1. Jakobachea kullacho tannem eka mon'xak zolmant haddlo ani taka sogllea mon'xakullachê nodrê mukhar bhovman favo zalo. Tacho Dev ani monis eksarko môg kortale. To monis Moizes. Tachi iaduch mhollear êk axirvad.
2. Taka Dev-dutam sarko povitr ani bollixtt kelo. Tache dusman taka thorthorle.
3. Moizesachea utran vismitam ghoddoilim, ani razanchê nodrê mukhar Devan taka voir ubarlo. Tachê porjek updes dile ani aplê mhoimecho porzôll taka dakhoilo.
4. Ak'khea mon'xakullantlo Sorvesporan taka venchlo ani tachê lhanvikaiê ani promanikponna khatir taka Aplê sevek orpilo.
5. Tannim taka Aplo tallo aikonk dilo ani taka kallokhant gheun gelo.
6. Jakobak, tachê sonstik ani Israelak aplem formonn xikonvchê khatir, updesam borabor Tannem jivitache ani zannvaiche kaide-i dile. Levi kullantlea Aaronak, Tannem voir kaddlo. To aplea bhava Moizesa sarkoch nitivont monis aslo.
7. Tannem tachê lagim sasnnacho korar kelo ani taka porjechem iadnikponn dilem. Tannem taka sundor angvostramnim nettoilo ani mhoimechea vostramnim nhesoilo.
8. Taka moladik daginnem dile. Paim-am bhovtem moladik nettoilolim vostram ani lamb lugttam ghalun Tannem taka sopurnnaien nettoilo.
9. Angvostram bhonvtonnim ghalunk tannem Tankam dallimbam dilim; tachea dôr panvla gonnkonnem vazonk, bhangarache zaite ghungur dile. Hê vorvim, tancho avaz Dev-mondirant gaztolo Ani porjek tachi iad ietoli.
10. Aaronak Sorvesporan ek nillem ani zambllea rongachem bhangarchê nokxechem povitr angllem dilem. Tem eka nokxi korpeachem kam'. Eka nitidarachea hodd'deacher urim ani thummim.
11. Xik'kea vori kantoilolim bhangaracher bosoilolim thikam, eka xettichi kola. Tem sogllea Isrelachea barai kullanchem iadostik koxem.
12. Ani tachê pogddecher êk bhangaracho mukutt, Devak orponnechea xik'kean kantoilolo, xrêxtt ani polletoleanche dolle dipkaita tosli bhov sundor nettovnni.
13. Tachea adim osleô sundor vostu konnech polleunk nasleô ani tea adim konnench teô vaprunk nasleô. Punn, tachea putamnim ani sonvsthen teô sodanch vapurleô.
14. Dôr disa Tache iodn sodanch don pavtti puraien lasunk zai asle.
15. Moizesan taka Devak sonvskarlo ani povitr telan taka maklo. êk iadnik koso Sorvesporachi seva korchi mhunnon ani Sorvesporachea nanvan lokancher sodankal axirvad ghalcho mhunnon korar kelo.
16. Pormôllit dhump lasun, aplê porjen Sorvesporachi iad korunk, ani tanchea patkanchem farikponn diunk Sorvesporan taka sogllea mon'xakullantlo venchun kaddlo.
17. Jakobak Tannem aple hukum xikonvchê khatir ani Israelacher aplê sumurticho uzvadd poddchê khatir, apleô adnia To tanchê lagim patielo ani aplea kaideache nem' tachê suvadin kele.
18. Te oronneant astana dusreank tachi kunn'nnattai zali ani Dathan Abiram ani tachea mon'xamnim, Korah ani tachea soinikamnim, sogllea razanchea kinvattean ani krodhan tacher add akromonn kelem.
19. Te kitem kortat tem Sorvesporan pollelem ani Taka khub vaitt dislem. Tachea zallanchea krodhan Tannem tancho nas kelo. Tanchea add vismitam kelim, ani zolltea ujean tankam girasun uddoile.
20. Ani Tannem Aaronachi mhoima vaddoili ani taka ek daiz dilem. Tannem taka poilea follancheô bhettovnneom dileô. Soglleam poros poilem, taka zai titlem jevonn dilem.
21. Hea udexim Devan apnnak bhettoiloleô bhettovnneom taka ani tachê sonstik dileô. Teo tannim kheleô.
22. Punn, dusrea lokam bhaxen, Aaronak porjechê zomnicho vantto kednanch mellunk na. Kiteak, `svota Hanvunch tuzo vanntto ani daiz zalam.'
23. Devachê bhoktichê hurbek lagon, Eleazaracho put Finehas mhoimechê vollerint tisrea zagear urta. Kiteak porjen bondd kelo tedna, aplê nixtten ani bolladik kallzan to nitt ubo ravlo ani hê porim Israelachea patkank tannem bhogsonnem zôddlem.
24. Tea khatir hea sovostkaiechea somzutachi tacher mhôr marli ani taka Aplê porjecho ani Dev-sthanacho mha-iadnik kelo ani taka ani tachê sonstik, sasnna khatir mha iadnikacho man rakhun dovorlo.
25. Hea bhair Judachê kulliechea Jes'sechea puta Davida lagim, tannem koblat keloli ani bapaichi razvôtt fokt putakuch denvtali. Punn, hem Aaronachem iadnikponn tachê sogllê sonstik favo kelolem.
26. Tumchea purvozanche xegunn puson vocho nastana, tacho onod pillgeanchea pillgank panvchê khatir, aplê porjechi thiraien nit korunk, Devan tumchim kallzam thiraien bhôrchim. Ovesvor
