1. Mhojea puta, goribak aplo dispott'tto zôddpacho addvarnakai. Gorjevont dolleank tollmollait dovrinakai.
2. Bhukeloleanche koxtt vaddoinakai. Odruxttak sampoddloleank kiddoinakai.
3. Nirxevnnê khatir jivar ailoleanche koxtt vaddoinakai. Nhoi mhunnon varear poddloleank bhikê khatir thamboinakai.
4. Konnixttaiek sampoddlolea bhikareank bhairainakai. Nhoi mhunnon goribank tuji fatt portinakai
5. Gorjevontam veli tuji nodor tallinakai. Tujer xirapunk karonn dium-nakai.
6. Aplea akantachea vellar konnuim tuka xirapit tacho Rochnnar tem aikotolo.
7. Somestancho mog kôr. Manestanchea mukar, tuji man bagoi.
8. Goribanchem aikun ghe ani tankam borê sonsnnikaien ani xantitaien zap di.
9. Piddapidd sonstoleank piddapidd ditoleanchea hatantle vattai ani tujea nirnnoiant tum osokt zaum-nakai.
10. Onathancho bapui koso za ani tanchea avoiank tancho ghorkar koso za. Ani tum Sorvpodvedaracho put koso zatolo, ani aplê svotachê avoi poros To tuzo odik môg kortolo.
11. Zannvai apleach bhurgeank vaddoita ani apnnank sôdtoleancho poramôs korta.
12. Ticho môg kortat tim jivitacho môg kortat, tika sokallim thaun sôdtat tim khuxalkaien bhôrtolim.
13. Tika ghôtt veng marun ravtat tankam mhoima melltoli; khoinsor-ui tim vochum, Sorvespor tancher Aplo axirvad ghaltolo.
14. Tichi seva kortat tim Bhov Povitr Devachi seva kortat, ani ticho môg kortat tancho Sorvespor môg korta,
15. Tichem aikota to niti pormannem nirnnoi gheta, ani tika aplem dhean-mon laita to surokxit jietolo.
16. Ticher patietoleak ti melltoli ani tachi sonsôt tika aplem daiz koxem bhôgunk pavtoli.
17. Poilim-poilim ti taka vankddê-tinkddê vatten choloitoli ani bhirant ani bhezuddponn tacher haddtoli. Tichean tacher visvas dovrunk zai-sôr, ti taka koxttaitoli, ani koddok formonnam udexim tachi porikxa kortoli;
18. punn xevttim ti taka portun nitt rostear pavoitoli ani aple gutt taka ukte kortoli.
19. Tika sôddun to pois gelo zalear ti-i taka sanddtoli ani tachem nisontton zaunk ditoli.
20. Sondincho faido kadd ani vaitta koddlo tuka samball ani tujich loz dhôrinakai.
21. Kiteak, patkak pavoita tosli loz asa. Ani anink êk loz asa ji tuka bhovman ani boreponn korta.
22. Tujer tum choddui khorkhôs zaum-nakai Lojek tuka nisonttonak pavounk dium-nakai.
23. Boreak pavoita tedna sot ulounk fatti soronakai ani tuji zannvai lipoinakai.
24. Kiteak, tuji zannvai tujea utrantlean kolltta ani tuji dekh tum uloitolea xobdantlean kollit korta.
25. Sotacher add uloinakai. Tum sogllench zannaim mhunnon somzonakai.
26. Tujim patkam kumsar zaunk lozonakai. Vhanvtem udok addavunk thokos gheum-nakai.
27. Murkhak tujer cheponn ghalunk dium-nakai. Grestanchê vatten voddonakai.
28. Sota pasot moro porian zhuzot rav, ani Sorvespor Dev tujê khatir zhuztolo.
29. Nettan ulovpi ani kamank fattim sorpi zaum nakai.
30. Tujea ghorant xinva bhaxen vagonakai vô tujea chakram mukar bhizudd zaum-nakai.
31. Gheunk hat fuddem korum naka ani diupa vellar mutt dhampun chamtto zainakai. Ovesvor
