1. Sorvesporachi bhirant dhôrta to hê bhaxen jietolo, ani Somurtik veng marta to zannvai zôddtolo.
2. Ekê avoiê porim ti taka mellunk ietoli ani tornneponnailê hoklê porim ti taka vengoitoli.
3. Ti taka somjikaiechea unddean pôstoli, ani zannvaiechem udok pieunk ditoli.
4. Ti taka tenko ditoli ani to halcho na, to ticher patietolo ani lojek sampoddcho na,
5. Tachea sezariam poros ti taka unch ubartoli ani ak'khê sobhê modem tachem tondd ugôddtoli.
6. Taka melltolem sukh ani zoitacho mukutt, sasnnak togta toslem nanv tachem daiz zatolem.
7. Pixeanchea hatank ti kednanch mellchi na ani patkeanchi nodor ticher kednanch poddchi na.
8. Ti gorva poros khub pois ravta ani fottkireank ticho ugddas kednanch zanvcho na.
9. Eka patkean vakhann'nni korop sarkem nhoi. Kiteak, ti Deva koddlean ieunk na.
10. Kiteak, vakhann'nni zannvaientlean ucharpak zai, ani Sorvesporuch ti suchoita.
11. `Mhojea patkank Sorvespor zapsaldar asa!' Oxem mhunno nakai. Kiteak, apnnak kanttallo ieta tosli vost to kednanch korcho na.
12. `Tannench mhaka vankddea rostean vhelo!' mhunno nakai. Kiteak, oslea patkeanchi Taka goroz na.
13. Vaitt asa titleachoi Sorvesporak kanttallo ieta ani tachi bhokti kortolea konnakuch tacho môg ascho na.
14. Survatek tannench svota mon'xakull rochlem ani taka aple nirnnoi gheunk mekllik dili.
15. Tuka zai zalear tujean adnia samballunk zatat, ani visvaxiponnan cholunk tujêch adhin asa.
16. Tujê mukhar tannem uzo ani udok manddleant: tuka khuxi taka hat ghal.
17. Mon'xa fuddem jivit ani moronn asat: to vinchun kaddit tem taka melltolem.
18. Sorvesporachi zannvai bhov vhôdd, To sokten bollvont ani sogllem Taka tthavem:
19. Tachi bhokti kortoleancher Tache dolle asat, ani mon'xachi dôr-êk kornni To vollkhota.
20. Khotteponnachea margar cholunk Tannem formaunk na ani patok korunk konnakuch Tannem rojea diunk na. Ovesvor
