1. Tujea xezareak usnnem divop mhollear êk doiallponnachi kornni. Taka adaracho hat dinvxi zalear tum updês palltoloi.
2. Tujea xezareak kiteim goroz zalear taka usnnem di. Ani tum taka rinn asai zalear, tem vellar farik kôr.
3. Dilolem utor samball ani tacho visvas jikh. Tujea gorzanchea vellar sodanch tuka adar favo zatolo,
4. Zaitê pavtti apnnak dilolo adar varear thaun poddlolea vori zaitea zannank dista ani ditoleak trasant ghaltat.
5. Apnnak kiteim mellta meren, monis aplea xezareachea hatacho umo ghetolo ani tachê girestkaiechi mottê nomllaien tust kortolo. Punn, êk pavtti tem farik korpacho vêll pavtôch, tem kainch nhoi zalolea bhaxen uloitolo ani atam apnna lagim na mhunnon sangtolo.
6. Tum tachê fattik lagloi zalear ghoddiê tantle orde duddu tuka mellot. Tedna apnnak sort laglolea vori tuka distolem. Na zalear, to tuka nagoitolo. Gorjê bhair tum êk dusman zôddtoloi Tuka man mellchê suvater xirap, vaitt utor ani okman favo zatole.
7. Zaite lôk usnnem divpak fattim sortat te apunn himtte mhunnon nhoi. Punn, gorjê bhair apunn fosovche nhoi mhunnon te fattim sortat.
8. Punn, khorench gorib asat tankam somzun ghe. Adara khatir tankam tixttaum-nakai.
9. Sorvesporachea adniank pallo diun, goribank adar di. Tanchê gorjê vellar tankam ritea hatamnim portun dhaddinakai.
10. Eka fatra pondak dovrun padd kelolea poros tujê lagim asam zalear tujea bhavak vô xezareak di.
11. Sorvesporachê adniê pormannem, tujê grestkaiecho upeôg kôr. Tem tuka bhangara poros odik faideachem zatolem.
12. Bhikxea diun tuje kodde bhôr. Tujer ietolea odruxttantlean tum sutt'toloi.
13. Tem tuka eka mozbut ddhala ani voznadik bhalea poros tujea dusmana lagim zhuzonk upkartolem.
14. Ek boro monis aplea xezareak zamin ravtolo. Fokt êk loz naslolo dolldiro taka apli fatt portitolo.
15. Tuka zamin ravlolean tujer upkar kelolo to visornakai. Tannem sogllem tujê pasot khorchilam.
16. Eka patkeak apleak zamin ravloleachi porva nasta. To onupkari apnnacher upkar keloleak visorta.
17. Zamin ravun zaite iesiesvont monis konnixttaiek pavleat. Ani tankam jivitachea khôl moddant xevttileat.
18. Zaminik lagon, vhodd nanv aslolea mon'xank ghor-dar pasun na zaun, te porki desamnim ximpoddleat.
19. Apnnak faido zatolo mhunnon chintun eklo vaitt monis dusreak govai ravunk takit korta tachi itsa faido gheunk asta, to apnnacher khast magun gheunk toiar asa.
20. Tujê tanki pormannem tujea xezareak zamin di. Punn, tachê sarki tuji poristhiti korun ghena zaunk kallji ghe.
21. Jivitant mukhel vostu udok, jevonn, kopdde ani tujea khasgiponna khatir ek ghor.
22. Dusreanchea ghoramnim bhorpur manachim jevnnam jevlolea poros aplea svotachê gorib khompttent pez jevlear odik borem.
23. Tujê lagim chodd asum vô thoddem asum, tantunuch tum dhadoxi za. Ani tujim ghorchim tachea voir tokrar korchim nant.
24. Hachea-tachea ghoramnim bhonvpachem jivit ek udas jivit. Tum khoinsorui ravum. Thoinsor tujean meklleponnan aplem tondd ugddunk zanvchem na.
25. Thoinsor tuka thikann nasta. Lokank ievkar diunk tum soro vantt'tai. Punn, tea khatir konnuch tuje upkar mandinant. Velean zalear tuka hinnsannichim utram ghenvchim poddtat.
26. `Are porkea mon'xa hanga io. Mezar jevonn kadd. Tujê lagim kitem toiar asa? Mhaka kiteim jevunk di.'
27. `Kuxin sor porkea! Mhozo êk mhotvacho soiro aila. Mhozo bhav mhaka bhett diunk ieta. Mhaka tem ghor zai.'
28. Eka gharantlo bhair ghalop ani eka rinnkara bhaxen lojek ghalop, eka chotur ani chintpi mon'xak tem sonsunk samkem kottin. Ovesvor
