ghenvchê adim nihallop zaunk zai.
17. Chintnam kallzant mull ghetat ani tanche char fantte bhair sortat.
18. Borem ani vaitt, jivit ani moronn; hacher jib sodanch sot'tea choloita.
19. Kaim monis dusreak xikovpak khub huxar astat. Punn, svotachê baptint te kiteakuch upkaronant.
20. Dusre aplea hatamnim khub huxar astat. Punn, lôk tancho tiroskar korta dekhun okherek te upaxim mortat.
21. Tannim Sorvesporache upkar zôddunk nant ani tachê sovem matui zannvai nasli dekhun toxem ghoddlem.
22. Dusro apnnak khub zannar mhunnon somzota ani aplea gineanan jem kitem thoroilam tem, sarkem mhunnon sangunk bhonvta.
23. Khoro zannar asa to aplê porjek xikoita ani tache nixkorsh khatreche astat.
24. Zannvaiechea mon'xacher axirvad denvtat ani taka soglle bhagi mhonnttole.
25. Mon'xachea jivitantle dis mezlole asat. Punn, Israelache dis hixeopa bhaile.
26. Zannvaiecho monis aplê porjê modem visvas jikhtolo ani tachem nanv sasnnak urtolem.
27. Mhojea puta, tujea jivitant tujê kuddik kitem pochta tem polle, tika vaittak poddtat teô vostu tika dium-naka.
28. Kiteak, jevnnache soglle podarth protekak pochonant, ani soglleank soglleô vostu mantat, oxem nhoi.
29. Mezar manddloleô soglleô ruchik vostu tunvem khaunkuch zai mhunnon chintinaka. Jevnnache axecho zaum-naka.
30. Chodd jevlear orjin zata ani soglleach vellar jevit ravlear tuka pida zavunk xoktat.
31. Hixeopa bhair jevun zaite zann meleat. Dekhun, tujea jevnnacher tabo dovorlear, tum lamb jivit jietoloi. Ovesvor
