1. Budvont raza aplê porjek dekh dita ani aplea chakrank xist somzaita.
2. Nitidara sarke odhikari ani Rajpala sarki tea xarantli porza.
3. Xist naslolo raza, porjechem odruxtt zata. Zannvaien bhorlolea fuddareank lagon xarachem sudharop zata.
4. Sonvsarantlo rajkarbhar Sorvesporachea hatamnim asa. To favo tea velar favo te fuddari dhaddun dita.
5. Mon'xachem ies Sorvesporachea hatamnim asa. Apnnem sanglolem boroita tacher To mhoima denvoita. Gorva virudh protek chuki khatir tacher tum ragar zaum-nakai ani ragachea bharar tachea add panvol ukholnakai.
7. Gorv mon'xak ani Devakui sonsona, ani onitichi dogainkui vitt ieta.
8. Onitik, khospaiek ani duddvank lagon patxeaiponn eka desa koddlean thaun dusrea desant veta.
9. Gorvan bhoro sarkem dhul'li ani gobrakodden kitem asa? Ami tôr dhul'l ani gobor. Ami jivont astana legit amchi kudd kusta.
10. Chodd kallachi pidda voizak fottoita. Aiz raza aslolo tachem faleam moddem zata.
11. Soglle monis mortolech, Tanche fokot kidde, mus ani ran'vottim zonavoranch urtolim.
12. Monis aplea Sorvesporak visorta ani aplea Rochnnarak aplea kallzantlo pois korta tedna gorv suru zata.
13. Gorvachem poilem panvol patok dekhun, zo konn taka vengoita to khotteponnan bhorta. Teach khatir Sorvesporan te ravonasloleô marekar khasti dhaddun tancho sopurnnaien nas kelo.
14. Sorvesporan Razank tanche sodrevelean xevttile ani tanchea zagear lhan'vikaiechea mon'xank bosoile.
15. Sorvesporan gorvixttank mullak dhôrun humttaile ani tanchea zagear lhanvikaiechea mon'xank bosoile.
16. Sorvesporan raxttrancheô rajvôttkeô sokla xevttileô ani zomninchem buneadi thaun nisontton kelem.
17. Kaim zannank tannem kuxin kaddle ani tancho nas kelo ani sonvsarantli tanchi iad pasun pusun kaddli.
18. Gorv mon'xam pasot korunk na Tech bhaxen rag-krodh ostorê thaun zolmol'leak korunk na.
19. Khoinchê zatik bhovman favo? Monis zatik. Khoinchê zatik bhovman favo? Devachi bhokti kortat tankam. Khoinchê zatik bhovman favo nhoi? Monis zatik. Khoinchê zatik bhovman favo nhoi? Tacheô adneam môddtta tankam.
20. Fuddariak tache bhav bhovman ditat tech porim apli bhokti kortoleank Sorvespor bhovman dita.
22. Grest, lovkik ani gorib lokank Sorvesporachi bhokti korun, tankam mhoimevont zaum-di.
23. Gorib mhunnon eka budvontak kirkoll korop sarkem nhoi. Toxench eka patkeak bhovman divop sarkem nhoi.
24. Savkar, Nitidar ani Patxai, soglleank bhovman favo. Punn, Sorvesporachi bhokti korta tachê poros konnuch mahan nhoi.
25. Eka budvont gulamache svotontr monis chakri kortole, ani te somjikaieche asot zalear, toxem korpak tankam matui vaitt dischem na.
26. Tujem kam' korta tedna tujê zannvaiechem prodorxon korinakai, ani tum avgoddaiek sampoddta tedna zannvaiô korinakai.
27. Pottachê bhuker ravun boddaiô sanglolea poros khub koxtt korun pott bhor jevlear odik borem.
28. Mhojea puta, tuzo svabiman samball, ani, tujem khorem mol dakhoi.
29. Apnnak svota kikont korta taka konn somzun ghetolo? Vô apnnak svota man dina taka konn man ditolo?
30. Goribak tachê zannvaiê khatir ani grestak tachê dovloti khatir bhovman ditat.
31. Zôr konnakui gorib astana bhovman mellta, tôr grest zatôch taka kedo bhovman melltolo tem chint. Zôr konnuim grest astana taka unnak lekhtat, tôr to gorib zatôch taka kitlo unnak lekhche nant? Ovesvor
