1. Sorvesporachi bhokti korun choltoleancher koslench odruxtt ienvchem na. Zoddtechea vellar legit To taka vattaitolo.
2. Adniacho dvês korta to khoinchoch monis xannom nhoi. Adnia somondan dhongiponna korta to eka vadoll moddak sampoddlolea vhoddea bhaxen.
3. Budhvont Monis adniachi bhirant dovortolo. Kiteak, toslo monis provadiancher visvas dovorta, kosoch to somurticher visvas dovortolo.
4. Tuka kitem sangpachem asa tachi poili toiari kôr. Tedna tuka lôk kan diun aikotolo zobab diunchê adim tuji mahiti manddavôllir ghal.
5. Eka pixeachim bhavnna eka gadddeachea chokra bhaxen. Ani tachim chintnam tea chokra bhaxen gunvot astat.
6. Aplo sobhav bodlunk xekona toslo ghoddo eka uprodhik uloupi ixtta sarko. Taka konnuim vhorum, to khonkallta.
7. Voros-ui bhor ekach suria udexim, dôr disa uzvadd mellta, tôr eka poros dusro dis kiteak boro astolo?
8. Sorvesporachea monant tancho vegllochar zalo. Tannem kall ani porbô veg-veglleô keleat.
9. Kaim disank Tannem voir kaddleat ani mhotvache keleat ani dusreank tannem sadhe keleat.
10. Mon'xakull dhortorentlem ailam. Adanvank legit matiecho rochla.
11. Sorvesporan aplê zannvaiechê sopurnnaien tancho vegllochar kela ani tanchi poristhiti-i veg-veglli kelea.
12. Thoddeancher Tannem axirvad ghatla ani aplea fuddeant dovorleat, ani tankam uklun ani maiest korun aplê kuxik bosoileat. Ani dusreancher Tannem xirap ghatla ani tankam hinnsaileat. Tanchea zageavele tankam denvoileat.
13. Zoxem eka kumbarachean aplea hatantlê matiek apnnak zai toso akar divunk zata, Toxench Rochnnarachea hatantlea mon'xank Tachean apnnak zai tê ritin ani favo tê nitin inam' dium- ieta.
14. Jê porim vaittache dusrê degek borem asta, tech porim mornnachê dusrê degek jivit asta. Toxench bhokti mon'xachê dusrê degek patki ubo ravta.
15. Sonvsarachea sogllea vavrache niall kôr. Tannem sorv vostu zoddien rochun, eka-mekak teô purnn kortat mhunnon tuka zannovtolem.
16. Zorui hanv nimanno ailam. Torui daku lunvpeamnim fattim chukun sôddlolea mon'xa bhaxen hanvem mhoje dolle ukte dovorleat.
17. Punn, Sorvesporachea axirvadan hanv poilo ailam ani eka khore daku kaddpea bhaxen hanvem mhojeô konnbeô bhôrleat.
18. Punn, chotrai dhôr. Hanv fokt mhojêch khatir vavr korina, Punn, soglle xikunk sôdtat tanchê khatir hanv vaurtam.
19. Tumi sogllea mhotvachea bhovxik fuddareamnô, ani sobhechea odhikareamnô mhojem aikat ani mhojea utrak kan diat!
20. Tum jivo aso-sor tujea putak vô bailek, bhavak vô ixttak tujer podvi dium-naka, ani tujem daiz dusreak dium-naka, ghoddiê tuka poschatap zaun tem portun magun gheunk poddot.
21. Tujê kuddint svas aso-sor ani tum jivo aso-sor, konnakuch tujê voir podvi dium -naka.
22. Tujea bhurgeam-xim tunvem bhik magunk vechê poros tannim tujê-xim magunk ailear odik borem.
23. Tum kitem kortai tacho tum dhoni za ani tujea nanvancher khot poddunk dium-naka.
24. Jea disa tujem jivit sompta, tujea mornnacho vêll pavta, tednach tujea daizachi vannttni kôr.
25. Zoxê porim eka gaddvak tonn, boddi ani vojem, tech porim jevonn, xist ani vavr eka gulamak.
26. Tujea gulamak khub kam' di ani tuka monachi xanti melltoli. Taka kam' naslear ani to svotontrtai magtolo.
27. Zoxem zum ani kam' man bagoita, toxech koxtt ani dog-dog eka vaitt chakrak.
28. To bekar urona zaunk taka vaurak lai. Bekari taka sogllê torechim addangiponna xikoitoli.
29. To asunk favo tea zagear, taka tachea kamancher dovor. Tujea adniank pallo dina zalear taka sanklleamnim band.
30. Punn, konnachei thaim tum ogllo khôr zavum-naka ani niti add kitench korum-naka.
31. Tujê lagim ekuch gulam' asa? Tujê sovem tum vagtai, toso taka vagoi. Kiteak, tunvem taka tujea koxttanchea duddvamnim vikto ghetla.
32. Tujê lagim ekuch gulam asa? Taka tujea bhava bhaxen vagoi. Karann, jê bhaxen taka tuji goroz asa, tech bhaxen tuka tachi goroz asa.
33. Tunvem taka vaitt vagnnuk dili ani to pollun gelo zalear tum taka khoim mhunnon sôdtoloi? Ovesvor
