1. Zannvai eka gorib mon'xak apli tokli nitt ubi dovrun ravunk karonn asta ani taka vhoddlea mon'xam modem zago favo korta.
2. Sundor dista mhunnon konnakui thokeum nakai ani vidrup dista mhunnon konnakui kikont kori nakai.
3. Uddun vetolea mon'zatim modem, mhonva-mus ekdom' dhaktto. Punn, to toiar korta tem mhonv sogllea vostum poros godd asta.
4. Lôk tuzo bhovman kortat tedna tum gorvan bhoronakai; kiteak, Sorvesporacheô soglleô vostu ojapancheô. Punn, teô mon'xakulla pasun pois lipoun dovorleat.
5. Zaitea razank tannem dhortorer bosunk laileat, ani konnench chintunk naslolea mon'xachea mostokar mukutt ghatla.
6. Zaite motte monis samke konixttaiek sampoddleat ani manache monis dusreachea hatamnim poddleat.
7. Sopurnnaien chovkoxi kelea xivai guneanv thapinakai. Poilo nihall kôr ani magiruch chuki pasot ttika kôr.
8. Zobab dinvchê adim poilo borê bhaxen aikun ghe. Dusreachem ulovop sompchê adim modench uloinakai.
9. Tuka lagona toslea vostunk lagon dusrea lagim add'ddun zhogddonakai. Nalaikachea zhogddeamnim modem poddonakai.
10. Mhojea puta, zaitea vostumnim tum vantto ghenakai. Ekdom' chodd vostu korunk vexi zalear tuka khub tras zaunk xoktat. Kitloi dhanvloi mhunnon tum fuddem pavcho naim, nhoi mhunnon dhanvlo mhunnon tum suttcho naim.
11. Zaite zonn, khub rostin zaitem kam' kortat; torui astana te adlea poros fattim urtat.
12. Dusro sovkas kam' korpi êk monis asta, taka adarachi goroz asta to osokt ani tachê lagim chodd nasta; Dev tacher Apli kakutichi nodor ghalta ani tachê vaitt poristitintlo taka voir kaddtta.
13. Apli tokli voir kaddpak taka adar dita; taka sogllo lôk ojap zata.
14. Borem ani vaitt, jivit toxench moron, goribi ani girestkai, sogllem Devakoddlean ieta.
17. Promannikak Sorvesporachim denim sodanch urtat, ani tanchea vavrant tankam sodanch Tacho adar favo zata.
18. Dusre svotak gorjechem dhadosponn dina astana, khub koxtt korun grest zait. Punn, tacho taka kitlo-so faido zata?
19. `Atam mhojean xantin bôsun mhojê lagim asa tacho faido gheupak zata' oxem te mhunnxi zalearui, hem sogllem kitlo kall togtolem? Hem sogllem hangach dusreak dovorun vechem poddtolem; ti taka khobor na.
20. Tuje kaide pall ani tuje koxtt kôr. Ani mhataro zai porian, Tujem kam' korit rav.
21. Protekachea iesak ojap zaun pollenakai. Sorvesporacher visvas dovor ani tujench kam' kôr. Eka gorib mon'xak okosmat grest korpak Sorvesporachê nodrek êk kirkôll gozal.
22. Devosponnim mon'xak, tacho fôll koso Sorvesporacho axirvad favo zatolo ani Dhoni aplo axirvad tachêxim fuloitolo.
23. `Mhojeô kitleô gorzô asat. Fuddarak mhojê lagim kitlem astolem?' Oxem mhunnonakai.
24. `Atam hanv svavlombi ani hea fuddem mhaka kitem vaitt zaupachem asa' - oxem mhonno naka.
25. Sogllem borem cholta tedna odruxttachem konnuch chintina, ani odruxttachea vellar iesacho ugddasui zaina.
26. Mon'xachea mornna somoiar Sorvesporak mon'xak khast dinvchê svater, tachea kornneam pormannem inam' divop samkem sompem.
27. Odruxttachea ekach khinnan dhadosponnam puson vetat. Eka mon'xachea nimannea khinnak tachim kortubam zannovtat.
28. Monis morchê adim konnachench jivit dhadoxi mhunnon somzonakai. Mon'xachea jivitachea xevottakuch tachea jivitacho hixôp korum-ieta.
29. Mellot tankam tujea ghorant haddum nakai. Kiteak, zaite chalak monis tuka zaiteach vattamnim fosovunk xoktat.
30. Eka pinzreantlea kovddea bhaxen eka gorvixttachem kalliz. Eka gupit chora bhaxen to tujea odruxttachi vatt polletolo.
31. Borem asa tem vaitt koxem dakhoitolo ani xebaski favo aslolea vostumnim chuki melloitolo.
32. Ekuch kitt'tt kollxeanche inglle korta ani êk patki, rogot varounk addosak ubo ravun sondh sôdta.
33. Duxtt mon'xachê ani tachê vaitt ievzonnê poros pois rav. To tujer sasnnak khot ghaltolo.
34. Onvollki mon'xak asro dium-nakai. To tuka tras ditolo ani tujeach kuttumbantlo tuka pois kortolo. Ovesvor
