1. Sudd gheta tacho Sorvespor sudd ghetolo, kiteak tachea patkancho To sarko ixôb dovorta.
2. Tuka vaitt kortolea tujea peleak bhogôs, ani tum magnnem kortai tedna, tujim patkam bhogsotolim.
3. Ek monis dusreak zollta zalear, tachean Sorvespora lagim kaklut koxi magunk zait?
4. Apnna sarkea mon'xache churchure taka disonant zalear, apleanch patkanchem bhogsonnem tachean koxem magun zait?
5. Masa-rogtacho zaun to rag dhôrun ravta, tôr tachea patkanchem bhogsonnem konn taka ditolo?
6. Nimannea vostuncho ugddas dhôr ani dusman'kaiô sôdd. Tum mortoloi ani kustoloi mhonn ugddas kôr ani adnia samball.
7. Adniancho ugddas dhôr ani tujea peleacho kallzant rag dhôrum naka. Bhov Vortea Devachea Koraracho ugddas kôr ani peleachea opmanachi porva korum naka.
8. Zhogddim korpachem sôddun dilear tum chodd patkam korcho naim. Kiteak, gorom toklecho monis zhogddim manddta.
9. Ek patki ixttam modem tonntto uprasaita ani xantin jietolea mon'xam modem vankddeponn bhitôr kaddta.
10. Ujeachi khorai zolloitolea vostuncher ollombun asta, toxench hinvxê pormannem zhogddem vaddtta. Mon'xachea bolla pormannem tacho rag vaddtta, toxench tachê grestkaiê pormannem tacho krodh khôr zata.
11. Uttavollin suru zaloli bhasabhas uzo peroita ani vichar-pachar korinastana kelolea mot-bhedak lagon rogtam vhanvtat.
12. Ekê kitt'ttek funk marlear uzo perovta, ani ticher thuklear ti palovta. Hem sogllem tum tujeach tonddan kortai.
13. Dusreacheô khobrô kortoleancher ani fottkireancher xirap poddum. Kiteak, aplem kam' borê toren kortolea, zaitea zannachem tannim padd ghatlam.
14. Toslê khottê jiben zaitea zannachi sovostkai ibaddlea, ani tankam hea ani tea desamnim pavoileat; Mozbut xaram dhortorer xevttileant, ani vhoddlea mon'xanchim ghoram padd ghatleant.
15. Tê khottê jiben borê ghorkarnnink ghottasfott korpachê doxek pavoileat ani tanchea koxttanchi mozuri tankam mellunk diunk na.
16. Tankam kan ditolea mon'xak kednanch monachi xanti mellchi na ani to kednanch novean sovostkaien jieuncho na.
17. Eka chabkachea dhopkean panddam udetat, punn, jibechea dhopkean haddam moddtat.
18. Torvarichea dhopkean meleat tanchê poros kitlexech odik lôk jibechea dhopkean moron geleat.
19. Jibechea chopkeantlo vattovlolo bhagi, zo tichea krodhak sampddonk na, to bhagi, ani zannem zum aplea khandar vhorunk na ani zo tichea sanklleamnim bandun urunk na, to bhagi.
20. Kiteak, tichem zum lokhonddachem ani sanklleô kaxeacheô.
21. Ti tuka konixttaiechem moronn dita, tea poros tum norkant gelear odik borem.
22. Dev bhirantichea mon'xacher tichi podvi cholona. Tichea ujeant te lasonant.
23. Devak soddunk bhonvtole lokuch ticheô boliô, ani êk pavtti tanchea modem to uzo pett'ta to kednanch palounk zaina. Ti eka xinva porim tancher uddki ghaltoli ani ekê vaganttê bhaxen tancheô vadreô kortoli.
24. Zanna za, tujea bhattam- bensank tum sori martai ani tujem rupem-bhangar chaven bond kortai.
25. Toxench tagddi ghevun tujea utranchem vozon kôr ani tujea tonddak thalem mar.
26. Te vatten vetana chotrai dhôr. Na tôr tujem panvol vankddem poddon, tum tuka dattun ravtoleachem tum savoz zatoloi. Ovesvor
