1. Kiteakuch upkarona toslim zaitim bhurgim axenakai ani Devak vollkho naslolea bhurgeancher dhadosponn bhôginakai.
2. Sorvesporachi bhokti kortat tanchê modem voslea xivai, tem kitlim-i asum, tanchê vixim dhadosponn bhoginakai.
3. Tankam ek lamb jivit anvddenakai, tanchea von odik ankddeancher visvas dovrinakai. Sorvesporachi adnia palli naslole hozaramnim aslolea poros, Sorvesporachi khoxi korta toslem ekuch bhurgem aslear odik borem.
4. Ekach mon'xachea xanneponnak lagon eka xarachi loksonkia vaddonk xokta. Punn kaide pallinaslolea lokanchem vounxuch padd zatolem.
5. Hanvem mhojea dolleamnim tosleô zaiteô vostu polleleat, Tanchê poros odik probhavik vostu mhojea kanamnim aikoleat.
6. Eka patki somazant uzo pett'ta, ani ek attapunk ienaslolea desacher khastichem agttem perovta.
7. Aplea svotachea bollacher patievun, apnnacher portovlolea adlea kallavelea rakhosank Tannem bhogsunk na.
8. Lotachea sangatan jietoleank Tannem bhogxile nant. Tanchea gorva khatir Taka tanchi vitt disli.
9. Bhosm favo aslolea desachi tannem kaklut korunk na. Te lôk patkache onond bhogtale.
10. Nhoi mhunnon apnnacher portovpi soixim hozar lokank svotachea vadean ektthaim zaloleankui Tannem bhogsunk na.
11. Aplea vadeacho ekloch monis suttlo zalear ojapanchi gozal zatoli asli. Kiteak, kaklut ani xirontt Devachea hatant ekech toren asta. Khast lavunkui To titloch podvedar asa.
12. Tachi kaklut mahan toxich Tachi khast-ui korkhôs. Protek mon'xachea kortubam pormannem, To tachi nit korta.
13. Patkean vaitt vatten ektthailoleô vostu to vhorunk panvchona. Toxench eka bhokti mon'xachi sonsnnikai funkott vechi na.
14. Protek udar monachea mon'xak To inam' ditolo ani protekak favo tem melltolem.
17. Kodinch mhunnonakai. `Hanv Devachê nodrê mukhavelo liptolom. Thoim mhozo konn ugddas kortolo? Itlea sogott lokam modem hanv nodrek poddcho na. Iedê vhoddlê rochnnê mukhar hanv konn?'
18. Polle, ontroll ani tachea voir aslolo sorg ani sonvsar, ani tachê sokol aslolem patall, Sorvespor ietolo tedna thorthortolem.
19. To tancher nodor ghalta tedna dongor ani tech porim sonvsarachi buniad kanchvetoli ani thorthortoli.
20. Punn, hea sogllea vostuncher konnunch chit dina. Tacheô halchali konn monant dovorta?
21. Tufanachem varem disti poddona. Ani jem kitem To korta tem nodrek disona.
22. `Hanvem nit kelea zalear konn sangon ditolo? Konn mhojer nodor dovortolo? Xokeotai samki thoddi.'
23. Him chintnam samkim unnea gineanachea mon'xanchim. Murkh, rosto visorlolea ani vaitt rostean vochpi aplea pixeponnacher dhadoxi zata toslea murkh mon'xanchim.
24. Mhojem aik mhojea puta ani zannvai ghe, ani tujem sogllem mon mhojea utrancher dovor.
25. Hanv tuka xistin ani borê toren somzaitolom ani binchuk zannvai tuka ditolom.
26. Jedna Devan survatek aplo sonvsar rochlo, tedna tannem protek vost ap-aplea zagear dovorli ani protek vostuk ticho svotacho zago dilo.
27. Orombak thaun pillgeancheô pillgeô meren, apleô soglleô vostu Tannem manddun dovorleô.
28. Ek vost dusrê vostuk addkhôll korina, ani Tachea utrak pallo dinastana kednach ravchina.
29. Ani uprant sonvsaracher nodor marli ani borea vostumnim Tannem to bhorlo.
30. Sonvsarachi dhortori Tannem torekvar zonavoramnim bhôrlim, tim eka disa morun tech dhortorent porot vetolim. Ovesvor
